Вашкала удмурт вӧсез азинтӥсь

Куриськон йылолэн Владимир Рашитович кылем гужем «Полевая кухня» республика конкурсэ но пыриськиз. Отын со гуртоосыныз ӵош удмуртъёслэсь куриськонзэс возьматӥз. Конкурсын егит вӧсясьлэсь быгатонлыксэ куинетӥ интыен дунъязы. Со сяна, Галиевъёслэн семьязы Пермь шаерысь Чайковский городын ортчем «Бабушкин сундучок – кладезь традиций» проект улсын радъяськем «Семейные традиции» презентаци ӝытэ пыриськиз на. Отын соос сӥзьыл куриськон йылолэз возьматӥзы.

Сям-йылолъёсты утён, азинтон сярысь сюлмаськемез сяна, Владимир Рашитович мукет ужъёслы но усточи вылэм. Кылсярысь, со ачиз арганэн шудэ но кырӟа, гур поттэ, техникаен но огкыл шедьтэ. Пудо эмъянэз но солы оскыны луэ.

Егит вӧсясь Залия кузпалыныз куать чырткемесь нылпиоссэс будэто. Виктория, Элита, Диана нылъёссы атай юртысьтызы «лобӟизы» ни. Табере соос асьсэлэн семьяосынызы уло, нылпиоссэс будэто. Радмир но Кирилл Вуж Балтачысь гурт удысъя колледжын дышетско. Радмир туэ дышетсконзэ йылпумъялоз, нош Кирилл – нырысетӥ курссэ. Азалина нылпи садэ ветлэ, вуоно арын со школае мыноз. Кузпалъёс нылпиоссылы но крезьгурез яратон мылкыд пыӵатӥллям. Соос ваньзы кырӟаны ярато. Радмирен Кирилл гитараен, арганэн шудо. «Нылпиостылэсь будэмзэс шӧдӥды-а?» - юасько кузпалъёслэсь. «Асьмемын ӵош будӥзы, - вера Залия апай. – Бадӟымъёсызлы пичиосызлы мында саклык но, оло, ӧз висъяськы, дыр». Нош нылпиоссы али ки пумазы вуэмын ни. Котыр ласянь юрттӥсько, пиоссы гужем каникулъёсазы атаенызы ӵош ужаны ветло.

Владимир Рашитович пичи дырысьтыз малпанэныз но люкиськиз. Солэн мушъёсын выремез потэ вылэм. Малпанэз быдэсмем. «Мушъёс котырын ваньмы бергаськом, огмы но ум кышкаське», - вера со. Нылпиосызлы ужан аръёссэ гурт удыслы сӥзем Кашифа апай (Володя агайлэн анаез) но быгатэмезъя юрттыны тырше. Ӵошен, огкылысь уло соос.

Гужем Галиевъёслэн юрт котырзы пӧртэм буёло сяськаос пӧлы ыше. Соосты будэтон-утялтон пумысен Залия апай сюлмаське. Нош толалтэ кузь ӝытъёсы со нылпиосызлы, нунокъёсызлы шунытэсь дӥськутъёс керттэ. Бертыкузы ческыт пыжиськемъёсын куноя.

Марина НИКОЛАЕВА.

Балтач ёрос.