Вань иворъёс
Общество
6 декабрь 2018, 16:46

МОН ЭРВЕЛМАРИ!

Надежда Имаева егит пор активист но кылбурчи удмурт кылэз дышетэменыз тодмо луиз. Ижын улыку со мыло-кыдо удмурт кыллы дышетскиз, удмурт ужрадъёсы ветлӥз, «Ӱжара» пор командаен «ТодМа» визьбур шудонын вормиз. Надежда пор кылбуретлы сӥзем бам бордын ужа, ачиз кылбура, финн но пор кылъёсысь фитонимъёс эскере.

— Надя, кин тӥ луиськоды? Кытысь потӥськоды?
— Мынам нимы Имаева Надежда. Мон эрвел мари (ӵукпал пор). Вордскемын Башкортстан Элькунысь Мишкино ёросысь Шаде Шогертен (Новоключево) гуртын. Школаез быдтэм берам, Благовещенскысь педагогика колледже дышетскыны пыри. Отысен финн-угор кылъёсын тодматскыны кутскеменым, Йошкар-Олае, пор шоркаре, тодонме муромытон понна выжыны малпай. Мынам куинь ӧре вал – ӟуч кылэз дышетон, истори яке пор кылэз дышетон, нош мон аслэсьтымзэ бырйи – анай кылме, анай культураме. Со вакытэ мынам финн-угор эшъёсы вал ини, со но мынэсьтым быръемме золомытӥз. Таӵе быръеме жаль уг поты. Йошкар-Олаын мон Мари Элькунысь кун университетысь Йӧскалык культура но культуракуспо кусыпъёсын институтын дышетскисько. Анай кыл но кунгожсьӧр кыл (англи/финн) программаын дышетскисько.
— Одӥг но ӝыны толэзь ӵоже Ижкарын Удмурт университетын дышетскыса улӥды. Мае Ижкарысь адӟиды? Мар кельшиз?
— Зэм, монэ огдышетскисеным ӵош студентъёсын воштӥськон программа пыр Ижкаре келязы вал. Удмурт шаер – Брангурт песянайёслэн дорзы! Кызьы бен отчы уд мыны! Ижкар – бадӟым, туала, индустриё кар. Арысь аре со умоя. Ваньмызлэсь золгес Иж тыметлэн ярдурез яраз. Нош самой ярдураз «Ижкарысь валатонъёс» ульча-арт галерея. Со ӵыж выль мар ке! Таӵезэ адӟылэме ӧвӧл на ай! Туж тунсыко сюжетъёс. Ваньдылы сое учкыны дэмласько. Удмурт кун университетысь Финн-угор тодос но журналистика институтын дышетски. Отын мон удмурт кыллы дышетски но удмурт студентъёсын удмурт сямен вераськыны турски, со сюлмам зол пыӵаз. Вань удмурт адямиосын удмурт сямен вераськыны тырши. Со туж пайдаё практика вал.
— Удмурт егит активистъёсын тодматскыны пишмиз-а тӥляд?
— Бен! Мон ВКысь «Почеламут сем» нимо пор кылбуретлы сӥзем огинэз нуисько, со уже сэрен мон кемалась ини «Удмурт кылбурчиысь» Богдан Анфиногеновез тодӥсько вал, нош табере улэпкын соин тодматским. Со сяна, Алина Чернова «Шунды» огазеяськонлэн тӧроеныз тодматски, мукет «Шунды» мылкыдчиосын ӵош дышетским но. Оглом вераса, удмурт котыретын гинэ вал мон. Ӵапак со понна Иже мынӥ – удмуртъёслэсь дуннезэс валан понна.
— Удмурт культура кыӵе тӥледлы потӥз? Ижез Йошкар-Олаен ӵошатоно ке, кудаз интыысь культуралэн шӧмыз золгес шодӥське?
— Мыным йӧтэ, удмурт культура туалагес. Со егитъёслыгес! Крезьгур удыс шоры учконо ке, шуом, Silent Woo Goore-ды вань. Удмурт дизайн вань, туала удмурт кино вань. Удмурт нылашъёс мыло-кыдо чыртывесь нулло. Йошкар-Олаен ӵошатоно ке, Ижын удмурт культура ӵемгес пумиськылэ кадь.
— Удмуртиын мар паймытӥз? Маин удмуртъёс абдратӥзы?
