"Улонлэн ческытэз но, курытэз но, чырсэз но вань..."

Шайматовъёс

Назия Минияхметовна Бурай ёросысь Алтауын вордӥськемын. Солэн егит дырыз секыт вакытэ тупам, 17 арес но тырмытэк, «торфе» кошкем. «Улон секыт луиз, дӥськут ӧй вал. Атай жугиськонын, анай ньыль нылпиен кылемын», - вера Назия апай. Семьяезлы юрттон, кӧня ке дӥськут басьтон вылысь, со кык ар торф поттонэ ветлэм. Тулыс кошкыса, бер сӥзьыл гинэ берто вылэм. Толъёсы, шутэтскон интые, фермаын парсь, вал утись луыса ужам. Калтасы ёросысь Качкин-Турай гуртэ куное лыктыса, аслэсьтыз парзэ – Салимзянзэ - пумитам. Татысен кутскем соослэн кык улонэз одӥг нюжае бинёнзы.

Узбекистанын кӧня ке улыса, кузпалъёс Татарстанысь Агрызэ улыны интыясько. Кыкназы но чугун сюрес вылын ужало. Зор-котъёс но, буранъёс но люкетыны кулэ ӧвӧл, поездъёс дыраз но шонер мед мынозы шуыса. Капчи уж ӧвӧл со - 20 килограммлэсь секыт кувалдаосын сюрес вошъяса ветлон. Тыршемзы юнме луымтэ, ӟеч ужасьёслы квартира сёто ни вылэм. Но егит семья берен Качкин-Турае бертоно луэм, Салимзян агайлэн вордскем юртаз. «Улон озьы кариз, мукет сямен ӧм быгатэ», - шуо соос.

Бертӥзы Вячеслав пиенызы. Нылъёссы, Зульфияен Лидия, Качкин-Турайын вордскизы ни. Назия апаен Салимзян агай асьсэлэсь куинь нылпизэс сяна, агайзылэсь кык нылпиоссэ утизы. Пенсие потытозязы кыкназы но фермаын тыршизы, кык корка вутӥзы. Али кыкназы гинэ уло ке но, пӧртэм интыосын улӥсь нылпиоссы котькуд нунал сюлмазы, вераськоназы. Бускель Бадӟым Качак гуртын улӥсь Лидазы ӵем вуылэ анай-атайзэ эскерыны, эмъюм вае, сиён-юон, корка котырысь чыры-пыры ужъёссэс лэсьтыса кельтэ. Шайматовъёс асьсэос но пересьмонлы сётскыны уг малпало, асьсэлэсь мӧйы ӵыжы-выжыоссы сярысь сюлмасько. Ӵапак ми ветлыку Алтауысь пересь апайзэс чакланы мыныны дасясько вал.

Баутдиновъёс

Гуртысь интеллигентъёс. Тазьы шуысал 50 ар улон кузя ӵош вамышъясь Павел Сайфутдинович но Рауза Салиховна Баутдиновъёс сярысь. Али соос шыпыт гинэ кыкназы, ог-огзылэсь тазалыксэс чакласа уло, быгатэмзыя юрт котыразы бергало. «Семьяысь шудбур но яратон медаз ыше шуыса, кызьы улоно?» - юай кузпалъёслэсь. Соос таӵе валэктон сётӥзы: «Йыр быдӟа сюлэм луыны кулэ; куатаськоно ӧвӧл; ог-огдэ утёно, ог-огедлы ярано. Улон - со праздник ӧвӧл. Ческытэз но, курытэз но, чырсэз но вань…»

Школазэ йылпумъям Павел Баутдинов азьпал улонзэ гурт удысэн герӟаны, Ижевскын сельхозинститутын дышетскыны малпа вал. Улон ас сяменыз кариз. Комбайнёрлэн юрттӥсез луыса ужась егит пилы бускель Бурай ёросысь ӟуч Александровка гуртысь начальной школае директор луыса мыныны ӵекто. Озьы егит пи дышетон удысэ вамыштэ, пичильтыкъёслы тодон-валан сётыны кутске.

Валамон ини, ӝытъёсы егит пилы мӧзмыт. Ас ёросъёссэ утчаса, со вить иськем палэнэ интыяськем Байшады гуртэ ветлыны кутске. Отысен ик Раузазэ (Павел агай сое Роза гинэ шуэ) пумита.

Кызьы вылэм азьло? Кыӵе ке ныл кельше ке, ӝыт шудонысен нылэн кызьы ке но вераськыны кутсконо. Павеллы со пумысен кема сюлмаськоно луымтэ, Раузалы сабырлы удмурт пи кельшем. Куинь толэзьскын ог-огзэс ӟечгес тодыса, егитъёс кузпалъясько. Со 1968-тӥ ар вылэм. Вуоно дышетскон арын кузпалъёсты Мамады школае лэзё, вить ар ӵоже кыкназы но пичи нылпиосты дышето. Павел Сайфутдинович заочно амалэн Дуванысь гурт хозяйствоя техникумын зоотехниклы дышетске. Озьы гурт удысъя ӧнерчи луон мылкыдыз быдэсме.

Качкин-Турай гуртэ улыны интыяськыса, Павел Сайфутдинович нырысь библиотекаын ужа. Рауза Салиховна нылпиослы тодон-валан сётон удысын тырше. Дас сизьым арзэ со та ужезлы сӥзиз. Бӧрысь школаысь кошкиз: вылӥ тодон-валанэз ӧй вал, нылпиосты будэтоно, хозяйствоез учконо, пудо утьытэк но ӧз улэ. Кузпалыз ужысьтыз уг ик ваньмылы вал уго. Со «Красная Звезда» (бӧрысь «Кизили») хозяйствоын профкомлэн мозмытэм кивалтӥсез, экономист, кема аръёс ӵоже Качкин-Турайын бригадир вал. Али но хозяйстволэн улонэныз тунсыкъяське. Павел Сайфутдинович – ужысь ветеран, ужамез трос пол данъян гожтэтъёсын пусъемын.

