"Ужмы сыӵе, трос вераськыны уг яра"

Школаын дышетскыкуз эше радиотехникаез, физикая дышетӥсьлэсь А. Г. Файзуллинлэсь урокъёссэ туж яратэ вал. НВП-ын но солы вуисьёс ӧз луэ, «Зарница» шудонын котьку командирлы сое пуктылӥзы.

1983-тӥ арын со Закавказской пограничной округе службазэ ортчыны сюре. Татысен вала, маин герӟалоз азьпал улонзэ. Котыраз военной сюресэз быръем ӵыжы-выжыосыз но вал уго. Одӥг ар служить карыса, со СССР-ысь КГБ-лэн Алма-Атаысь высшей пограничной командной училищеезлэн курсантэз луэ. Дышетсконзэ азинлыко йылпумъямез бере Грузие, Ахалцихе городэ, Турциен кунгож доры ужаны лэзё. Отын со вить ар луиз, заставалэн начальникез вал. «Пӧсь точкаосы» (Дагестан, Армения, Азербайджан) командировкаосыз, отын басьтэм ранениосыз берло асьсэ сярысь вералозы ай.

1993-тӥ арын воинской частьсэ Ставрополь шаере, Будённовск городэ, выжто. Вань тодэменыз, кужмыныз но быгатонлыкъёсыныз дано земляке пыриськиз Будённовскын басаевецъёслэсь терактсэс зӥбон операцие. 1995-тӥ арын Александр нош дышетскыны пыре, РФ-ысь Федеральной пограничной службая академие. Бӧрысь Саша семьяеныз Калининград городэ выже: РФ-ысь ФСБ-лэн пограничной институтаз, дышетон удысэ (1998-2004). Куать ар ортчыса, Нуритдиновъёс нош улон интызэс вошто, Екатеринбурге интыясько. Берло ужан интыез – Россиысь ФСБ-лэн институтэз (2004-2012), отын со выль ожгарчиосты тодэм удысэзлы дышетӥз. Кытчы ачиз, отчы ик семьяез – Лариса кузпалыз но Андрей, Дима пиосыз.

Александр Фланевичлэн вакчи улонысьтыз 28 арез кунгож но кышкытлыклэсь утён органъёсын службазэ быдэстонлы сӥземын вал. Ужез куинь ведомственной наградаосын дунъямын. Кузпалыз Лариса но ФСБ-лэн институтаз ик тырше. Бадӟым пизы Андрей «Старт» научной объединениын валтӥсь ӧнерчиысен ВВС-лэн подразделениеныз кивалтӥсёзь вуиз. Пичи пизы Дима али радиотехнической колледжын дышетске. Со атаезлэсь пичи дырысьтыз тунсыкъяськонзэ аслыз профессилы бырйиз.

Эше Екатеринбургысен тазалыкезлэсь лябомемзэ шӧдыны кутске. Куать ар улон понна нюръяське, но солы номыр ӧз юртты ни. 2018-тӥ арын 13-тӥ толсуре со улонэн люкиськиз. Дуно эшме, ас шаерезлы патриот луэм, воинской долгзэ пумозяз быдэстэм ожгарчиез Можга гуртэ ватӥзы. Со нуналын шай вылын автоматэн ыбылэм куара али но пель сьӧрын улэ. Нош усто офицер, быгатӥсь ӧнерчи, ӟеч дышетӥсь, умой эш сярысь тодэ ваёнъёсмы ноку уз вунэ.

Роман ХАЗИПОВ.

Янаул ёрос.