-15 °С
Салкым
Антитеррор
Вань иворъёс
Общество
28 Куарусён 2018, 16:24

Лыдпусъёсын герӟаськем аръёс

Валентина Айтиевалэн уж сюресэз лыдпусъёс пӧлын ортчем, шуыны луоз. Со куамын укмыс арлэсь кема бухгалтер луыса ужам.

Бадӟым Туганеево гуртын вордскыса будэм нылаш Тюльди школаез йылпумъяса, 1975-тӥ арын, Нефтекамскын бухгалтерлы тодон-валан басьтэм. Дышетскыса бертэм но Ленин нимо колхозлэн правленияз ужаны интыяськем. Дас тямыс ар ужам со та ужаз.
Уждураз ик со вуоно кузпалыныз тодматскем. Владимир Айтиевич но бухгалтер луыса ужа вылэм. Соку ик егит сюлэмъёс куспын яратон тылгизьы ӝуатскем. Соос паръяськиллям, куинь пиоссылы улон кузьмаллям.
- Колхоз таралэм бере, 1994-тӥ арын сельсоветын бухгалтер луыса ужаны кутски. 2015-тӥ арозь отын ужай. Владимирез но сельсоветэ секретаре вазизы, соглаш луиз, - вера Валентина Гарафутдиновна. – Ужын но, дорын но Владимирен ӵош луим. Пенсие потон азяз, Валя апай валтӥсь бухгалтерлэсь ужзэ нуэм.
Нылпиос таза будо ке, школаын ӟеч тодон-валанэнызы висъясько ке, анай-атай понна солэсь но бадӟым шуд ӧвӧл, дыр. Айтиевъёслэн пиоссы котьку умой дышетскиллям. Школазэс йылпумъяса, вылӥ дышетскон юртъёсы пыриллям. Куиньназы ик дышетсконзэс горд дипломъёсын йылпумъяллям.
- Алексеймы мувӧй поттон удысын ужанъя ӧнерлы дышетскиз. Али со Краснохолмскийын улэ, дышетскем ӧнерезъя ик ужа. Андреймы Уфаысь авиационной университетын дышетскиз. Отын ик инженер луыса ужа. Семьяеныз Уфаын улэ. Нош Владимир пимы Ижевскысь медакадемиын дышетскиз, Воткинскысь эмъюртын ужа, неврологияя ёзэтэн кивалтэ. Туж шумпотӥськом, пиосмы ужало шуыса. Милемыз соос ӟеч иворъёсынызы шумпоттыса уло, куное бертыло. Внукъёсмес, внучкамес чидатэк витиськом. Арлыд йылэмъя золгес валаське вылэм, нылпиос понна улӥськом шуыса, - вера анаймурт.
Айтиевъёс сад-бакча будэто, утялто, пудо вордо. «Гужем ваньмон дыр ик уг шедьы. Турынзэ дасяно, бакча уроно», - шуэ Валя апай. Нош тол ӝытъёсы со киужен вырыны яратэ. Крючокен но, венен но керттӥське. Быгатӥсь киос мар гинэ уг пӧрмытъяло! Со сяна, Валентина Гарафутдиновна сяськаос будэтыны яратэ. «Арлэн котькыӵе вакытаз со доры пыр, укно дураз – чебересь сяськаос», - вера Тамара эшез. Айтиевъёслэсь бакчазэс но пӧртэм-пӧртэм сяськаос шулдырто. Вазь тулысысен бер сӥзьылозь клумбаоссы вуюись буёлъёсын пишто.
Миляуша
НИГАМАТУЛЛИНА.
Калтасы ёрос.
Читайте нас в