Башкортостанын «жуг-жаг реформа» кутскиз

Нырысь ик, инкуазен герӟаськем югдурез воштон понна: инкуазь ваньбурлы кышкытлык ваись жуг-жаг кисьтан интыосты быдтон вылысь, тросэз жуг-жаг переработкае мед мыноз шуыса.

Азьло жуг-жагез люкан но утилизация понна интыысь аскивалтэт кыл кутэ ке вал, табере республикаез вить зонаослы люкизы. Котькудаз нимысьтыз региональной оператор – чылкытлык понна кылкутӥсь компания - быръемын. Котькуд операторен 10 арлы договор кутэмын.

Таиз арлэн нырысетӥ нуналысеныз ик компаниос ужзы борды басьтӥськизы. Договор гожтон понна нокытчы ветлонэз ӧвӧл. Региональной операторъёс типовой договоръёссэс сайтъёсазы интыязы. Вакчияк верано ке, котькуд оператор люкам жуг-жагез вакытаз поттыны кулэ. Со сяна, вазиськисьёслэн юанъёссылы веран, калыклэсь куронъёссэ лыдэ басьтон но компанилэн валтӥсь ужпумез луэ. Калык азе пуктэм куронъёс – жуг-жагез контейнеръёсы куяно но со понна дыраз коньдон тыроно.

Тарифъёс огвыллемесь ӧвӧл. Городын улӥсьёс толэзяз котькуд адями понна 70 манет тыроно луозы, нош кыдёкысь гуртъёсын улӥсьёс – 35 манет.

Туэ тулыспал толэзьысен платёжкаосы «за оказание услуги по обращению с ТКО» строка ватсаськоз. Единой расчётной кассовой центрлэн услугаосыныз пайдаяськисьёс понна выль строка кылдоз. Азьло жуг-жаг понна коньдон тыронэз «содержание» графае пусъё вал. Табере со уз луы ни. Нош гуртын улӥсьёслы региональной операторъёс квитанциосты почта пыр ыстозы. Жуг-жаг понна коньдонэз почта ёзэтъёсын, банкъёсын но интернет пыр тырыны луоз.

Дасяз Миляуша

НИГАМАТУЛЛИНА.