-18 °С
Салкым
Антитеррор
Вань иворъёс
Общество
27 августэ 2018, 12:15

Экспедицие пыриськисьёс удмурт гуртэн тодматскизы

Башкортостан Республикаын куинетӥ гудырикошконысен Москваысь педагогикая кун университетысь егитъёслэн «Россия – единство в многообразии» этнографической экспедицизы ужа. Со 24-тӥ гудырикошконозь кыстӥськиз.

Башкортостан Республикаын куинетӥ гудырикошконысен Москваысь педагогикая кун университетысь егитъёслэн «Россия – единство в многообразии» этнографической экспедицизы ужа. Со 24-тӥ гудырикошконозь кыстӥськиз.
Экспедициез МПГУ, «Этносфера» калыккуспо дышетонъя центр, БР-ысь Культурая министерство, Ермекей ёрослэн администрациез радъяло. Таӵе гужем школа 14-19 аресъем егитъёслы чакламын. Со Ермекей ёросын улӥсь калыкъёслэсь историзэс, лулчеберетсэс, сям-йылолъёссэс эскеронлы, Россиысь калыкъёслэсь культуразэс вӧлмытонлы, будӥсь нылпиослэсь этнокультураен тунсыкъяськонзэс будэтонлы сӥземын.
Экспедицилэн планэзъя, «Ручеёк» тазалыкез юнматонъя лагерьын улӥсь пиналъёс ёросысь куать гуртъёсын тодматскозы, МПГУ-ын но мукет вузъёсын ужась ӧнерчиослэсь лекциоссэс кылзозы, семинаръёсы, тренингъёсы, мастер-классъёсы но мукет ужрадъёсы пыриськозы.
Экспедицие пыриськисьёс удмурт гуртэ, Купченее, но вуылӥзы. Автобусысь потыса, егитъёс школа пала вамыштӥзы - отысь шулдыр кырӟан гур кылӥськиз, котыре ческыт нянь зын вӧлмемын. Гуртэ вуэмъёс нырысетӥ минутысен ик асьсэды доразы кадь потӥзы. Ваньзы пусйизы удмуртъёслэсь задор мылкыдо, ужаны но кырӟаны яратӥсь луэмзэс.
МПГУ-ысь 3-тӥ курсын дышетскись Сергей Говорушко вера: «Та гуртэ вуыса, мон чебер инкуазь суредъёслы но татын улӥсь калыклэн куно пумитаны быгатэмезлы пайми, удмуртъёс сыӵеесь шуыса азьвыл кылылэме вань ке но вал. Гурт кузя вамышъянъям, монэ одӥгаз корка куное ӧтизы, тодматскыса, ӝӧк сьӧрын чай юон сямен, гуртын улӥсьёслэн йылолъёссы но сямъёссы сярысь трос веразы. Мон татчы нош ик шумпотыса вуысал».
Купченейёс Удмурт Элькунлэсь, мукет удмурт гуртъёслэсь палэнын улыса но, калык йылолъёссэс, ӧнеръёссэс, удмурт дӥськутъёссэс, улон манеръёссэс утё но азинто. Сое егитъёс асьсэ синъёсынызы адӟизы татысь «Зангари» удмурт фольклор ансамбльлэсь «Ӝыт пукон» йылолзэ учкемзы бере. Ансамбле ветлӥсьёс пӧлысь тужгес арлыдоез - укмыстон аресъем песянай. Озьы но со эшъёсызлэсь бере уг кыльы, балалайкаен но туж усто шудыны йӧндыре. Туж умой луысал, пересь кырӟасьёс борды «егит куараос» итӥськысалзы ке.
Купченей гуртын ортчытэм мастер-классъёс тунсыкоесь, пайдаё луизы. Со сяна, «ческытэсь» но вал: татын егитъёсты гурын табань пыжыны, кузятэмен пельнянь кутыны, ыльнянь лэсьтыны, тукмач вандыны дышетӥзы.
МПГУ-ысь 5-тӥ курсысь студентка Марина Лоншакова вера:«Кык минутскын ми чылкак мукет дуннее сюрим кадь – чылкыт утялтэм гурт корка. Гурын табань пыжыса эскерим, киын лэсьтэм диванэз но кубоез адӟим, туж ческыт эмезь варенняен, пӧртэм турынъёсын - муштурынэн (мелисса), лыз но ӵуж матрушкаосын (душица, зверобой) - чай юим. Нош кыӵе умой вылэм гур вылын кылльыны! Таӵе гурт корка вуон – ми понна тужгес ӟеч шутэтскон вал».
Дасямын «Ермекеевские новости» газетысь материалъя.