-8 °С
Лымы
Антитеррор
Вань иворъёс
Общество
20 Куарусён 2018, 16:43

Калыкез выль газет-журналъёсын шумпоттылӥзы

Гуртысь ӝыт шудон трос егитъёсты ог-огенызы тодматэ. Куд-огез татысь аслыз улон сюрестӥ вамыштыны зэмос эш шедьтэ. Алтау гуртысь Галиахмат Хазиахметов но вуоно кузпалыныз, Калтасы ёросысь Бадӟым Качакысь Мензифа апаен, клубысен тодматскем. «Мензифа гуртамы куно ныл луыса вуылэ вал. Соку ӝыт шудонын ик пумиським, - вера со. – 1959-тӥ арын паръяським».

Галиахмат агайлэн семья кылдытытозь улоназ берытсконо ке, кӧня отын сюлэмез позыртӥсез, шуг-секытэз. Сизьым аресаз со анайтэк но атайтэк кылем. «Семьяямы ми вить нылпи будӥм. 1942-тӥ арын анаймы кулӥз. Собере куать ар ортчыса атаймы но улонысь кошкиз. Ми пичиесь кылимы. Сютэмлыкез трос адӟимы. Экемы дорын дышетскиз. Школае мыныны дӥсез ӧй вал. Соин дышетӥсьёс асьсэос дорамы ветлӥзы», – пушкыз тырыса будэмез сярысь вера Галиахмат агай. Ньыль классэ быдтэм бераз колхозэ ужаны поттӥллям. Ош кыткыны кулэ вал, пе. «Вылэ дӥсяны дӥсь ӧвӧл. Кутчан но ӧвӧл, соин кут куталом вал. Нин лушкаса вайылӥм, иське, лесникъёс кутылӥзы, - вера со. – Куинь ар армиын ветлӥ. Отысь бертӥ но атайлэн ӝутэм коркаез пересьмем, сисьмем. Кузпалъяськем бере ӝутӥськыны кутским».
Мензифа апайлы Алтауэ выль кен луыса лыктыкуз 20 арес луэм. Та дырозь со вордӥськем гуртазы колхоз бакчаязы, Удмурт Элькунын чугун сюрес вылын ужаны, куиськыны, дӥськут вурылыны вутскем. Нош бызем бераз колхозын пӧртэм ужъёсты быдэсъям. «Шекар кушман ужам. Сьӧрамы нылпиосыз нуллом вал. Шутэтскон нунал ӧз сётэ», - ужан аръёссэ тодаз вайыса вера кышномурт. «Ми шудыны но ӧм поталэ, - вераськонамы пыриське кузпалъёслэн бадӟымез Руфина нылзы. – Анаен атай ӵукна кошко вал но бер уйин гинэ ужысь берто вал. Обедэ но ӧз бертылэ. Пичи экеез пичи уробоен нонтыны нуллом вал. Бертоназы сиён но вуттыны тыршимы. Нырысьсэ шырпу ӝуатыку дэремме но ӝуатӥ, учоге тылскыкум».
- Нылпиос визьмоесь луизы, ӧз изъянтэ, - вера Мензифа апай. – Кык ныл но кык пи будэтӥмы, ваньзылэн асьсэлэн семьяоссы. Ми Руфинамылэн семьяеныз ӵош улӥськомы. Чулпанмы (гуртамы Фирая шуыса тодо) гуртамы ик интыяськиз. Роберт но Радик пиосмы четын уло.
Хазиахметовъёслэсь семьязэс почтальонъёслэн династизы шуыны луысал. Галиахмат агайлэн Ментифа апаез пиналысен пенсие потытозяз гуртоосызлы выль иворъёс вуттылэм. Котькуд нунал пыдын со Кузбае газет-журналъёслы ветлэм. Ментифа апай пенсие потэм бере, 1980-тӥ аръёсы солэсь ужзэ Руфина апай азинтэм. Татын со тямыс ар ӵоже тыршем. «Газет-журналъёс мешоке но уг тэро вал. Подписка вакытэ калык сомында газет-журналъёслы гожтӥськылӥз, окмоз шуисько вал. Гожтӥськонъя план мынам котьку вылӥын луылӥз. Гожтэтъёс, ӟечкылан открыткаос трос луылӥзы. Кузбае пыдын ветлылӥм, берло гинэ вал сётӥзы. Секыт ветлӥм, сюрес ӝутытымтэ вал. Мешокез пельпумамы карнанэз кадь поныса ваёмы вал. Куд-ог дыръя бӧрдэмъёс но потылӥзы», - вера Руфина апай. Бӧрысь нылызлэсь ужзэ Галиахмат агай шутэтскыны потытозяз азинтӥз. Нош сое Чулпан нылыз воштӥз. Со гуртооссэ выль иворъёсын дас арлэсь кема шумпоттӥз.
Кузпалъёс туннэ нуналэ но газет-журналъёсын эшъясько. Котькуд нунал почта нуллӥсез чидатэк витё.
Марина НИКОЛАЕВА.
Бурай ёрос.
Читайте нас в