— Оглом шуысал, удмурт егитъёс абдратӥзы. Соос туж мыло-кыдоесь, удмурт сямен вераськыны уг возьдасько. Тазьы мон адӟи. Соос шоры учкыса, аслам но удмурт сямен вераськеме потӥз. Нош мукет сямен учконо ке, номыр абдрамонэз ӧй вал. Соос кадесь. Удмурт Шаере бӧлякъёсы доры кадь вуи. Таӵе ик финн-угоръёс. Зэмзэ вераса, синйылтӥ, тросэз удмурт горд йырсиё шуыса. Со туж но туж аспӧртэм!
— Маин удмурт культура пор культурадылы укша?
— Асьсэос удмуртъёс, вырон сямъёссы, вераськон сямъёссы поръёслэнэзлы туж укшало. Удмурт калык эктонъёс но поръёслэн кадесь. Нош «Кече лектеш, ончалеш» пор кырӟанлэн удмурт сузэрез вань – Татьяна Ишматовалэн «Шунды потоз» нимо кырӟанэз. Табере кыкназэ ик кылзӥсько. Валлё удмурт юлтошъёс пор эшъёсынызы тросгес валче ужаллям, пор кырӟанъёс удмурт кылын но удмурт кырӟанъёс пор кылын проект мытыны мылкыдзы вылэм.
— Малы удмурт кылэз дышетыны кутскиды? Мар удмурт кылын тӥледлы секыт усе?
— Бен, алигес мон кутски дышетыны удмурт кылэз! Малы ке шуоно мыным тунсыко удмурт кыл (ачиз озьы гожтэм — ред.). Удмурт – со ӵыжы-выжы кыл, финн-угор кылтодосэн вырисько бере, со мыным туж пайдаё луоз.
Вылӥ верам сяна, выжы калыкъёслэсь кылзэс дышетон ӧтёнэ (IndigenousLanguageChallenge 2019) пыриськисько, монэ отчы Артём Малых МАФУНлэн вице-президентэз чортӥз.
Удмурт грамматика мыным туж валамон потэ, порэзлы со туж укша. Кылкарон кыктэтӥ интыын, милям но озьы ик. Шуом, «кин» со асьме кӧ, «мар» – мо, «малы» – молан, «ку» – кунам. Нош молан манаш гын - «малы ке шуоно».
— Тӥ «Почеламут сем» пор поэзилы сӥзем бам бордын ужаськоды. Кызьы но мар муген та уж борды басьтӥськиды?
— Йошкар-Олае дышетсконэ вуыса, пор егитъёс пӧлын пор кылбуретэз вӧлмытыны кулэ шуыса валай. Пор егитъёс пор кылын поэзиен уг тунсыкъясько вал, тросгес саклык ӟучезлы висъяса уло вал. Вотэсысь пор кылбуръёс со вакытэ шедьтыны шуг вал. Мынам таӵе юанэ кылдӥз: «малы сомында ӟуч кылъем поэзилы сӥзем сайтъёс, пабликъёс вань, нош порэзлы одӥгез но ӧвӧл?» Ӵапак со дырысен та ужен ачим вырыны ӧдъяй. Соку мукет финн-угор калыкъёслэн таӵе ик темаослы сӥзем бамъёссы вань шуыса ӧй тодылы. Нялтас вераса, «Удмурт кылбурчи» нырысетӥез кылдэм.
Кылбуръёс пыр пор гожъяськон кылмылы популяризация карисько, иське. Нош йӧскалык кыл кылдонын гожъяськон нормалэн юнмамез со туж кулэ луись мар ке.
…Пор егитъёслы пор кылъем проза чик но тунсыко ӧвӧл. Соос эсьмаса Харуки Муракамиез я Пауло Коэльоэз лыдӟозы, нош асьмелэсьсэ лыдӟыны уг но малпало
— Кызьы лыдзисьёсты нуэм ужды шоры учко? Зэм-а вераны, ужамдылы тау карыса адямиос пор поэзиен золгес тунсыкъяськыны кутскизы шуыса?
— Сю процентлы шонер, тунсыксы йылӥз. Бамысьтым трос репост лэсьтэмзэс ас синмыным адӟисько. Мон сое ваньзэ чакласько, дыр ортчемен валасько ини, кудӥз кылбур аудиториелы золгес яраськоз. Актуаль темаослы кылбуръёс шедьтыны турттӥсько. Огинын ужаме понна трос тау шуонъёс мон доры вуо. Со ужме азьланьтыны мылкыд но кужым сётэ. Али огинам 3301 пыриськись, со монэ туж шумпотытэ!
— Финн-угор егитъёслэн тулкымзылы мае уг тырмы?
— Эшшо тросгес егит адями та тулкыме мед пыриськысал.
Артем Малых