-23 °С
Яркыт
Антитеррор
Вань иворъёс
Общество
16 январь 2019, 13:51

Тупаса улон - бадӟым шуд

Мынам вераме потэ кузпалылэн анаез Адия Гатиуловна Нурокова сярысь. Со 1934-тӥ арын 2-тӥ гудырикошконэ Янаул ёросысь Наняды гуртын вордӥськемын. Атаез Гатиулла «Партизан» колхозэн кивалтэм. Со дыре Нанядыын нимысьтыз колхоз вылэм. Гурт калык туж тупаса улэм. Котькин ас ужзэ тыршыса быдэсъям. Кивалтӥсьлэн но ужасьёслэн тыршись луэменызы, гурт секыт аръёсты но вормыса потэм.

Быдӟым Атыкай ож кутскем. Пиосмуртъёсты фронтэ басьтӥллям. Адиялэн атаез но соос пӧлын луэм. Гуртын ужась киос тырмымтэен, нылпиос но колхозэ ужаны поталлям. Тямыс аресъем Адиялы война аръёслэсь секытлыкъёссэ ныпъяно луэм. Бадӟымъёслы юрттыса, тӥр кутыса нюлэс кораны но ветлэм. Со улонлэсь кезьытсэ но, курытсэ но, сютэмлыкез но адӟем.
Война йылпумъяськем. Адия гуртысьтызы ик Шайдиярен эшъяськем. Егит пилэн анай-атаез вылымтэ. Сое кулэм агаезлэн кышноез Бибизиян утьыса будэтэм. Шайдиярлэн кык агайёсыз но, Шарипен Нури, войнаын бырыны шедиллям. Соос лётчик-истребитель вылӥллям.
Шайдияр но Адия ог-огзылы синмаськиллям, ог-огзэс яратыса, семья кылдытӥллям. Кузпалъёс вить нылпилы улон кузьмаллям. Нуроковъёслэсь нылпиоссэс ёросамы гинэ ӧвӧл, кунгож сьӧрын но тодо. Володя, Надежда, Святослав, Николай но Леонид школаын умой дышетскиллям.
Школазэ йылпумъяса, Володя эмчи луыны малпам, Ижевскысь кун мединститутэ дышетскыны пырем. Диплом басьтэм, семья кылдытэм. Та дыре солэн кык пиосыз но ньыль внукъёсыз вань. Кызь ар ӵоже со железнодорожной эмъюртын, дас ар Прогресс ёрос эмъюртын валтӥсь врач луыса ужаз. Али со - Янаул ёрос эмъюртын эндокринолог, вылӥ квалификационной категориен эмчи. Висисьёсыз Владимир Шайдияровичез гажало, солэсь ужзэ вылӥ дунъяло. Владимир Нуроковлэсь усто ӧнерчи луэмзэ люкаськем Данъян грамотаосыз, дипломъёсыз но возьмато. Солэн Горьковской чугун сюреслэн зарни именной часъёсыз но вань.
Святослав но агаезлэн пытьыетӥз ик вамыштӥз. Жаляса верано, туннэ со пӧламы ӧвӧл ни. Улонысь вазь кошкиз ке но, быръем удысаз со трос пайдаё ужъёс лэсьтыны вуиз: Казахстанын Нуроков нимо частной клиникаен кивалтӥз, общей практикая эмчи луиз, медицина наукая доктор вал, Америкаысь Эмчиослэн ассоциацизылэн, инфекционной висёнъёсты эскеронъя обществолэн, мус висёнъёсты эскеронъя ассоциацилэн, Европаысь Мусэз эскеронъя ассоциацилэн, Россиысь Мусэз эскеронъя обществолэн ёзчиез луиз. Та дыре клиникаеныз кузпалыз Елена Вениаминовна кивалтэ. Солы нылпиосыз юртто: Ольга нылыз Саид кузпалыныз (соослэн 4 нылпиоссы), Игорь пиез но Алина нылыз.
Мынам кузпалылэн анаез но атаез 34 ар ӵош улӥзы. Жаль, яратоно но гажано Шайдияр Шаймокович улонысь вазен кошкиз. Али ми куиньнамы улӥськом: кузпалы Николай, мон но Адия анаймы. Милям пиосмы школазэс, ВУЗ-ъёсын дышетсконзэс йылпумъяса, пӧртэм интыосын ужало ни. Ми доры куное бертыло. Малпасько, Адия анаймы секытлыкъёсты адӟем ке но, туннэ со шудо, дыр. Нылпиостэ, внукъёстэ адӟон, тупаса улон – со ачиз бадӟым шуд.
Светлана НУРОКОВА.
Янаул ёросысь Наняды гурт.
Читайте нас в