Вань иворъёс
Общество
13 Куарусён 2018, 13:02

Анайлэн шудэз нылпиосыз бордын

Синмаськымон чебер, сабырлы, ужез яратӥсь, йӧно. Ваньмыз та кылъёс Калтасы ёросысь Туганеево гуртын улӥсь кышномуртлы, Ленин нимо СХПК-ысь скал кыскисьлы Венера Галимяновна Зайнетдиновалы тупало. Кузё кышноен корказы тодматским, бадӟым семьяезлы толалтэлы ческыт салат лэсьтон вакытаз.

Та гуртын ик вордскем нылаш пичи дыръяз семьяеныз Армязьын но улыса вуттэм. Нылзы нырысетӥ классэ пырыку, соос берен вордскем гуртазы берытскизы. Венера пичиысен ужаса будӥз, дораз но тэк пукыны уг чида вал, каникулъёсы эшъёсыныз колхозысьтызы АВМ-ын гранул поттонын, турын дасянын тыршиз. Озьы ик ортчизы школа аръёс: дышетсконэн, шудонэн, ужлы дышонэн, нырысетӥ яратонэн герӟаськем дыр.
Яратон кусыпъёс ик огазе каризы кык егит сюлэмъёсты: Венера гуртысьтызы Роман нимо пилы бызиз. Школа бере дышетскыны пырон сярысь малпанэз ӧз луы ни. Бадӟым пизы вордскем бере, кузпалъёс кенешизы, нылпиоссылэн нимъёссы «А» букваен луоз шуыса. Озьы огзы бӧрсьы огзы Андрей, Алесия, Алексей, Аэлита нылпиоссы шумпоттӥзы. Шудо но азьпаллы осконэн тырмем улон чутрак воштӥське, куке 35 аресъем Романлэн улонэз чиге. Кияз ньыль нылпиен но картэзлэн анаеныз егит нылкышно тыбыр пыкъеттэк кыле. Романэзлэсь анайзэ со 90 аресозяз утялтэм. «Правлениын техничка луыса но ужай, пӧзьтӥськись но вал, парсь утись но, али скал кыскисько. Одӥг ужлэсь но ӧй кыльы», - вера туэ 46 аресаз вамыштэм кышномурт. Адямиослэн ческыт изён вакытазы, ӵукна вить час котырын, со куинь кузя ужъя эшъёсыныз дышем сюрестӥз фермае дыртэ, угось 35-40 скалэз утялтыса, кыскыса вуттоно, уж вискын дорысь пудоез но учконо. Усто ужасьлэн, ӟеч анайлэн, умой кузё кышнолэн дораз пырыку ик син азе йӧтэ тыршись, быгатӥсь адямилэн ки бервылъёсыз. Ӝик-ӝик утялтэм бакчаяз но садаз котьмаиз будэ.
Со али улон сюрестӥ Александр картэныз вамышъя. Соослэн Арина нылзы будэ. Вить нылпиё анайлы 2014-тӥ арын «Материнская слава» медаль сётӥзы. Бадӟым нылпиоссы куинез анай бурд улысь кошкемын ни: бадӟымез пизы, Андрейзы, Севере, Ноябрьск городэ, интыяськыса, со сьӧры Алесия сузэрез но Алексей выныз вуизы. Пиос вузкарон удысын тыршо, Алесия - медсестра. Анайзы вӧзы кылемын «уакъёс» (тазьы мусояса верало та палъёсын улӥсьёс пичи нылпиоссэс). Анаезлэсь адӟем карыса, ужлы дышетскыса будэ туэ Нефтекамск педколледжын берпуметӥ арзэ дышетскись Аэлита нылыз но. Со пӧраськыны туж яратэ. «Кытысь бон тазьы быгатӥськод шуыса нылылэсь юасько но, тынэсьтыд учкыса улӥсько но, лэсьтӥсько шуэ», - шумпотыса вера анаймурт. Пичи нылзылы, Ариналы, 8 арес гинэ ай, солэн али бадӟым ужез - ёрос центрысь школаысь умой оценкаосын бертон.
Тыршыса улӥсь адями котьмае быгатэ. Венера Галимяновна керттӥськыны яратэ. Солэн диванъёсаз ас киосыныз керттэм пледъёсыз, накидкаосыз валемын. Нош ыжгонлэсь керттэм ныросъёсыз, тапочкиосыз быдэс мешок люкаськиллям ини. Соос лек кезьыт Северын улӥсь нылпиосызлэсь, внукезлэсь пыдъёссэс шунтозы. «Гужем таӵе ужен вырыны вакыт ӧвӧл, бакчаын уж трос. Толалтэлы варенняос, салатъёс но лэсьтытэк уг луы. Черсӥськон но керттӥськон - тол куазен быдэстоно ужъёс», - киужъёссэ возьматыса шуэ кибашлы кышномурт.
Анна БАЙДУЛЛИНА.
Калтасы ёрос.