«Кубиста ке луысал…»

Ачиз но та рецептэн туж усто пайдаяське ни ке но, ӧтем кунооссэ дышетыны лыктӥз та гуртын ик улӥсь эшез Ульяна Юшкова, кудӥзлэсь тодӥз таӵе амалэз. Кубиста, лудкеч дӥсен дӥсяськем апайёсын дасям сценарийен, кырӟанъёсын, вераськонъёсын, мастер-классэн ӝыт шулдыр но кемалы вунэнтэм пӧрмиз. У. Юшковалэн рецептэзъя, кубисталэсь кочонзэ куштыса, бадӟымесь юдэсъёслы вандылоно. 40 литръем фляга пушкы полиэтилен пакет поныса, отчы кубистамес тыриськом, вискатыса вуштэм кешырен, чеснокен, мукет ческытатӥсь макеосын. Тыраз тырем кубиста вылэ кык ведра кезьыт ву кисьтӥськом. Вылаз марля вӧлдыса, одӥг пачка сылал понӥськом. Флягаез ворсаса, кезьытгес интые пуктӥськом. Арня-дас нунал ортчыса, эскериськом кубисталэсь небӟемзэ. Сылал сылмыса бырыны кулэ. Мылкыд кареммыя, флягае инты бушам ке, нош кубиста йылтӥськом. Кирпичен зӥбытыса, гуэ пуктӥськом. Ческыт, пинь улын куажыр вазись кубиста дась луэ ог толэзьскын. Ческыт мед кошкоз!

Анна Байдулина.