Вань иворъёс
Общество
27 августэ 2018, 12:30

«Ошмеслы» гожтӥськонэз радъя, газетэз лыдӟисьёс кие вуттэ

Улонын кыӵе гинэ пумиськонъёс-тодматсконъёс уг луо. Вань сыӵе адямиос, кинъёс сюлэм шунытсэс мукетъёслы жалятэк сёто, кинлы ке но юрттон, улоназы тросгес ӟеч ужъёс быдэстон сярысь сюлмаськыса уло. Пермь шаерысь Куеда ёросысь Гожан гуртын улӥсь Лидия Шаяхметоваез но сыӵе адямиос пӧлы пыртыны луэ.

Улонын кыӵе гинэ пумиськонъёс-тодматсконъёс уг луо. Вань сыӵе адямиос, кинъёс сюлэм шунытсэс мукетъёслы жалятэк сёто, кинлы ке но юрттон, улоназы тросгес ӟеч ужъёс быдэстон сярысь сюлмаськыса уло. Пермь шаерысь Куеда ёросысь Гожан гуртын улӥсь Лидия Шаяхметоваез но сыӵе адямиос пӧлы пыртыны луэ. Лида апай доры котьку мын, со пальпотыса пумиталоз, вераськоз, мылкыдыд ӧвӧл ке, одно ик ӝутоз, кайгуэд ке вань, либатон кылъёс шедьтоз. Соин туж капчи. Кунооссэ Лида апай котьку ческыт чаен, шыдэн, кылдэ ньылымон пӧръёсын-пыжиськемъёсын пумита.
Лидия Галинуровна вордӥськемын но будэмын Янаул ёросысь удмурт гуртын – Выль Киргаын. Кызьы со пермь музъеме вуэм шуоды? Ваньзы сямен ик – Нефтекамскын бухгалтерлы дышетскем ӧнерчиез направлениен Гожанэ ужаны ыстӥллям. Пенсие потытозяз Лида апай татысь Мичурин нимо хозяйствоын бухгалтер луыса ужам, Рафкат кузпалыз агрономын тыршем. Жаляса верано, Рафкат агай 2010-тӥ арын улонэн люкиськем.
Улон сюрес вольыт гинэ уг луы. Лида апайлы но пӧртэм секытлыкъёсты вормоно луэм, озьы ке но со сюлэм шунытсэ ыштымтэ. Секыт дыръя со нылпиосыз, внукъёсыз, эшъёсыз вӧзын «шунтӥськем».
- Нылпиостэк улон ӧвӧл, пичиосме туж юн яратӥсько. Соостэк одӥг нуналме но син азе пуктыны уг быгатӥськы. Шумпотымон, соос но монэ гажало, - вера арлыдо кышномурт.
Лида апай – куинь полэс анай, тямыс полэс песяй-ӵужай, солэн одӥг правнукез но вань ини. «Нылпиосы куиньназы но вӧзам, асьсэ семьяосынызы Гожанын ик уло», - шуэ со. Лида апай пичи нылызлэн, Екатериналэн, семьяеныз ӵош улэ.
Арлыдо кышномуртлэн мӧзмыны, ужтэк пукыны дырыз ик ӧвӧл. Со «Пинал сюлэм» удмурт фольклор ансамбле но пыриське, тазалыксэ утёнлы но саклык висъя. Толалтэ, кылсярысь, со эшъёсыныз скандинав амалэн ветлыны пота, клубын арлыдоос понна радъяськем ужрадъёсы но пыриське, юртъер котырысьтызы ужъёссэ но быдэсъя.
Котьку мар ке но быдэстыны тыршись Лида апай шоры учкыса паймоно: кытысь меда со кужым басьтэ?
- Мон киужен вырыны яратӥсько, керттӥськисько, соку ик ял карисько, - пальпотыса шуэ Лида апай. Зэм, кыӵе гинэ сяськаос, салфеткаос, пуконъёс вылэ валетъёс, пледъёс со пӧрмытымтэ! Чебересь киужъёсыз шоры учкыса уд тыры.
Лидия Галинуровна «Ошмес» газетэн но эшъяське. «Одӥг бамзэ но, одӥг чурзэ но лыдӟытэк уг кельтӥськы. Кызьы аслад вордӥськем кылыныд потӥсь газетэз уд лыдӟы? Солэсь котькуд номерзэ чидатэк витисько», - вера Лида апай.
Вераны кулэ, яратыса лыдӟемез сяна, со Гожанын газетлы гожтӥськонэз но радъя, ачиз ик «Ошмесэз» лыдӟисьёс кие вуттэ. Со понна Лидия Галинуровналы пумтэм тау кылъёсмес вераськом.
Миляуша БУЛАТОВА.
Пермь шаерысь Куеда ёрос.