"Вордӥськем шаер ноку уг вуны"

Со 1937-тӥ арын вордӥськем. Пичиысен трос секытлыкъёсын пумиськоно луэм. Ас сярысьтыз мадьыны кутскемезлэсь азьвыл ик, кышкыт ож аръёсты возьматӥсь суредъёс син азе пуксё. Но арлыдо песянай адӟем секытлыкъёсыз сярысь мадьыны уг дырты. «Мон анайме уг тодӥськы. Со кулыку мыным куинь арес вылэм. Сизьым аресам атайтэк кыли. Монэ агай но ӟенгай утьыса будэтӥзы. Туж тупаса, тату улӥм. Одӥг секыт кыл но ӧз вералэ. Ӟенгаелэн ӟечлыкез али но уг вуны», - вера 81 аресъем Гильнаур Шакировна.

Дас укмыс аресаз со Зилаир ёросэ вуэм. Вордӥськем палъёсызлэсь палэнэ кошкемзэ арлыдо песянай уженыз герӟа. «Целина ӝутон вакытэ та палъёсы вуи. Куамын юртысь люкаськыса татчы лыктӥм. Поездэн. Пудооссэс но вагонъёсы тырыса сьӧразы ваизы», - шуэ со.

Улон сюрес адямиез кытчы гинэ уг вутты. Зилаир ёросын улӥсь Г. Шакирова Выль Зирган гуртэ бызем. 1965-тӥ арысен арлыдо песянай Акъярын улэ. Кыӵе гинэ ужын мед ужалоз, фермаын скал кыскем-а, столовойын пӧзьтӥськем-а, эмъюртын санитаркалэсь ужзэ быдэсъям-а, Гильнаур Шакировна тыршись луэменыз висъяськем. Солэн ужезлы котьку вылӥ дунъет сёто вылэм. Ӟеч ужамез понна солы вакытаз Акъярын квартира но сётӥллям. Али Гильнаур песяй со корказ улэ.

Вордӥськем палъёсаз песянай арлы быдэ сямен вуылэ вылэм. Малы ке шуоно солэн Лидия нылыз Бадӟым Качакын улэ. Со отчы быземын. «Берло кык ар калтасы музъеме вуылыны ӧй быгаты ни. Арлыды бадӟым, тазалыке но лябомиз, - шуэ со. - Но нылыным вераськыса улӥсько. Телефон герӟа кузь кусыпмес».

Зӥбыт сямо, сабырлы. Та кылъёс Гильнаур Шакировналы тупало. Улонэзлэсь бадӟым люкетсэ со хайбулла музъемын ке но ортчытэм, вордӥськем шаерез сярысь тодаз вайыкуз, синъёссэ улэ лэзе, синкылиоссэ ватыны турттэ, лэся. «Вордӥськем шаер ноку уг вуны вылэм, пинал дырысь эшъёс но котьку малпанам уло», - шуэ арлыдо песянай.

Миляуша

НИГАМАТУЛЛИНА.

Хайбулла ёрос.