-6 °С
Лымы
Антитеррор
Вань иворъёс
Общество
13 Октябрь 2018, 10:34

Гуртэн герӟаськем улон

Гурт удыс. Кин ке но солэсь туж «кыдёкын» луэ, кин ке нош вань улонзэ пудо вордонэн, бусы ужъёсын герӟа. Веранэ Татышлы ёросысь «Рассвет» СПК-ын ужась Светлана Шаймиева сярысь. Со 2004-тӥ арын «Башкортостанысь гурт удысысь сӥё-дано ужась» нимлы кузё луэмын.

Тодэ ваёнъёс
Света апаен ми - гуртоос. Соин, лэся, пумиськеммы бере ик шуиз:
- Мар выльзэ вералом меда? Мон сярысь тон ӟеч тодӥськод.
Зэм, Света апайлэн ужез, утэм вормонъёсыз сярысь трос кылэме вань. Кӧня мон сое тодӥсько, со - Улысь Балтач фермаысь одӥгез азьветлӥсь ужась.
- Школаын дышетскыкум анкета сётӥзы. Кин луон сярысь малпанэз гожтоно вал. Малпаськыса но ӧй улы, дояркалэсь ужзэ быръё шуыса гожтӥ. Школаын умой дышетски, дышетӥсьёс пӧлын вылӥ тодон-валан юртэ дышетскыны пырыны ӵектӥсьёс но луизы. Но быръем сюресэлэсь ӧй палэнскы, 1982-тӥ арын, школаез йылпумъяса, фермае ужаны мынӥ. Тямыс толэзь ӵоже Пермь шаерысь Бершетьысь техникумын лаборанткалы но йӧллы первичной обработка орчытонъя операторлы тодон-валан басьтӥ. Отысь горд дипломен берытски. 1983-тӥ арысен 2007-тӥ арозь скал кыски, - вера С. Шаймиева.
Егит ӧнерчилы уж сюрессэ кутскыны юрттӥллям азьветлӥсь скал кыскисьёс Екатерина Мухтаршина но Фания Гарифьянова.
- Азьвыл ужам аръёс чик уг вуно. Туж шулдыр ужамы. Агитбригада кылдыто вал, мон но отчы пыриськылӥ. Концертъёс но дасяллямы, - тодаз вае Света апай. Со сяна, задор кышномурт спорт ужрадъёсы но азинлыко пыриськылэм.
- Школаысен ик спортэн эшъяськи. Тужгес кельшо вал куасэн ӵошатсконъёс. Та ӧрын кӧня вормон утӥ меда? Туж трос. Огез вунонтэм кылиз: нылкышноослэн праздниксы азьын гуртын куасэн ӵошатскон радъязы. Соку мон нуны витисько вал. Озьы но ӵошатски, финише нырысетӥ вуи, - пальпотэ герое.
Вормонъёс
Вазь ӵукнаысен бер ӝытозь Света апай уж дураз ӝегатскылэ. Усто ужасьлэн нимыз азьло котьку «почёт» книгаын вылэм.
Шаймиевъёслэн доразы возиськем газетъёсты эскерисько: «Азьлань», «Ошмес», «Республика Башкортостан», «Татышлинский вестник». Ваньмаз Света апай, солэн усто ужъёсыз сярысь гожъямын. Кӧня солэн данъян грамотаосыз, дипломъёсыз? Лыдъяса но уд быдты. Соос пӧлысь тужгес дуноосыз – 1995-тӥ но 2002-тӥ аръёсын басьтэм Башкортостанысь Гурт хозяйствоя министерстволэн грамотаосыз.
Нош кӧня конкурсъёсты Света апай пыр потэм? Скал кыскисьёс пӧлын радъяськем ёрос конкурсэ со огаз но пыриськытэк кыльымтэ. Республика ужрадын кык пол вормисе потэм. Азьветлӥсьёслэн слётазы но со арлы быдэ вуылэ. Тыршись ужасьлэсь ужзэ котькин вылӥ дунъя. С. Шаймиева гурт улонэ но азинлыко пыриське.