Баутдиновъёслэн Лариса, Эльза, Лира нылъёссы Сарапул городын уло. Ӵужанай-ӵужатайзы доры ньыль внукъёссы, внучказы, кык правнучказы шумпотыса берто. «Соос понна тыршиськом, быгатэммыя кӧня ке муш но утиськом», - шуо мӧйы кузпалъёс.

Ахметшинъёс.

Елизавета Шайсламовна но Раким Бакирбаевич Ахметшинъёс 51 ар улонлэсь кузьытсэ-шӧгзэ, ческытсэ-кӧшсэ ӵош веръяло. Соос туала куронъёсын лэсьтэм выль юртын Лаврентий пизылэн семьяеныз уло. Шулдыр коркан милемыз нырысь кензы пумитаз. Юлиана Балтач ёросысь Асавка гуртысь вылэм. «Юон вуэд кытын, отчы ик вуттэ улон», - вера со. Нош кызьы меда Янаул ёросысь Наняды гуртын будэм ныл Ахметшинъёслэн семьяязы шедем? Вераськонэ итӥське соку гинэ дораз пырем анайзы Лиза апай: «Ми анайлэн кык нылъёсыз вал. Апае татчы бызиз. Куное ветлыку ик Ракимен тодматским». Кузпалъёслэн кыкназылэн но пичи дырзы быдӟым атыкай ож бере тупа. Улон огзылы но капчиен сётскымтэ. Кыкназы ик вазь быдэ вуоно луизы: сютэм улонэз но шӧмъязы, семья сярысь сюлмаськон но пичи дырысен ик йӧтӥз.

Раким агай сизьым аресаз атайтэк кыле. Трос нылпиё семьялы бадӟым шуккет луэ со. Быдэ вуыса, егит пи Николо-Берёзовкаысь СПТУ-ын шофёрлы дышетске. Дышетскемзэ армиын руль сьӧрын волятэ, отын со командирзэ нуллэ. Озьы шофёр ужез Раким Бакирбаевич быдэс улонэзлы профессия каре, бригадирын ке но ужаз, «мынам уж ӧвӧл та» шуыса, берен руль сьӧры пуксе. Ньыльдон ар ӵоже «Красная Звезда» хозяйствоын ужатозяз со кӧня иськем сюрес ортчиз меда? Кытчы гинэ ӧз вуы. Алигес со водительской удостоверенизэ воштыны ветлӥз. Арлыдыз бадӟым шуиллямтэ, «В» категоризэ воштӥллям. «Бадӟым машинаен ветлыны тырмоз, капчи машинаен ветлыны мед быгато ай», - шуэ 74 аресъем Раким агай.

Лиза 4-тӥ класс бере ик колхозэ ужаны потаны кутске, чипы уте. Со вакыт огшорем нянь тыр ужамед но чотын вылэм уго. Аткайзы семьяысьтызы кошкыкуз, пичи ныллы кык арес гинэ вылэм ай. Нош пу вайыкуз вал уробо улэ пачкам анаез пыраклы инвалид кыльыса, рос-прос ужаны быгатымтэ ни. Апаен дыдыос гужем каникулъёсы ноку но ужатэк ӧз кыле. Ужамзылы маке сёто ке, кыӵе шумпотон луэ вал со тырмытытэк улӥсь семьялы. Школа бере егит ныл Вараш фермаын скал кыскиз. Качкин-Турае вылькенак луыса лыктэм бераз ӵапак та гуртэ выль ферма вутӥзы. Лиза апай нош скал кыскон ужзэ азинтӥз, берло кунян но утиз, колхозын пӧртэм ужъёс быдэсъяз. Аслэсьтыз анкайзэ но ачиз утиз. Берло пересь кышномурт костыльтэк ветлэм ни, нылпиоссэ ужысь сиён пӧзьтыса возьмалоз вылэм.

Ахметшинъёс кык ныл но кык пи будэтӥзы. Быгатэмзыя анаен атай соослы али но юрттӥсько, ваньзы сярысь сюлмасько. Раким агаен Лиза апай улытозязы 4 корка вутӥллям. Огзэ ӝутӥзы пизылы, асьсэ вӧзыгес ик. Отчы яна потэм пизылэсь пудозэ но ӵемысь асьсэос утё. Пиосмуртъёслы гуртын уж ӧвӧл бере, палэнын ветлоно луо. Краснохолмской посёлоке бызем нылзылэн пиез но ӵужай-ӵужатай доры ӵем вуылэ. Та нуналэ соослэн тямыс внукъёссы, ньыль правнуксы ини. «Нылпиосмылэн тазалыксы мед луоз шуыса куриськиськом», - верало мӧйы кузпалъёс.

Та шудо коркан одӥг липет улын куинь поколение улэ. Лиза апай но Раким агай куспазы но, нылпиосынызы но огкылысь уло. Лиза апай коркась кышнопалан кузёяське, дорысьёссэ ческыт пыжиськемъёсыныз шумпоттэ. Юлиана анайзылы юрттӥське, куинь пиоссэ уте. Раким Бакирбаевич али муш утёнэн выре, Лаврентий пиезлы сӥль басьтон-вузан ужаз юрттэт сётэ.

Йылпумъян интые

Куинь семья. Куинь огазеяськем сюресъёс. Ӵош лэсьтэм улонзы, дорзы - асьсэлэн пичи дуннезы. Котькудӥзлэн шудэз кема-кема аръёс мед кыстӥськоз на.

Анна БАЙДУЛЛИНА.

Калтасы ёрос.