-8 °С
Лымы
Антитеррор
Вань иворъёс
Общество
14 февраль 2019, 13:49

Эшъяськонлэсь пӧрмем яратон

Операция бере наркозлэсь сайканы вырисько. Синмы бус пыр адӟе. Кинлэсь ке мусо туссэ адӟисько кадь, удмурт кылын ваземзэ кылӥсько. «Адӟиськод-а монэ», - юало кадь. Сазьтӥськем бере асьме кылын вераськись апаен тодматски. Татышлы ёросысь Юда гуртысь Фанзима апай вылэм со. Хирургия ёзэтын ӵош кыллем кышномуртэн кусыпмес ӧм ыштэ: телефон пыр вераськиськом, ёрос центрын пумиськыкумы, ог-огмылы матысь адямилы кадь шумпотӥськом. Лякыт, бадӟым сюлэмо кышномурт ачиз кадь ик ӟеч сямо кузпалыныз, Биктимер агаен, улэ.

Биктимер аслэсьтыз вить ареслы пичи Фанзимаез пичиысен ик «бурд улаз» басьтэм. Я пузэс вандыса сётоз, я наличник буяны буёл ваёз вылэм. Нылашез великаз пуктыса школае но нуллэм. Огпол тырмытытэк улӥсь семьялы кытысь ке кыкетӥ сорт пызь но йӧндырем. «Анае шумпотыса бӧрдӥз. Вань улонзэ мыным юрттӥз. Мынэсьтым дас тямыс арес тырмемме гинэ возьмамы, кузпалъяським, - тодаз вае Ф. Зарипова. – Ми 37 ар ӵош ни, туннэ гинэ паръяськем кадь улӥськом». Шоразы учкыса, уд но вера, соос ӵош сыӵе кема улэмын ни шуыса. Соослэн пичи дыръязы эшъяськемзы бадӟым яратонлы пӧрмиз. Яратонзылэн емышъёссы - вить нылпиоссы – али огзы но бордазы ӧвӧл ни. Фанзимаен Биктимер вӧл-вӧл выль корказы кык ар уло ни. Татчы арнялы быдэ сямен нылпиоссы, внукъёссы, туганъёссы люкасько. «Нылпиос трос бере, кужыммы вань дыръя выль корка ӝутом шуыса тыршим, - шуо Зариповъёс. – Бертыса пырон интызы мед луоз. Кыӵе шумпотӥськом, нунокъёсмы огазе кариськыса ваньзы ӵош гур сьӧрын шудо ке».
Биктимер агайлэн вань ужан сюресэз мувӧй поттон удысэн герӟаськемын. Украинаын служить карыса бертӥсь егит пиез шахтае ужаны ӧтё вылэм. «Пока я живой, на земле буду работать», - со верам. «Чернушканефть», «Краснохолмскнефть», «Башнефть» - ужан интыосыз вошъяськылӥзы ке но, ужез со ик луиз: слесарь, оператор, мувӧй кыскись качалкаосты эскерись. Куамын одӥг ар ужамез 2001-тӥ арын «Почётный нефтяник» нимен дунъямын. Биктимер агай пенсие потыса но дораз пукыны чидамтэ, строительной бригадаын чыры-пыры ужъёсты лэсьтыса ветлэм. Гуртэз понна вань сюлмыныз висись воргорон Юдалэн старостаез луэ. Вӧсьёсты радъян, ошмесъёсты сузян-чаклан, пудоосты кыре поттон-нуллон но мукет – ӧжыт ӧвӧл сюлмаськонъёсыз гурт тӧролэн. Кузпалыз но солэн ужъёсызлы дурбасьтэ но котьку юрттӥське.
Огпол Выль Татышлыын ортчись Мӧр вӧсе Биктимер агай сьӧры Фанзима но мыноно кариськем. Малы мынэмзэ со али гинэ вераны дӥсьтэ. Нош соку Инмарлэсь вань сюлмыныз пи нуны курем. Ньыль нылъёс вайыса, куке но пи вордоз шуыса осконэз ик вылымтэ ни. Кӧня ке дыр ортчыса, кузпалъёслэн пизы вордӥськем. Солы Виктор ним бырйиллям. Али со Чернушкаысь колледжын 3-тӥ курсын электриклы, сварщиклы, стропальщиклы дышетске ни. Шутэтскон нуналъёсы анай-атайёсыз доры бертыны тырше, Регина, Ленария, Светлана, Виктория апайёсызлэсь нылпиоссэс нуныяны яратэ.
2002-тӥ арын «Материнская слава» медаль басьтэм анай картэзлэн анаеныз, Юртбике песяен, 24 ар ӵош улӥллям. «Аслам анае но вань ай, агаен но кенакен ӵош улэ. Вань пӧръёсыз,удмуртсэ но, мукетсэ но, пӧраны соослэсь дышетски», - шуэ кузё кышно. Биктимер агаез со нуналлы быдэ ческыт сиёнэн шумпоттэ, нылпиоссэ но ческыт пыжиськемъёсын возьма, малпамтэ шорысь вуэм куноосызлы но морозильниказ маиз ке котьку сюре.
Зариповъёс азбар но гид трос пудо-тылобурдоен улыны дышемын. Фанзима апай секыт висьыса улыку ваньмыз Биктимер агайлы усиз: скал кыскон но, пудоез утялтон но. Нылпиоссы но юрттӥськизы. Али та семьяын ваньмыз умой. Соос тямысэтӥ внуксылэсь вордскемзэ возьмало.
Анна БАЙДУЛЛИНА.
Читайте нас в