Вань иворъёс
Общество
1 февраль 2019, 11:23

Вормон кужмоослы пальпотэ

Спортэз азинтонлы Татышлы ёросын бадӟым саклык висъяське. Школаын дышетскисьёс баскетболъя, волейболъя, ӝӧквыл теннисъя , хоккейя но мукет спорт ӧръёсъя секциосы ветло. Соос ёросамы ортчись ужрадъёсын гинэ ӧвӧл, зонаын, республикаын регионъёс куспын ортчись но быдэсросси ӵошатсконъёсы пыриськыса бадӟымесь вормонъёс уто. Кускерттонэн нюръяськонъя (куреш) ӵошатсконысь но чемпион нимъёсын берытско.

Спортэз азинтонлы Татышлы ёросын бадӟым саклык висъяське. Школаын дышетскисьёс баскетболъя, волейболъя, ӝӧквыл теннисъя , хоккейя но мукет спорт ӧръёсъя секциосы ветло. Соос ёросамы ортчись ужрадъёсын гинэ ӧвӧл, зонаын, республикаын регионъёс куспын ортчись но быдэсросси ӵошатсконъёсы пыриськыса бадӟымесь вормонъёс уто. Кускерттонэн нюръяськонъя (куреш) ӵошатсконысь но чемпион нимъёсын берытско.
26-тӥ толшоре Вылысь Татышлыысь «Планета СПОРТ» ФОК-ын ёрос администрацилэн кузьымезлы та видъя усьтэм республика ӵошатскон ортчиз. Отчы Башкортостанысь но Пермь шаерысь 122 спортсменъёс - зэмос батыръёс - вуизы (14 команда). Соос олокӧня бадӟымесь ӵошатсконъёсын вормисьёс луиллям. Соос улонзэс нюръяськонтэк син азязы но пуктыны уг быгато ни. Куноосты пумитаны кузёос пыр-поч дасяськизы.
Ужрадэз усьтонэ Татышлы ёрос администрациен кивалтӥсь Рушан Гараев, БР-ысь Кун Собранилэн-Курултайлэн комитетэныз кивалтӥсь Салават Харасов, Кускерттонэн нюръяськонъя но курешъя спорт федерацилэн кивалтӥсез Вакиль Ильясов пыриськизы. Соос спортсменъёслы вормонъёс сӥзизы. Рушан Кадимович кускерттонэн нюръяськонын ёросысь усто спортсменъёсты Р. Бадамшинэз, Ю. Закировез, Р. Шайнуровез, А. Шаймухаметоваез, «БР-ысь тужгес устоез тренер» нимлэсь кузёзэ, Вылысь Татышлыысь кускерттонэн нюръяськонъя тренерез И. Гилязевез дипломъёсын пусйиз. Нош Вакиль Ильясов ёрос администрациен кивалтӥсез Рушан Гараевез тау карон гожтэтэн пусйиз, ёросын кускерттонэн нюръяськонэз азинтыны луонлыкъёс кылдытэмез понна.
Нылъёс но пиос кык площадкаосын нюръяськизы. «Кинъёс меда кужмогес луозы?» Та юан котькинэ сюлмаськытэ. Учкисьёс киоссэс чабо. Спортзал ӵаш! вазе.
Тани нюръяськыны потӥзы Пермь шаерысь вуэм нылъёс. Суксунысь Лилия Габдулхакова но Уинскоеысь Ляйсан Резванова нырысьсэ гинэ уг пумисько. Соос мукет ӵошатсконъёсын но ваче син султыса кужымзэс мерталлям ини. Нырысетӥ секундысен ик нылъёс кускертоннъёссы борды вань кужмынызы кырмиськизы. Нокинлэн сётскемез уг поты. Соос татчы вормон понна лыктӥллям угось. Судья ваньзэ пыр-поч учке: янгышъёс медаз луэ. Котькуд балл кужым, усто нюръяськон амал понна мед сётӥськоз. Учкисьёс но ваньзэ эскерыса уло. Нылъёслэсь нюръяськемзэс видеое уськытӥсьёс но вань: споръяськон кылдӥз ке, выльысь учкыны мед луоз шуыса. Лыдпусъёс ог-огзы сьӧры уисько. Азьпалан – Лилия. Ляйсанлэн но сётӥськемез уг поты. Таблоын – 8:8. Учкисьёс интыязы пукыны ик уг чидало ни, лэся. Кызьы быгато, нылъёс понна «висё». Тани берпуметӥез минута. Нылъёслэн синъёсазы – вормон тылгизьыос! Татын кужмогес луиз Суксунысь нылаш.
Мукет пумиськонъёс но тазьы ик «ӟырдыт» ортчизы. Пиос пӧлын тужгес но. Нокинлэн сётскемез уг поты. Татышлыос но усто быгатонлыкъёсэс возьматыса, финалэ потӥзы. Отын но соос зол кужымзэс возьматӥзы. Пиос пӧлын вормисьёсты 9 весовой категориосъя бырйизы. Кылсярысь, нырысетӥ интыын луизы Тимур Хамидуллин (35 кг), Равиль Бурханов (38 кг), Ильсур Мингараев (50 кг). Со сяна, 2-3-тӥ интыосты утэмъёс пӧлын но кузёос трос луизы. Нылъёс пӧлын (3 весовой категория) кужмоесь луизы Туймазыысь но Агидельысь нюръяськисьёс. Со сяна, пӧртэм номинациосъя вормисьёсты бырйизы на. Кылсярысь, «Самый юный борец» номинацилы кузё луиз Вылысь Татышлыысь Альберт Галимарданов.
Ужрад йылпумъяськиз. Со выль нимъёсты шараян сяна, выль эшъёс, шуныт тодэ ваёнъёс кузьмаз. Кузь сюресэз ортчыса вуэм нылъёс но пиос вуоно арын нош ик ӵошатсконъёсы лыктомы шуыса веразы.
Лиана ШАБИЕВА, нырысетӥ интылэн кузёез (Туймазы):
- Кускерттонэн нюръяськонэ сизьым аресысен, сизьым арлэсь ятыр, ветлӥсько. Вылысь Татышлые мон туэ куинетӥ ползэ вуи ни. Куинь ар ӵоже вормисе потӥ. Татын милемыз котьку шуныт пумитало. ӵошатсконэ лыктыса, татысь нылъёсын эшъяськи. Ми соосын юн кусыпъёс возиськом, котьку гожъяськиськом, жингыртыса вераськиськом. Вуоно арын ӵошатскон радъязы ке, одно ик лыктомы. Куать часъем сюресэз ортчыны милям командамы дышемын ни. Бадӟым тау тренерелы Ренат Еникеевлы. Мынам вормонэ – со солэн тыршемез.
Миляуша БУЛАТОВА.