Мӧзмыкуз «Ошмесэз» лыдӟыса буйгатскем

Фатима песянай башкир гуртын улыса, удмурт кылызлэсь мӧзмемысьтыз, «Ошмес» газетлы гожтӥське вылэм. «Мынам кузпалы башкир вал. Гуртын но башкиръёс гинэ уло, нокинэн удмурт кылын уд вераськы. Мӧзмисько вал анай кылылэсь. Соин ик удмурт кылын «Ошмес» газет потэ шуыса тодэм бере, сое лыдӟыны кутски. Берло синъёсы ляб адӟо, газет лыдӟеме уг луы ни» - вера 82 аресъем песянай.

Хайбулла музъеме Фатима песянай Калтасы ёросысь Бадӟым Качакысь 1955-тӥ арын вуэм. «Егит дыръя целина ӝутыны лыктӥ, со дырысен татын улӥсько. Гумыры татын ортчиз ке но, вордӥськем палъёслэсь туж мӧзмисько. Удмуртъёсын пумиськеме-вераськеме потэ», - синвуаськыса вера Ф. Воробьёва.

Фатима песянай пӧртэм интыосын ужам. Кема аръёс ӵоже скал кыскисьын тыршем. Дас укмыс аресысеныз вордӥськем шаерысьтыз палэнэ кошкыса но, ас кылзэ вунэтымтэ. Выль Зирганысь матысьёсызлы со ӵем телефонэн жингыртэ, куное но вуылэ. Берло дыре Фатима песянай тазалыкез пумысен ӝожтӥське. Секытлыкъёсты адӟыса будэмез, сютэмлыкез, кезьытэз ас вылаз веръямез аръёс ортчыса асьсэды шӧдыто.

Миляуша БУЛАТОВА.

Хайбулла ёрос.