-6 °С
Лымы
Антитеррор
Вань иворъёс
Общество
30 августэ 2018, 17:55

«Ныло-пиё коркае…»

«Пиё, пиё коркае но, соин шулдыр коркае». Таӵе кылъёсын кутске одӥгез удмурт калык кырӟан. Татышлы ёросысь Уразгильды гуртын улӥсь Сайфутдин но Ментифа Нуриахметовъёслэн семьяязы огзы бӧрсьы огзы ньыль нылъёссы Римма, Татьяна, Лариса, Динира вордӥськизы. Корказы нылъёсын но шулдыр вал, озьы ке но анай-атай лушкем малпанэн улӥзы – пи вордыны. Соослэн витетӥ нунызы – пизы – вордӥськиз. Кузпалъёслэн малпанзы быдэсмиз. Пизылы соос Александр ним бырйизы (калыкын солы Шурик шуыса вазисько). Туннэ нуналэ пизы – гуртын гажано адями, яратоно кузпал но куинь нылпиослэн дуно атайзы. Александр Сайфутдинович Татышлы ёрос администрацилэн дышетонъя управленияз ужа.

«Пиё, пиё коркае но, соин шулдыр коркае». Таӵе кылъёсын кутске одӥгез удмурт калык кырӟан. Татышлы ёросысь Уразгильды гуртын улӥсь Сайфутдин но Ментифа Нуриахметовъёслэн семьяязы огзы бӧрсьы огзы ньыль нылъёссы Римма, Татьяна, Лариса, Динира вордӥськизы. Корказы нылъёсын но шулдыр вал, озьы ке но анай-атай лушкем малпанэн улӥзы – пи вордыны. Соослэн витетӥ нунызы – пизы – вордӥськиз. Кузпалъёслэн малпанзы быдэсмиз. Пизылы соос Александр ним бырйизы (калыкын солы Шурик шуыса вазисько). Туннэ нуналэ пизы – гуртын гажано адями, яратоно кузпал но куинь нылпиослэн дуно атайзы. Александр Сайфутдинович Татышлы ёрос администрацилэн дышетонъя управленияз ужа.
Кема возьмам экезэс нылъёс эркеяны тыршизы ке но, Шурик сабырлы, визьмо, ужез яратӥсь пи но атаезлэн зэмос кивоштӥсез луыса будӥз. Атаез, Сайфутдин агай, котьку кивалтӥсьын ужамын угось. Калыкен-а ужалод, дорысь уждэ-а лэсьтыса вуттод? Та семьяын кема аръёс ӵоже ини муш утёнэн выро. Пичи дырысеныз ик атаез вӧзы юрттӥськыны пиез но пота вал.
Удмуртъёслэн озьы кылдэмын: атай юртэ пичиез пи кыле. Александр но, школазэ йылпумъяса, Бирскысь педагогикая институтысь «шор ёзо школаын физикая, технологияя, предпринимательствоя дышетӥсь» ӧнеръя тодон-валан басьтыса, 1999-тӥ арын ас гуртаз бертӥз, Уразгильды школае ужаны интыяськиз. Одӥг ар солэсь азьвыл та школае ик библиотекарь луыса ужаны кутскем Кунгурысь педучилищеез пыр потэм Анна Динисовна Шарафутдинова. Егитъёс азьлогес ик тодмо вылӥллям ке но, куспазы яратонзы школаын ужакузы кылдэм.
Вылысь Татышлыын удмурт семьяын будэм нылаш 2001-тӥ арын Уразгильды кен луиз. Анюта но Саша (озьы вазисько соос ог-огзылы) 17 ар ини анай-атаенызы, Сайфутдин агаен но Ментифа апаен, одӥг коркан тупаса уло. Палэнэ кошкон, яна потон сярысь вераськонзы куспазы ӧз ик поты. Егитъёс, мӧйыосын кенешыса, выль корка ӝутон сярысь но сюлмаськизы, куинь ар куспын кирпичлэсь выль юртазы улыны потӥзы. Ӝутӥськон ужазы бадӟым юрттэт луиз «Социальное развитие села до 2013 года» целевой программая улон корка пуктыны висъям социальной выплата но. Эркын, выль корказы соос али сизьым кузя уло: песянай-песятай, анай-атай но куинь нылпиоссы - Максим, Алёша но Катя. Катюшалы арес но ӧвӧл ай, мамаез ӵапак али соин декретной отпускын пуке.
2010-тӥ арысен Александр Сайфутдинович ёросысь дышетонъя управлениысь педагогической информацияя центрын методист луыса ужа. Вераны кулэ на, со – ёросысь компьютерез ӟеч валась ӧнерчиос пӧлысь одӥгез. Анна Динисовна но, Уразгильды школаысь ужез быремен, нырысь ёрос центрысь «Берёзка» нылпи садын воспитательлэн юрттӥсез луыса ужаз, кык арскын «Радуга» нылпи садын воспитательлэсь ужзэ быдэсъяны кутскиз. Со заочно Бирскысь социально-педагогической академиын, «Нылпи садысь методист-организатор» ӧнеръя дышетскиз. Кыкназы но ёрос центрын ужало бере, пичи пизэс, Алёшаез, Вылысь Татышлыысь одӥгаз нылпи садэ нуллыны кутскизы. Али со нырысетӥ номеро шор ёзо школаын дышетске ни. Нылпи творчествоя центрысь «Виктория» эктон ансамбле но ветлӥз. Будэмъяз валаз, эктон – со пиослэн ужзы ӧвӧл. Алёшалы компьютер сьӧрын тунсыко шудонъёсын шудыны, юлтошъёсыныз великен ворттылыны кельше, пе. Эшшо со быгатэ песятаез кадь лад-лад вераськыны, ваньзэ тупен-тупен валэктыны. Бадӟым пизы, Максим, нырысь Уразгильды школаын дышетскиз, 6-тӥ классэ йылпумъямез бере ёрос центрысь школаын дышетскыны мылкыд кариз: Вылысь Татышлыын улӥсь Динира пичапаезлэн пиеныз одӥг классын дышетскемез потӥз. Туэ соос 9-тӥ классэс йылпумъязы. Пиос кыкназы но Уфаысь железнодорожной техникуме мыныны дасясько. Табере песятаезлы мушъёс палдыку юрттӥськись Максимез (ЕГЭ-ен, ОГЭ-ен сэрен, Шурик атаезлы муш утёнлэн самой кысык вакытаз юрттэт возьматыны уг быгаты) вуоно арын, оло, Алёша воштоз ни. Нош пичи Катюшалэн ваньмыз азьпалан на. Оскисько, пичи ныл но удмурт кылэз тодыса будоз шуыса. Агайёсыз, ёрос центрын дышетскемзылы учкытэк, удмурт кылзэс ӧз вунэтэ.
Гужем ке вуэ, Нуриахметовъёслэн корказы куноосын тырме: кыдёкысь уйпалась но, Свердловск улосвылысь но мукет интыосысь матысьёссы соос доры берто. Татын соос кужым басьто,ческыт башкир чечыез веръяло. Та ваньбурзы Нуриахметовъёслэн арлы быдэ луытэк уг кыльы.
Анна БАЙДУЛЛИНА.
Татышлы ёрос.