Гурт данъяське чебересь семьяосыныз

Соос пӧлын луизы 60 ар ӵоже ӵош улэм Фазила но Хаким Туктакиевъёс. Хаким агай кема аръёс ӵоже электрикын тыршем. Куазьлэн котькыӵе вакытаз уждураз луэм, гуртоосыз тылтэк медаз улэ шуыса сюлмаськылэм. Фазила апай кыӵе гинэ уже басьтӥськылэм, котькудзэ йылаз-пумаз вуттыса быдэсъям. Кырысь емышъёс, узы-борыос бичаны яратылэм. Хаким агайлы мушъёс котырын берганы кельшем. Кузпалъёс ньыль визьмоесь нылпиос будэтӥллям. Али соос Рафит пизылэн семьяеныз уло. Ужрадын но Хаким агай ужамез сярысь вакчияк мадиз, нош Фазила апай учкисьёслы кырӟанзэ кузьмаз. Кузпалъёслы Балтач ёрос администрациен кивалтӥсьлэн социальной ужпумъёсъя но кадръёсын ужанъя воштӥсез, гуртозы Фирдавис Рахимов Башкортостан Республикалэн кивалтэтэзлэсь но «Урал» хозяйстволэсь кузьымъёссэ сётӥз.

«Татын вордӥськи, татын ик кулэ луи, - асэныз тодматыса веранзэ кутскиз Филипп Валиахметов. - Армие ветлӥ. Собере колхозын трактористын, плотникын, фермаын ужай. Али пенсиын». Венера кузпалыныз соос улон сюрестӥ 40 ар ӵошен вамышто. Куинь нылпиоссэс пыд йылазы султытӥзы. Филипп агай кылбуръёс лыдӟыны яратэ на вылэм. Та ӝытэ но со огзэ учкытэк вераз.

Рубин сюанзэс пусйизы Наталия но Фаиз Шайхаттаровъёс но. Соос ог-огзылы юн пыкъет луыса, гурт удысын тыршыса куинь нылпиоссэс будэтӥзы. Шуг-секытъёслы сётскытэк улон сюрестӥ йыгмыт вамышъязы. «Нылпиосты секыт будэтӥм. Магазинын вузъёс ӧй вал. Секыт ке но луиз, тыршим, - вераз Наталия апай. – Табере нылпиосмылэн асьсэлэн семьяоссы ни. Нылпиосмы но милям ньыль луизы. Эмеспимес пимес кадь адӟиськом. Азьпалан нылпиосмес, внукъёсмес шумпотыса пумитаны но келяны мед гожтоз». Ужрадэ кузпалъёслэн бускель ёросын улӥсь Олег эмеспизы но пыриськиз. Учкисьёслы со кырӟанъёссэ кузьмаз.

Рита но Фирдавис Рахимовъёслэн семья кылдытэмзы дырысен куамын ар тырмем. Кузпалъёслэн уж сюрессы гуртысьтызы школаын кутскем. Рита Радифовна али но быръем ӧнерезъя тырше. Нош Фирдавис Гайнелович – Балтач ёросысь администрациын. «Семьяямы ми тямыс нылпи будӥмы. Атаймы ёросын тыршиз. Соин трос дырмес ми анаенымы ортчытӥмы. Милям семьямы но Рита кузпалы вылын возиське. Куинь нылъёс будэтӥськом. Бадӟымез – кардиолог, кыкетӥез - юрист, пичиез но, малпасько, эмчи луоз, дыр, шуыса», - вераз Фирдавис Гайнелович.

Одӥг гуртын будэм, визьмоесь, ужез яратӥсь Альфия но Герман Минниахметовъёс шуркынмон толэзе азвесь сюанзэс пусйизы. Кыксы но сабырлы, кибашлы соос. Кузпалъёс куинь нылпиоссэс будэто. Герман Галиахметович ужрадэз дасясьёслы, ортчытӥсьёслы Гульфиза Садриевалы но Гульсира Миннигалиевалы, учкисьёслы тау кылъёссэ вераз. Семьялэн шудо луэмез ма бордын шуыса юамзылы, Альфия Петровна шуиз: «Ог-огдэ яратыса, гажаса но валаса ӵошен улон бордын».

Ужрадэз удмурт, ӟуч, бигер кырӟанъёсын Лидия Пукрокова, Миннур Вильданова, Ильвина но Ильмира Рахимоваос, Лейсан Ахунова но мукетъёс шулдыртӥзы.

«Данъяськиськомы, гуртамы таӵе чебересь, синмаськымонэсь, адӟем карымонэсь семьяосмы вань шуыса. Дыр шедьтыса ужрадэ лыктэмзылы, пыриськемзылы тау кылъёсме верасько», - вераз гуртысь модельной библиотекаен кивалтӥсь, ужрадэз дасясь Гульфиза Садриева.

Марина НИКОЛАЕВА.