-18 °С
Салкым
Антитеррор
Вань иворъёс
Общество
16 январь 2019, 13:44

Дасьсэ возьмаса уг уло

Татышлы ёросысь Юда гуртын улӥсь Гайният Миллиятович но Наталья Халимовна Зариповъёс кыкназы ик пенсиын шутэтскон аресэ вуэмын ни. Но Наталья апай гинэ дораз «ял каре». Гайният агай дышем уженыз люкиськыны уг быгаты на.

Быдэс улонзэ гурт удыслы сӥзьыса, со азьвыл «Октябрь» хозяйствоын, али Р. Балагутдиновалэн КФХ-яз тырше. Сабырлы, ужзэ интыяз вуттыса лэсьтӥсь пиосмуртэ котьку но дунъязы. «Гуртын улэм но ужам бере, ваньзэ быгатыны кулэ. Коникын но ужай, тракторист но луи, берло строительной бригадалэн бригадирез луи. Кытын уж уг мыны, отчы лэзё вал, - тодаз вае Гайният агай. – Тазалыкелы уг ӝожтӥськиськы, соин дорын пукеме уг поты. Быгатыку ужало». Соос, ньыль-вить кузя кибашлы воргоронъёс, фермаосын тупатъян ужъёсты быдэсъяло. Вераны кулэ, али хозяйствоязы куинь ферма лыдъяське. Куке но Юда гуртын ёросын азьмынӥсь парсь ферма вань вал. Али отын кунян утё. Соосты кунян вайытозязы возё, йӧл сётыны кутскем ветылъёсты Беляшысь но Бадряшысь фермаосы келяло.
Наталья апай витьтон вить аресаз вуытозь парсь утись, скал кыскись, осеменатор, вуко изӥсь луыса ужаз. Али но со ужтэк улыны уг чида. Дор котырын ужъёс ӧжыт ӧвӧл ук: пудоосты утялтоно, Гайниятсэ ческыт сиёнэн возьмано, бакча беразы нюлэскы узы-борылы потано. Наталья Халимовна - семьязылэн учётчикез, шуыны луоз. Ку скалзы кунияны кулэ, ку туганъёссылэн вордскем нуналъёссы, кӧня ар ӵошен уло но мукет со выллем лыдпусъёсты арлыдо кышномурт умой тодэ. Малы ке шуоно Наталья апайлэн нимысьтыз тетрадез вань, отчы со лыдпусъёсыз пусъе.
Зариповъёс доры ветлыку, «День сыновей» тупаз. Наталья апаен Гайният агайлэн но кык пиоссы. Соос сярысь веракузы, анай-атайлэн ымныръёссы шумпотонэн но данъяськонэн пачылмо. Лёня но Алёша кыкназы но семьяосынызы Пермь шаерысь Чернушка городын уло но ужало. Песятаен песяйлэн куинь внукъёссы. Соос ӵем бертыло гуртазы, кенъёссы но Татышлы ёросысь удмурт гуртъёсысь уго.
Юда гуртын улӥсьёс котьку трос пудо вордо. Зариповъёс но, куинь кунян будэтыса, сӥльзэ вузаса уксё каро вал. Скал но одӥг гинэ уг вордо вал. Али одӥгез но тырмоз, шуо. Со сяна, арлы быдэ ӟазег, бройлер басьто. Пиоссылы но сӥлен юрттӥсько.
Одӥгез гинэ сюлэмшугъяськытэ юдаосты: коркаосазы чагыр эстӥськон пыремын ӧвӧл на. Озьы ке но соос улонзылы уг ӝожтӥсько, нюлэскы мыно но пу дасяло. Дасьсэ возьмаса уг уло.
Анна БАЙДУЛЛИНА.