Абзи

Абзи мыным улонысьтыз трос учыръёссэ вералляз. Кыксэ тӥледлы но мадеме потэ. Азьвыл колхозъёсын сӥзьыл но тулыс трактористъёс кык сменаен ужаллязы. Одӥг сӥзьыл нуналэ абзи уйин гырыны потэм. Тупаны но кулэ – шай вӧзысь бусы сюрем. Куазь пеймыт, пилемо, пе. Шай сярысь пересьёслэн олома но кышкыт верамъёссы пичиысен ик йыре кылё. Уйшоре шай вылысь тылъёс но потало, адямиос сьӧры но уиськыны быгатыло шуыса мадемзэс абзи одӥг пол гинэ ӧз кылы. Огшоры нуналэ со тодаз но ӧз лыктылы. Нош туннэ, шай вӧзтӥ тракторен котыръяськыкуз, лобась тылъёс сярысь верамзы йырысьтыз уг кошкы ни. Мукет малпанъёсыз со зӥбе. Трактор шай пала мынэ. Абзи часэз шоры учкиз – ӵапак уйшор. Сюлэмыз золгес йыггетыны ӧдъяз кадь. Витёнтэм шорысь шай палась тыл адӟиськиз. Тракторист синъёссэ ӵушылӥз. Тыл уг ышы. Трактор пумитэ лыктэ, лэся. Ма кароно? Кабинаезлэсь ӧссэ ворсаны турттэ вал, соку ик валатскиз: соиз ӧвӧл – толон нюлэскын ужакузы писпуэ йӧтыса куажгаз, тупатъяны ӧз вутске на. Абзи тракторзэ дугдытӥз. Нош тыл вӧзаз ик матэктэ ни. «Остэ, – ас понназ сипыртӥз тракторист. – Котьмар медло». Синъёссэ кыниз. Со вакытэ абзи вылэ кин ке гоно маке тэтчиз. Сыӵе дыръя сюлмыд но кутоз, ява. Трактор кабинаысь кызьы потэмзэ но валамтэ ни абзи.

– Мар ке луиз, оло? – юась луиз. Тракторист тодмаз ӵош ужась эшсэ, соиз мотоциклэн бускель гуртэ ветлэм вылэм. Бусытӥ бертоно кариськем. Пуныез сьӧрысьтыз уг кыльы, вылды.

– Мон пуныме кабинаын ветлыны дышетӥ. Трактормес соку ик тодмаз, тӥни тэтчиз но пыриз, – вера Сабир…

Та учыръя мон «Уйшоре» нимо юмореска гожтӥ. Ӟуч кылын со Уфаысь «Вилы» журналын но печатласькиз.

Абзи нырысетӥ апреле (оштолэзе) вордӥськемын, соин но, дыр, та адямилы трос тумошо, тунсыко учыръёсын пумиськылоно луылэ. Алдаськыны но, муртъёсты серекъятыны но быгатэ.

Армиын таӵе учыр вылэм.

– Кытысь тон? - абзилэсь юам одӥг егит, ассэ олокин кожась, гуртысь вуэмъёсты ултӥяны яратӥсь пи.

– Москваысь, – шуэм абзи.

– Адрестэ вера ай.

Колхоззылэсь нимзэ тодаз вайыса, соку ик верам:

– Карл Маркс нимо урам.

Корка но квартира номеръёссэ но ивортэм. Кыӵе лыдпусъёс йыраз лыктӥллям, соосты ик верам.

– Тон мынам бускеле? – воксё абдрам Москваысь пи. – Малы мынам тонэ адӟеме ӧвӧл?

– Нош мон тонэ тодӥсько, – ватсам на абзие.

Тӥни озьы, огшоры адрес вераса, абзие «сюрем» егит пилэн бускеляз.

– Тон мынэсьтым адресме тодӥськод вал, дыр? – ёртэ, пе, Москваысь пи. – Кин тыныд вераз?

Та учыр бере абзиез со москвич гажаны кутскем…

Абзилэсь гор-гор серекъямзэ мынам адӟеме ик ӧвӧл кадь. Серемессэ вера ке, ваньмыз серекъяло, нош ачиз пальпотэ.

Али абзие тямыстон аресаз вамышъя. Дыртытэк. Куддыр пальпотыса. Малпаськыса но…

Ульфат

БАДРЕТДИНОВ.

Бурай ёросысь Алтау гурт.