Киосыз шудыса кадь ужало

Анатолий Ахметвалиевич Ахметхановлэн коркаез тымет шоры учке. Капка азяз вуыса, чебер инкуазь суредэз учкыса пукем ик потэ. Кузё пиосмурт, оло, со понна ик капка азяз чебермаса лэсьтэм скамья пуктэм. Со вӧзын ик – сыӵе ик чебер ӟечыран. Азбарын но кибашлы воргоронлэн ки бервылъёсыз шӧдӥсько. Нош укно наличникъёс, янакъёс кӧня со лэсьтӥз! Лыдъяса быдтонтэм.

Пичи дырысен муш бакчаын ужась атаез сьӧры ветлӥсь пияш соку ик ужаны дышыса будэм. Муш уморто, рамкаос лэсьтыкузы но учкыса улымтэ, маин быгатэм - юрттӥськем.

Электриклы дышетскыса, армиын службазэ ортчытыса, егит пи 1973-тӥ арын, сабантуй дыръя, аслыз пӧрась вае, велосипедэ пуктыса. Вот. Ошьяысь Мавлидаен соос Варяшбаш школаын ӵош одӥг классын дышетскиллям. Нырысь егит кузпалъёс пичи гинэ коркан сизьым кузя улӥллям. Выль ӟенгайлэн но кузпалызлэн улоназы трос шуг-секытъёс пумиськизы ке но, семьязэс но кусыпсэс номыр ӧз сӧры. Со дырысен 45 сабантуй ортчем ини.

Ахметхановъёс Тат. Урадае яна потӥллям, дас вить арскын нош улон интызэс воштоно луо, берен Вот. Урадае берытско. Мавлида апай 26 ар скал кыскиз, гуртазы Янаулысь почтаез нуллӥз. Анатолий Ахметвалиевич пичи дырызлэсь тунсыкъяськонзэ – муш утёнэз – аслыз профессия кариз, аткаеныз ӵош соос 14 ар муш утизы, пенсие потытозяз но муш бакчаын тыршиз. Та ужзэ вискатыса, фермаен кивалтӥз, газовик луыса ветлӥз. Нылпиоссэс будэтӥзы, пудотэк, муштэк но ӧз улэ кузпалъёс. Анатолий агай но Мавлида апай куинь ар арлыдо атайзэс утялтыса возизы.

Ахметхановъёслэн выжыысьтызы пиосмуртъёс ваньзы кибашлыесь луиллям. Анатолий агайлэн Андрей но Костя пиосыз но атайзылэсь бере уг кылё, котьма лэсьтыны устоесь. Соос кыкназы но семьяосынызы Нефтекамск но Янаул городъёсын уло, Анелия нылзы - семьяеныз Нократ гуртын.

Толя агай дораз ке луэ, вить минут но ужтэк улыны уг чида: яке уморто лэсьтоз, яке мушъёссэ учкоз, яке кинлы ке заказзэс вуттыны тыршоз. Кибашлы пиосмуртлы котьма лэсьтыны курыса вазисько угось, тазалыкез гинэ мед тырмоз.

Анна БАЙДУЛЛИНА.

Янаул ёрос.