-16 °С
Лымы
Антитеррор
Вань иворъёс
Общество
28 февраль 2019, 12:31

«Мон – удмурт. Соин туж данъяськисько»

Шаугетӥсь нюлэсъёс, жильырась ошмесъёс, мур нюкъёс, ӵошкытэсь возьёс, паськытэсь бусыос, чылкыт шуръёс будэтӥзы Башкортостанлэсь дано удмурт пизэ Ренат Биктимирович Галямшинэз. Со – РФ-ысь гурт удысысь сӥё-дано ужась нимлэн, БАССР-ысь вылӥ Советлэн Данъян грамотаезлэн, БР-ысь Президентлэн тау карон гожтэтъёсызлэн, Кузёбай Гердлэн премиезлэн, Калыкъёслэн эшъяськон ордензылэн, «Трокай Борисов 1891-2011» Синпелет медальлэн кузёез. Со сяна, Ренат Биктимирович БР-ысь Верховной Советлэн депутатэн но луиз. Кызь тямысэтӥ тулыспалэ Ренат Биктимирович 70 арес тырмон юбилейзэ пусйиз.

«Олимпиадаосын вормисьёсын артэ бызьылыны гожтӥз»
Ренат Биктимирович Татышлы ёросысь Арибаш гуртын дышетӥсьёслэн семьяязы вордӥськем. Ньыль нылпи будӥллям соос. Ренат пичиысен ик спортэз гажам.
- Вылысь Татышлыын дышетскыку физкультураез Закир Лукманович Лукманов дышетӥз. Со туж зол куронъёс пуктэ вал, - уно аръёслэн мышказы кылем вакытэз тодаз вае Р. Галямшин.
Вуоно спортсменлы тужгес удалтэм Дуванысь техникумын. Татысен со зэмос спорт дуннее бадӟым вамыш лэсьтэм. Куасэн тренерез СССР-ысь физкультура удысысь сӥё-дано ужась Николай Емельянович Веремей студентлэсь спортэн эшъяськыны бугырскем мылкыдзэ ӝог валам. Со синйылтэм студентсэ кыдатонлы трос дырзэ сӥзем. Куасэн бызьылон сяна, Ренат Биктимирович капчи атлетикаын но усточи вылэм. Та ӧре сое СССР-ысь спортъя мастер Валерьян Давлетович Хужин кыскем. Ренат Биктимирович капчи атлетикая тренерзэ шуныт тодэ ваёнъёсаз возе. Уго В. Хужин солэн данъяськымон, адӟем карымон но гажамон адямиез вылэм.
Лобӟо-тӧлӟо аръёс. Дуванысь техникум бере гужем Р. Галямшин «Социализм» колхозын (туала «Рассвет» СПК) ужам. Бӧрысь вить ар ӵоже Башкир сельхозинститутысь агрономъёсты дасянъя факультетын тодон-валанзэ будэтэм. Спортэн «ӝуась» студент татын но куасэн бызьылонлэсь палэнскымтэ. Арысь аре кыдаса, со вылӥ вормонъёслы кузё луэм.
- Тренереным, СССР-ысь физкультура удысысь сӥё-дано ужасен Александр Адольфович Книссэн ми кытчы гинэ ӧм вуылэ: Красноярске, Минске, Мурманске, Свердловске, Ижевске, Перме, Болгарие, Чехословакие. СССР-ысь вылӥ дышетскон юртъёс пӧлын радъяськем ӵошатсконъёсы, ВЦСПС-лэн чемпионатъёсаз пыриськылӥмы. Олимпиадаосын вормисьёсын артэ бызьылыны гожтӥз. Тыршеме юнме ӧз луы, 1973-тӥ арын мыным СССР-ысь куасэн бызьылонъя спортъя мастер ним сётӥзы, - ортчем аръёссэ син азяз пуктыса, вера Ренат Биктимирович.
Институтсэ йылпумъямез бере Р. Галямшинэз Перме но, Ижевске но спорт удысэ ужаны вазё вылэм. Нош сое дор палъёсыз кыскиллям. Быръёнэз юнме шорысь луымтэ, солэн гурт удысын лэсьтэм ужъёсыз номырин мертаны луонтэмесь.
