«Шундыкар» – со семья, выль эшъёс, шумпотон, шулдыръяськон…

Кутскиз вылез дышетскон ар. Школае вуыса, нылпиос ог-огенызы гужем мылкыдэнызы люкисько. Нош «Шундыкарын» шутэтскемъёс али но лагерьын, эшъёссы пӧлын уло кадь.

Туэ «Шундыкар» 22-31-тӥ гудырикошконэ радъяськиз. Башкортостанысь Татышлы ёросысь Выль Татышлы школаын дышетскисьёс Дина Галиаскарова, Есения Гизадуллина, Регина Латипова, Улысь Балтач школаысь Линда Зидымакова но Адрияна Шайбакова, Янаул ёросысь Вуж Вараш школаын дышетскисьёс Ксения Галиахметоваен Элеонора Минликузина, Пермь шаерысь Чернушкаысь Изольда Шарафисламова но «Шундыкаре» вуыса, пӧртэм ӧръёсъя тодон-валанзэс узырмытӥзы.

Адрияна Шайбакова «Шундыкар» сярысь тазьы гожтэ: «Шундыкар - со выжыкыл, кытын сяська сямен усьтӥськыны, кизилилы пӧрмыса вылӥе ӝутӥськыны, мукет улосвылъёсысь эшъёсын тодматскыны луэ.

Туэ «Шундыкар» кызь куатетӥ ползэ ӧсъёссэ усьтӥз. Тӧромы Алина Чернова вал, нош валтӥсь вожатоймы - Алина Крестьянинова. Соостэк та сменамы яркыт ӧй луысал. Лагерьын дас пӧртэм отрядъёс лыдъяськизы: литература, журналистика, фольклор, эстрада, туспуктӥсьёс, видеоискусство, дӥськут дизайн, суредаськисьёс, театр но крезьгурчиос. Ӵукна ик нылпиослэн ӧръёсъя ужъёссы кутско, собере кыӵе ке ужрад яке журналистикае ветлӥсьёс ток-шоузэс ортчыто. Собере ӝыт ужрадлы дасяськыны кутскиськом. Котькуд ужрадлэн аслаз темаез вань: «Научной открытиос», «Мар со - искусство?», «Холостяк» но визез сынанъя ужрадъёс. Нуналмы позыръяськонэн йылпумъяське вал. Мон «Шундыкар» лагере кыкетӥзэ вуылӥ. Суредаськисьёслэсь ӧрзэс бырйи. Отрядамы ми сизьым кузя нылъёс вал. Вожатоймы Алёна Глухова милемыз Венгриысь ваем кампетъёсыныз куноялляз. Ӧнерчимы Чудья Жени вал. Солэн занятиосыз туж тунсыкоесь луизы. Та смена куспын ми бадӟым абстрактной суред суредамы, солэсь фонзэ ми синъёсты кыньыса лэсьтӥмы. Со сяна, кассетаос но подкассетникъёс вылын суредаським, пичияк анимация уськытӥм, кытын пуныос «Ву» нимо пуныез утчало. «Шундыкаре» огпол ке но вуылӥд, со пыраклы сюлэмад кылёз. Со тыныд туж бадӟым тодон-валан сётоз, кудӥз улонад кулэ луоз, тыныд зэмос эшъёс кузьмалоз».

Мукет пиналъёс но лагерьын шутэтскемзы сярысь малпанъёссэс гожтӥзы.

Есения Гизадуллина: «Шундыкаре мон нырысьсэ ветлӥ. Мыным отын туж кельшиз. Отысь трос эшьёс шедьтӥ.Укмыс нунал одӥг нунал кадь потӥз. «Шундыкар» мынам кыкетӥ семья кадь луиз.

Мон «Дӥськут дизайн» отрядын луи. Вуоно арын мон нош ик отчы вуылысал. «Шундыкар» - со космос, со – яратон, со – семья».

Регина Латипова: «Мон но «Шундыкаре» нырысьсэ вуылӥ. Туж кельшиз, бертэме но уг поты вал. Отын ужтэк пукыны дыр но ӧй вал. Вожатойёс туж тунсыкоесь. «Шундыкар» - со яратон, шумпотон, шулдыръяськон. Мон выльысь отчы мыныны дась!»

Элеонора Минликузина: «Мон «Шундыкарын» нырысьсэ вал. Со - лагерь ӧвӧл, со бадӟым шуныт семья. Милям, отын шутэтскем нылпиослэн, сюлэмъёсамы котькуд нунал шунды пиштӥз. «Шундыкарлэн» шунытэз ваньмылы тырмиз».

Дина Галиаскарова: «Шундыкар» монэ нырысьсэ пумитаз. Мыным отын туж кельшиз, азьвыл озьы шутэтскеме ӧй вал на. Нуналъёс туж ӝог, одӥг нунал выллем, ортчизы. «Шундыкарын» шутэтскон эшшо но кузьгес мед луысал».

Ксения Галиахметова: «Шундыкарысь» бертэме ик уг пот вал. Отын мон эшъёс шедьтӥ. Соос пӧртэм интыосысь вуэмын вал. Бадӟым тау вожатойёслы, ваньзылы, кин ужаз та сменаын».

Изольда Шарафисламова: «Шундыкар» мукет лагерьёслэсь висъяське. Со - аспӧртэм дунне, кытын шумпотонэн, задор мылкыдэн тырмем ужрадъёс «уло». Лагерез радъясьёслы, вожатойёслы, ӧнерчиослы бадӟым тау. Татын ортчытэм котькуд нунал мынам малпанъёсам кема улоз.Мӧзмон дыръёсы луизы ке, мон лагерь сярысь малпало. Соку одно ик мылкыды ӝутӥськоз, яркытэсь малпанъёс сюлэмме шунтозы. Мон туж шумпотӥсько, «Шундыкаре» шеди шуыса. Отын трос выльзэ, тунсыкозэ тодӥ удмурт сям-йылолъёс, лулчеберет сярысь. Шумпотӥсько, «Шундыкар» вань шуыса. Оскисько, мон отчы вуо на».

Дасяз Миляуша

НИГАМАТУЛЛИНА.