-14 °С
Лымы
Антитеррор
Вань иворъёс
Общество
23 ноябрь 2018, 13:55

Егит пилы кышнолы лушказы но...

Янаул ёросысь Вот. Ошьяысь Салима Дмитриевна Можга гуртэ 1962-тӥ арын вуэм. «Можгае куное лыктӥ но лушкаса кельтӥзы. Шайхаттарен тодмо но ӧй вал. Бертыны туртто вал но, атай мыным эмеспи кельшиз шуиз. Аслам ӟегыт армиын вал», - гуртэ вуэмез сярысь вера Салима апай.

Вордӥськем гуртысьтыз школаын солы сизьым ар гинэ дышетскыны кылдэм - фермае ужаны вамыштэм. Нырысь парсь утем, собере скал кыскыны кутскем. «Киын 23 скал кыскылӥмы. Тыл ӧй вал соку, лампуэн ужамы, - вера кышномурт. – Татчы лыктэм бере но скал кыскисьын тырши. Трос йӧл кыскиськомы вал. Колхоз котьку азьветлӥсьёслэн радазы луылӥз. Пенсие потытозь скал кыски», - вера Салима апай. Солэсь тыршемзэ вылӥ дунъяллязы. Со сяна, Салима Дмитриевналы общественной ужез но ныпъяно луиз. Вот. Ошьяын сое кык пол сельсоветэ депутатлы бырйылӥзы, нош Можгае вуыса кык пол ёрос Кенешлэн депутатэз луиз.
Шайхаттар Мулыевич атаезлэсь мытэм сюрессэ азинтэм. Со пудо эмъясь вал. «Атай ветеринар луыса тыршиз. Со котькуд ортчем нуналзэ книгаяз гожъяса мынылӥз. Изьыкуз пыдысьтыз кутсэ но уз кушты вал, - вера куамын куинь ар пудо эмъясьын тыршем Шайхаттар агай. - Семьяямы ми сизьым нылпи будӥмы. Война кутскыку ньыль арес кыли. Пичи дыръя сютэмлыкез адӟим». Шайхаттар агай доры али но гуртооссы пудозы висьыны усьыку юрттэт, кенеш курыса одӥг-ог вазисько. «Укол пуктыны быгатӥсько. Пудоез кутыны кужым гинэ ӧвӧл ни», - вера со. Озьы ке но Шайхаттар агайлэсь куасэн ветлэмзэ но, велосипедэн шаплы ширтэмзэ но пумиталод на.
Тямыстон одӥг арессэ тырмем Шайхаттар Мулыевич нуналлы быдэ нуналлэсь кызьы ортчемзэ, куазьлэсь кыӵе луэмзэ, тылобурдоос, пудоос но мукетыз сярысь гожъяса кельтэ. «Висъетаз пыре но, гожъяське но гожъяське, - вера Салима апай. – Кузпалыным ми куинь нылпи будэтӥм. Соосты утялтыны кузпалылэн анаез юрттӥз. Фермае уйин дежурить карыны мыныку но нылпиосмы анкаймы вылэ кыльылӥзы. Нонӥсь нылпимес но утёз вал. Али соослэн асьсэлэн семьяоссы вань ни. Роман пимы Шудекын улэ. Со тылпу кыскон удысын тырше. Эльза нылмы Норканэ бызьыса, али Екатеринбургын улэ. Медсестра луыса ужа, кык нылъёссы. Али Рамиль пимылэн семьяеныз ӵош улӥськом. Кенмы милям Балтач ёросысь Асавка гуртысь». «Рамилен ми «Ошмес» газетысь «Тодматскон сэрег» пыр тодматским», - вераськонамы пыриське Вилена.
Хазиповъёс ог-огенызы огкылысь уло. Салима апай но Шайхаттар агай нылпиоссылы быгатэмзыя юрттыны тыршо. Гужем соос кыре емышъёс бичаны ветло, турын, пу дасяло. Ужакузы котьку азьветлӥсьёслэн радазы луэм кузпалъёслэн доразы пукыны сюлэмзы уг чида. Вераны кулэ, Салима Дмитриевна Эшъяськон орденэн но мукет трос медальёсын но гадьпусъёсын пусъемын, Шайхаттар Мулыевич – Башкир АССР-ысь сӥё-дано пудо утись.
Марина НИКОЛАЕВА.
Янаул ёрос.