Секытъёсты чидаса, азьпала вамыштэм
Кема аръёс ӵоже Ренат Биктимирович «Дэмен» хозяйствоен кивалтӥз. Вакытаз дэменъёс азьветлӥсь, кужмо хозяйствоослэн радазы лыдъяськизы.
- Гурт удысэ нырысетӥ вамышъёсме лэсьтыкум, мыным бадӟым юрттэт возьматӥз райкомпартилэн нырысетӥ секретарез Радиль Мухаметдинов. Ужаны мылкыдзы луэм адямиослы со котьку дурбасьтэ вал. Радиль Кияметдинович мынам кенешчие но луиз, - шуэ 30 арлэсь трос гурт удысын тыршем Ренат Биктимирович.
Гуртъёсы нылпи садъёс, магазинъёс, школаос, спортзалъёс, клубъёс ӝутэмзэс, сюрес лэсьтэмзэс, гурт ульчаосы газ, ву гумыос кыскемзэс со туннэ кадь тодэ на. Ренат Биктимирович со аръёсы трос шуг-секытъёсын пумиськем. Озьы ке но чидам, котькуд кутскем ужез солэн йылаз-пумаз вуттэмын.
Туннэ нуналэ гурт удысын кылдэм югдур Ренат Биктимировичез туж ӝожомытэ. Солэн малпамезъя, гурт хозяйствоос кун юрттэт луымтэен курадӟо. Гуртын поттэм вузъёсты – сӥлез, йӧлэз, ю тысез – кунмы ичи дунэн басьтэ. Нош ГСМ-лэн, техникалэн дунъёссы матазы лыктымон ӧвӧл. Уг ке тырмы, дунъёс нуналлы быдэ сямен йыло. Соин ик хозяйствоос «чуто», ужасьёссылы дыраз уждун тырыны луонлыкъёссэс ышто. Берло дыре хозяйствоосын ужась киослэн тырмымтэоссы юн шӧдӥське.
«Ӟеч уж ӟечен ик берытске»
1996-тӥ арысен 2015-тӥ арозь Ренат Биктимирович Башкортостанысь удмуртъёслэн национально-культурной центренызы кивалтӥз. Та ужзэ но со синмаськымон нуиз. НКЦ кылдэм бере удмуртъёс понна кӧня ӟеч ужъёс быдэстэмын. Соосты лыдъяса но уд быдты. Кылсярысь, «Ошмес» газет, «Усточикар» лагерь. Соос республикаысьтымы калыкез огазеяло, куспазы эшъяськон мылкыд кылдыто.
- Мон – удмурт. Соин туж данъяськисько, - шуэ Р. Галямшин. – Ас калыке понна лэсьтэм ужъёсылы мон шумпотӥсько. Пичи дыръя атае мыным ӵемысь вера вал: адямилы ӟечлык лэсьтыны быгатӥськод ке, сыӵе ужез одно ик быдэстоно. Улонын ӟеч уж ӟечен ик берытске.
Удмурт калыклэсь культуразэ, кылзэ, сям-йылолъёссэ утёнлы, азинтонлы, калыклэсь данзэ ӝутонлы вань кужымзэ понэм воргоронлэн ужан аръёсыз удалтӥллям. Та ӧрын но солэн вормонъёсыз трос. Башкортостанысь, Удмурт Элькунысь Правительство но Ренат Биктимировичлэн тыршемезлы вылӥ дунъет сётэ.
Ужаз азинлыко тыршыса, дано нимъёслы, бадӟым вормонъёслы кузё луэмез понна, Ренат Биктимирович кузпалызлы Расима Муллакаевналы, нылпиосызлы пумтэм тау карон кылъёссэ вера. Арлыдо воргорон али ӟеч вала, трос дыръя солэн сюлэм шунытэз, кенешъёсыз матысьёсызлы тырмыт луымтэ шуыса.
- Ортчем аръёсы сюрес луысал ке, мон эшшо но кужмогес ужасал. Улон сюресме но ӧжытак воштысал: спортлы но тазалыкелы тросгес саклык висъясал. Адями улоназ одно ик мукетъёслы адӟем карымон пытьы кельтыны кулэ, - вераськонмес йылпумъяса, шуиз Ренат Биктимирович.
Миляуша БУЛАТОВА.