Кин со Бурай?

Милям ёрос центрмылэн нимыз кыӵе ке адямиен герӟаськемын шуыса, азьвыл мынам малпанэ ик ӧй вал…

Бурай Ергозин ог ньыль даур талэсь азьвыл улэмын. Вордӥськем арез, ку кулэмез тодмо ӧвӧл. 1523-тӥ ар бере Казаньысь хан Сахипгарай, тодосчиослэн гожъямзыя, Бурайлэн песятаезлэн Ельдяк-Тархан нимо песятаезлы умой служить каремез понна Агидель но Танып шуръёс кузяе музъем сётэм. Та выжыысь адямиос отчы трос гуртъёс кылдытӥллям. Соос пӧлысь одӥгез – Бурай. Ачиз Бурай Ергозин кун но мер (общественной) ужъёсын вырем. Муъемзы бадӟым вал бере, сое пӧртэм калыкъёслы вузаллязы, дыр.

Бурай гурт 1610-тӥ арын кылдэмен лыдъяське. 1865-тӥ арын, лыдъян-чотанлэн документъёсызъя, отын 2682 адями улэм. Тросэз улӥсьёс музъем ужен выриллям, пудо но муш вордӥллям. Та гуртын соку волостьлэн кивалтонниез, 4 мечеть, 5 училище, 4 вуко, 40 лавкаос вылӥллям, арнялы быдэ сямен ярмаркаос ортчылӥллям.

1918-тӥ арын Бурайын восстание вылэм. Адямиос ӝутскиллям калыклэсь сиён-юонзэ, ю-няньзэ таласа выллем октӥсь отрядъёслы пумит. Соос Бурайын башкир кантон кылдытӥллям, солы аскивалтон орган бырйиллям. Выль властьлы пумитъяськыны нимысьтыз отряд но радъяллям. Восстание ӝутскемъёслы кема кузёяськыны кылдымтэ, Уфаысь вуэм гарнизон соосты зӥбем.

Туала вакытэ Бурай – со ёрос центр. Отын ог дас сюрс улӥсез. Переписьлы осконо ке, вань калык пӧлысь 85 процентэз башкиръёс, кылемъёсыз – бигеръёс, удмуртъёс, ӟучъёс. Малы мон берло предложениям «осконо ке» шуыса гожтӥ? 2010-тӥ арын ортчытэм лыдъянлэн лыдпусъёсызъя, Бурай ёросын вань калык пӧлысь ог 70 процентэз башкиръёс луо. Озьы ке но ёрос газет кемалась дырысен бигер кылын потэ. Башкир но ӟуч кылъёсын печатласькисез ӧвӧл. Таӵе дыръя малпаськонэ усёно.

Бурайын али кык мечеть усьтэмын (соос воксё быдтэмын вал), одӥг гимназия, шор ёзо кык школаос, культура юрт ужало. Табере картина галереязы но вань. Предприятиос пӧлысь йӧллэсь сиён-юон поттонъя заводэз пусйыны кулэ.

Ёрос центрысь потэмын таӵе дано адямиос: филологи наукаосъя доктор, профессор Касим Ахмеров, армилэн генералэз Владимир Лобов, Совето Союзлэн Героез Сахип Майский, кылбурчи Муслим Марат, Туймазы бигер театрын ужась артист Айрат Султанов но мукетъёсыз.

Туннэ Бурайын улӥсьёс пӧлын, оло, Бурай Ергозинлэн туж кыдёкысь ӵыжы-выжыосыз но вань. Сое нокин вераны уз быгаты ни, дыр. Ньыль даур – со укыр кузь сюрес. Шумпотоно: адямилэн нимыз та дыр ӵоже селолэн нимыз бордын улэ. Азьланьын но со улоз на.

Ульфат

Бадретдинов.

Бурай ёрос.