Ужысьтыз жадьыса бертэм кышномуртлы дораз ӝог гинэ шутэтскон уг шедьы. Хозяйствоез луэм адямилэн юртъер котыраз но ужез трос луэ. Бакчае но потоно, пудоосты, чипы-курегъёсты но сюдоно, утялтоно. Но секытлыкъёслы кышномурт уг ӝожтӥськы. Берло дыре тазалыкез гинэ егит дыръяз кадь юн ӧвӧл ни, пе.
Адями шудо семьяяз
Куамын ар ӵоже ни Света апай Геннадий кузпалыныз артэ вамышъя. Ог-огзэс гажась но валась кузпалъёс доразы гинэ ӧвӧл, уж дуразы но ӵошен. Геннадий агай 1985-тӥ арысен фермаын: скал кыскись луыса но ужам, скотникын но тыршем, ошъёсты но утем, али кузпалъёс осеменаторлэсь ужзэ быдэсъяло.
- Котькыӵе ужез мед ӵектозы, быдэстыны тыршиськом. Дояркаос кыӵе ке муген уже лыктыны уг быгато ке, скал кыскисьлы «пӧрмиськом», учётчиклэн ужез но ми вылын, - вера Света апай.
Адями семьяяз шудо, шуо. Света апай но та веранлы дурбасьтэ. Кузпалъёслэн пусъемзыя, соослэн шумпотонзы – будэтэм нылпиоссы, внуксы но внучказы. Дима пизы но, Дилара нылзы но семьяосынызы уло ни, муспотон нунокъёссэс будэто.
Пизы сярысь Шаймиев кузпалъёс трос сюлмаськоно луиллям. Армиысен со «пӧсь точкае» - Чечен республикае – мыныны мылкыд карем. Солдатэз сапёръёслэн батальоназы бырйиллям. Дималэн батальонэз азе бадӟым ужпум пуктэмын вылэм: пуштӥсь арбериосты шедьтыса быдтоно. Солдатъёс котькуд нунал ӵукна ньыль часысен лымшорозь Грозный но Аргун городъёсты герӟась сюресэз эскеро вылэм. Ӝыны ар Чечняын луэмез бере, солдат Шаймиев вордскем гуртаз берытскем. Али дыре Дималы со кышкыт минутъёсыз сярысь тодаз вайыто солдат формаез но «Ветеран боевых действий» значокез. Со сяна, Шаймиевъёслэн доразы возиське Дималэн служить карем военной частьысьтыз вуэм тау карон гожтэт.
Дима Чернушка городысь «Дорос» ООО-ын, асфальтобетонной заводын ужа. Ӵош ужам эшъёсыз но, заводэн кивалтӥсь но солэн ужезлы вылӥ дунъет сёто. Уж дураз усто быгатонлыкъёссэ возьматон сяна, Дима городын радъяськись спорт ӵошатсконъёсы но мылысь-кыдысь пыриське.
- Тренировкаосы ӵем ветлэменыз, дорысьёсызлы но тырмыт дыр висъяны уг вуы, - шуэ анаез Дима сярысь. Со теннисэн, волейболэн, пе, тужгес тунсыкъяське.
- Диларамы эмъюрттэт возьматон ӧрез бырйиз. Уфаысь медколледжын дышетскиз, кык ар республиканской больницаын операционной медсестра луыса ужаз. Али со ёрос поликлиникаын тырше, - верало кузпалъёс.
«Уж улыны юрттэ»
- Азьло ужам аръёстэс туннэ уженыды ӵошатоно ке, мар верасалды? – юасько Света апайлэсь.
- Адями ужтэк улыны уг быгаты, уж улыны юрттэ. Азьлозэ туалаеныз ӵошатоно ке, азьло зэмлык валтӥсь интыын вал. Тыршыса ужась муртлэсь ужзэ тодыса дунъяллязы. Нош туннэ? - юанэн йылпумъяз веранзэ С. Шаймиева.
Келяськыкуз Света апай ватсаз на:
- Котькыӵе ужлэн но секытлыкъёсыз луо. Мыным туннэ нуналэ уж дурам туж юртто кузпалэ, азьмынӥсь скал кыскись Ильмира Гарайшина. Котькыӵе ужез оскыны луэ Геннадий Мардоковлы.