-14 °С
Лымы
Антитеррор
Вань иворъёс
Общество
20 Куарусён 2018, 16:41

«Тыршид ке, котькыӵе ужез быдэстыны луэ»

Янаул ёросысь Вот-Урада гуртын улӥсь Грета Муллаяроваез гуртоосыз укмыс ар ӵоже ни старостае быръё. Калыкен огкыл шедьтыны быгатӥсь, ужез понна кыл кутӥсь кышномурт котьку гуртэз, калыкез понна ӟеч ужъёс быдэстон сярысь малпанъёсын улэ.

Грета Муллаяновна Вот-Урадаын вордӥськемын. Со ӵужай-ӵужатаеныз будэм. Варяшбаш школаын тямыс классэ йылпумъяса, Янаулысь куинетӥ номеро школаын тодон-валан басьтэм. Быдэ вуыса, егит ныл матысь адямиоссэ кельтыса палэнэ кошкыны дыртымтэ, колхозэ скал кыскыны потэм. «Ӵужаен ӵужатайме утёно вал. Кызьы арлыдо адямиосты кельтыса кошкод? Мон школаез йылпумъяку, соос пенсиын вал ини. Соин дышетскыны пырон сярысь ӧй малпаськы», - вера староста. Скал кыскисьын со 1984-тӥ арысен 2006-тӥ арозь тыршем. Солэн нимыз котьку усто ужасьёслэн нимъёссы пӧлын луэм.
2006-тӥ арысен Грета Муллаяновна гуртысьтызы клубен кивалтэ. Азьло Вот-Урадаын клубзы вуж вылэм, покчи классъем школа ворсаськем бере, клуб со юртэ выжем. Клубен кивалтӥсь гуртэз пичи, нылпиос ӧжыт шуыса уг пукы, пӧртэм ужрадъёс ортчытон сярысь малпаське. Нылпиос сяна, бадӟымъёс но, ваньмон дырзы луыку, ужрадъёсы дырто.
Вот-Урадаын нылкышноослэн фольклор ансамбльзы но кылдытэмын. «Вить-куать кузя кырӟаса ветлӥськом. Ансамбльмылэн нимыз ӧвӧл на», - шуэ Грета Муллаяновна.
1985-тӥ арысен Грета апай улон сюрессэ Анфир кузпалыныз азинтэ. Со «Агрофирма Урада» ООО-ын водитель луыса ужа. Кузпалъёслэн Артур, Марина но Мальвина нылпиоссы асьсэлэсь семьяоссэс кылдытӥллям ни. Муллаяровъёслэн вить внучкаоссы но одӥг внуксы вань. «Нылпиослэн нылпиоссылэсь будэмзэс адӟон – номырин ӵошатыны луонтэм шуд. Соосын улон шулдыр», - шуэ Грета апай.
Муллаяровъёс муш но вордо. Грета Муллаяновна пичиысен мушъёс пӧлын улэм, шуыны луоз. Солэн ӵужатаез но мушкась вылэм. Дышем ужезлэсь со али но палэнскымтэ. Матысьёссэ, кунооссэ Грета Муллаяновна котьку ческыт чечыен куноя.
Вот-Урада клубын куараос чалмыса уг уло. Гужем нылпиос, студентъёс понна ужрадъёс ортчыло. Нош толалтэ татчы арлыдоос ӵем ветло. Клубен кивалтӥсь соос понна «Ӝыт пуконъёс» радъя.
Котькыӵе гуртын выллем ик, Вот-Урадаын но улон ӧръяське. Ужрадъёс но ортчо, бадӟымесь ужъёс но быдэстӥсько. Старосталэн верамезъя, тыршид ке, котькыӵе ужез быдэстыны луэ.
- Бадӟым тау гуртоослы, ӵошен шай котырез кенерамы. Ошмесэз асьме кужымен тупатӥмы, - вера Грета Муллаяновна.
Миляуша БУЛАТОВА.