Ӟеч ужась, сюлмо депутат

«Огнам будӥ. Соин пичи дыръям ик тодӥсько ни вал, нылпиосы трос луозы шуыса», - шуэ Янаул ёросысь Вот-Урада гуртын улӥсь вить нылпиослэн анайзы, дас кык нунокъёсызлэн песяй-ӵужайзы Ольга Хузина. Ольга Каримовналэн уж сюресэз гурт хозяйствоын ортчем. Али со пенсиын ини. Озьы ке но 61 аресъем Оля апай шутэтскон сярысь уг малпаськы на, гурт калыкез сярысь сюлмаське. Со 40 ар пала ни Выль Артаул гурт поселенилэн кенешезлэн депутатэз луэ.

Гуртын будэм котькуд нылашлэн выллем, Ольга Каримовналэн но пичи дырыз эшъёсыныз шудыса, анай-атаезлы юрттӥськыса, школа улонэ «выйыса» ортчем. Нырысь со гуртысьтызы ньыль классъем школаын дышетскем, собере бускель Варяшбашын тодон-валан басьтэм.

Тямыс классэ йылпумъяса, нылаш «Буйский» совхозысь фермае ужаны мынэ, парсь уте, скал кыске. Чырмыт, быгатыса егит ужасез директорзы синйылтэ, мылкыдзэ юаса, совхоз стипендиатка чотын Шафрановской СПТУ-э дышетскыны лэзе. Озьы азьпал улонзэ пудо утёнэн герӟам нылаш берен ас гуртаз берытске. Пенсие потытозяз осеменатор, учётчик, бригадир, фермаен кивалтӥсь луыса ужа. Кыӵе гинэ уж солы ӧз оске, ваньзэ яратыса, интыяз вуттыса, ужасьёсыныз кенешыса лэсьтылӥз.

Кивалтыны, ас сьӧраз «кыскыны» быгатонлыксэ шӧдыса ик Ольга Хузина вылэ депутат ныпъетэз но думизы, вылды. Та ужзэ но со секыт уг шуы. Калыкен ужаны, зэмос ужъёс лэсьтыны солы эшез - гуртлэн старостаез Грета Муллаярова - юрттэ. Та кык сюлмо кышномуртъёслы гурт поселенилэн администрациеныз кивалтӥсь Инзиля Шайхутдинова но котьку юрттэт возьматэ, пе.

Ольга Каримовналэн «cизьым сельсовет кивалтӥсьёсын ужай» шуэмез ик возьматэ, кӧня аръёс ӵоже со азинлыко нуэ депутат ужзэ. Умой кылъёсын гинэ вазиське О. Хузина гуртазы улӥсьёс Дмитрий Надыршин, Денис Зайдуллин, Ильшат Хуснимарданов сярысь. Туэ ошмесэз сузянын, шай котырез тупатъянын та воргоронъёс, ужан тӥрлыкъёссэс кутыса, нырысетӥ луыса лыктӥзы гуртсы понна ӟеч уж лэсьтыны.

Кузпалэн но удалтэмын Оля апайлы. Нургали агай но гурт хозяйствоязы тракторист, сварщик луыса ужам. Пенсие потон азяз гинэ «Башвторметын» резчиклэсь ужзэ быдэсъям. Трос пудо вордыса, дорысь ужзэс валче лэсьтыса, ог-огзэс валаса уло соос. «Ужан вакытъёсы куинь скал вордэм но вань. Йӧлэз сепаратор пыр паре поттэ вал», - кузпалзэ ушъя кышномурт.

Анайлэн тужгес бадӟым данъяськонэз – нылпиосыз. Соос сярысь веракуз, Оля апайлэн синъёсыз шунытэн пачылмо. Аделя, Арсений внукъёсыз азьысьтыз ик уг кошко, «пепиказэс» туж ярато.

Хузинъёс ваньзы ӵош корка тыр люкасько ке, анай-атай вордэм нуныкайёссэс ыжпи вандыса утялто. Уг вунэты анай яратоно «таба трос» нимаськись пӧрзэс пыжыны но. Таӵе пыжиськем веръямды потэ ке, Вот-Урада гуртэ мынэ.

Анна БАЙДУЛЛИНА.

Янаул ёрос.

Читайте нас в

Учредитель: Агентство по печати и средствам массовой информации Республики Башкортостан

Регистрационный номер: Свидетельство ПИ № ТУ02-01536 от 6 июня 2016г. Главный редактор: Нигаматуллина Оля Борисовна

Газета "Ошмес" - общественно-политическая, социальная, культурно-просветительская газета удмуртов Республики Башкортостан.

Телефон

Телефон+7 (34778) 2-11-89, 2-18-71

Электронная почта

[email protected]

Адрес

452830, Республика Башкортостан, Татышлинский район, с. Верхние Татышлы, ул. Ленина, д. 91