Жуг-жагдэ ӝуатыса, коньдон тыронлэсь уд пегӟы

- Адямилэн, кылсярысь, кык юртэз. Одӥгаз со улэ, нош кыкетӥяз улӥсез ӧвӧл. Таӵе учырын жаг понна кызьы коньдон тыроно?

- Жилищной кодексъя но Коммунальной услугаосты сётонлэн куронъёсызъя, адямиос котькуд юртсы понна коммунальной услугаоссэс тырыны кулэ. Озьыен, тӥ вылын кык юрт ке лыдъяське, кыказ ик жагды понна коньдон тырыны квитанциос вуозы.

- Юрт кузёос, юртъёсын улӥсь адямиос сярысь лыдпусъёс кытысь басьтэмын?

- Федеральной законодательствоя, региональной операторъёс коммунальной услугаосын пайдаяськисьёс сярысь иворъёсты пӧртэм интыосысь басьтыны быгато. Соин куд-ог квитанциосын янгышъёс пумисько. Кылсярысь, квитанциосы тросгес адямиос гожтэмын луыны быгатозы яке юрт кузёлэсь нимзэ, фамилизэ янгыш пусъёзы. Регоператор таӵе дыръя шонер нимъёсты яке фамилиосты туспуктыса яке отсканировать карыса доразы келяны куре. Келяно:

- юрт кузёлэсь паспортсэ;

- гурт поселенилэн администрациысьтыз справка.

Со сяна, кылдэм юанъёсын ЭСКБ офисъёсы вазиськыны луоз. Шонер документъёсты келямды бере, вуоно толэзьын квитанциосын янгышъёс уз луэ ни.

- Кин басьтыны кулэ контейнер: жуг-жаг кисьтась, регоператор яке муниципалитет?

- 2019-тӥ арысь 1-тӥ толшорысен жуг-жаг кисьтан интыосты дасян понна интыысь аскивалтэт яке управляющей компаниос кыл куто. Со сярысь «Об отходах производства и потребления» законлэн 8-тӥ статьяяз гожтэмын.

- Гуртамы контейнерлы площадкаос ке ӧвӧл, кызьы жуг-жагез кисьталозы?

- Ёрос но гурт поселениослэн администрациоссы жуг-жаг кисьтан контейнеръёсты пуктон понна площадкаосты пуктыны интыос ӵошен бырйыны кулэ. Со сярысь верамын «Об общих принципах организации местного самоуправления в РФ», «Об отходах производства и потребления» федерал законъёсын но «Санитарные правила содержания территорий населенных мест» 42-128-4690-88 СанПиНын. Гуртъёсын контейнеръёс ӧвӧл ке, жуг-жагез мешокъёсы тырыны луоз. Собере мешокъёсты юнматэм дыре сюрес дуре, кытысь сое басьтозы, поттоно.

- Нылпиос мукет городын уло, кузпалы вахтаен ужа, гужем быдэс семьяен дачаын улӥськом. Таӵе учыръёсы жуг-жаг понна дун быдэсак тыроно-а?

- Коммунальной услугаос, со пӧлы ик пыре ТКО но, понна перерасчёт лэсьтон РФ-ысь Правительстволэн 354-тӥ номеро постановлениеныз юнматэмын. Юрт кузё яке отын улӥсь кӧня ке дыр ӵоже мукет интыын ке улӥз, региональной операторлы (энергосбытовой компанилэн офисаз но луоз) яке управляющей организацилы перерасчётлы заявление но дорады улымтэдэс возьматӥсь ужкагаз келяно.

Келяны луоз, кылсярысь, та выллем документъёсты:

- командировочной удостоверенидылэсь яке командировкае келямзы сярысь приказлэсь копизэ яке проездной билетъёслэсь копизэс;

- эмъюртын яке санаториын луэмды сярысь справка;

- гостиницаын, общежитиын улэмдэс возьматӥсь счёт.

- Мон вань жуг-жагез ӝуатӥсько яке бакчае гудыса ватӥсько. Жуг-жаг понна коньдон тырытэк но быгатӥсько-а?

- «О санаторно-эпидемиологическом благополучии населения» 52-тӥ номеро федерал законлэн 22-тӥ статьяезъя, жуг-жаг адямилэн тазалыкезлы кышкытлык кылдытыны кулэ ӧвӧл. Жуг-жагез ӝуатыку, омыр кырсёме. Озьыен, со тазалыклы кышкытлык кылдытэ. Жуг-жагдэс асьтэос палэнэ нуыса кисьтыны уд быгатэ. Со понна регоператоръёс кыл куто. Жуг-жагез ӝуатыса, ватыса, коньдон тыронлэсь уд пегӟы.

Дасяз Ольга

НИГАМАТУЛЛИНА.