Арлыдызлэсь будэмзэ сюлэмыз уг шӧды

Солэн аслаз ӧй вал угось сокем шудо пичи дырыз. «Укмыс аресме тырмыса, бадӟымъёсын артэ ужаны потӥ. Секыт аръёсы будӥ», - тодаз вайыса вера со. Расима Шакирзяновналэн али ке но син азяз на атайзэ Быдӟым Атыкай оже келямез. Со вылэм 1941-тӥ арын куарусён толэзе. «Ку бертод?» - юам со атаезлэсь. Уг тодӥськы, мар верам вуоно ожгарчи нылызлы. Но кылдымтэ ни вылэм соослы пумиськыны. Максимысь егит солдат весяклы ож бусые кылем. Со сярысь ивор 1942-тӥ арын тулыспал толэзе вуэм.

Соку ик 12 арессэ тырмем Расима Шакирзяновнаез бадӟымъёслэн радазы пыртӥллям – табере солы быдэс нунал ужано луэм. «Палэнын нюлэс вандыса ветлӥм. Нош та пала мукетъёс ужаны вуылӥзы, - пинал дыраз берытскыса кадь вера со. – Сиён ӧй вал ни. Сисьмем алмаез (картофкаез – авт.) кумезь карыса сиылӥм». Расима Шакирзяновна берло аръёсаз кунян утем, скал кыскем. «Ужаку 10 тэнька (манет - авт.) уждун басьтыса ужамы, пенсие 75 тэнькаен потӥ. Скал кыскыку йӧл понна гинэ уждун тыризы, пудо утем понна ӧз», - вера ужысь ветеран.

Расима апай Минкаир кузпалыныз ньыль нылпи будэтӥллям. Нош пересьмон дырзэ со Римма нылыныз ортчытэ. 1999-тӥ арын со Оля нылыныз гуртазы Казахстанысь бертӥллям. Табере нылыз аслаз семьяеныз улэ ни, ӵужайзы, анайзы доры ӵемысь юрттӥськыны вуыло. «Анаймы татчыозь пу но пыртылӥз, бакчаын но уриськылӥз, - вера Римма апай. – Парсь, ӟазег, курег утён сярысь сюлмаськылӥз». Но одӥгаз нуналэ Расима Шакирзяновнаез инсульт кутэм. Шумпотоно, туннэ со бурмытскон пала вамыштэ ни…

Та нуналъёсы Расима Шакирзяновна вордӥськем нуналзэ пусъёз. Туэ солы 89 арес тырме. Солэн пичи дырысеныз кыдаса будэм мугорыз кема аръёс ӵоже медаз вала на жадёнэз.

Ольга Нигаматуллина.

Янаул ёрос.