-17 °С
Салкым
Антитеррор
Вань иворъёс
Общество
27 августэ 2018, 11:49

Быдэ вуон – пичи дырен со люкиськон

17-тӥ гудырикошконэ Вязовкаысь культура юртэ трос егитъёс люкаськизы. Та нуналэ отын «Быдэ вуон» ӵошатскон ортчиз. Отчы пыриськыны Татышлы, Калтасы, Янаул ёросъёсысь нылъёс но пиос мылкыд каризы. Соосты шулдыр удмурт гуртын пумитаса но ӟеч мылкыданъёс сӥзьыса, вераськиз БР-ысь удмуртъёслэн НКЦ-енызы кивалтӥсьлэн воштӥсез Д. М. Биктимиров. Ужрад удмурт огазеяськонлэн уж планэзъя радъяськиз угось.

17-тӥ гудырикошконэ Вязовкаысь культура юртэ трос егитъёс люкаськизы. Та нуналэ отын «Быдэ вуон» ӵошатскон ортчиз. Отчы пыриськыны Татышлы, Калтасы, Янаул ёросъёсысь нылъёс но пиос мылкыд каризы. Соосты шулдыр удмурт гуртын пумитаса но ӟеч мылкыданъёс сӥзьыса, вераськиз БР-ысь удмуртъёслэн НКЦ-енызы кивалтӥсьлэн воштӥсез Д. М. Биктимиров. Ужрад удмурт огазеяськонлэн уж планэзъя радъяськиз угось.
Кытысь кинъёс
лыктӥллям?
Сцена вылэ конкурсэ пыриськисьёсты ӧтизы. Соос пӧлын луизы куинь пиос но вить нылъёс. Нош кытысь соос вуиллям? «Мон Вязовкаын вордӥськемын, татысь паськытэсь урамъёсын шудыса будэмын», - учкисьёслэн лушкем юанъёссылы валэктон сётыса сямен, веранзэ кутскиз Вязовкаысь Родион Гилимзянов. Татын ик уло Валерия Камалтдинова но Кирилл Васильев. Нош Руслан Камалитдинов Краснохолмскийысь лыктэмын. «Мон Калтасы ёросын улӥ, собере Бурае выжимы, Уфаын но улӥмы. Нош татчы Краснохолмскийысь вуи», - вераз со асэныз тодматыса. Милана Мухаметшина но конкурсэ шумпотыса лыктэм. Та нуналэ со Янаул ёросысь Шудек гуртлэсь данзэ утиз. Валерия Губаева, Ника Муллаярова, Есения Гизадуллина Татышлы ёросысь Улысь Балтач, Калмияр, Выль Татышлы гуртъёс понна шудӥзы. Конкурсэ пыриськисьёсты учкисьёс зол кичабонъёсын пумитазы. Соос пӧлысь котькудӥз ассэ яркытгес но тунсыкогес усьтыны тыршиз угось.
Веник но керттом,
чебер тугоко но пӧрмытом
Вашкалаос нылпиоссэс пичиысен ик ужез гажаны дышетыса будэтӥзы. Озьы 14-15 аресъем пиналъёс юрт котырысьтызы котькуд ужез быдэстыны быгато ни вал.
Соос анайзылы юрт котыразы юрттӥськизы, атаенызы ӵош веник но керттӥзы. Нош туала пиналъёс йӧндыро меда та выллем ужъёсты быдэстыны? Ужрадэз дасясьёс егитъёслэсь быгатонлыксэс котыр ласясь эскерыны малпаллям. Тани сцена вылэ быдэс керттэт кызьпу вайъёс поттӥзы. Пиослы соослэсь толлы веник, пе, дасяно. Егитъёс ужзы борды ӝог басьтӥськизы. Веник керттэмзэс учкыса, пиос аръёс ӵоже ни со бордын ужало, кожалод. «Веникме чебергес пӧрмытысал, но мултэс ньӧръёссэ кораны тӥр ӧз сётэ», - ужезлэсь тырмымтэоссэ дунъясьёслы валэктыны тырше Руслан. Нырысетӥ конкурсэз пиос ваньзы капчиен быдэстӥзы. Озьыен, соосын толлы вениктэк уд кыльы.
Ужрадэз дасясьёс нылъёс понна но аспӧртэм конкурс малпаллям. Соослы пӧртэм тусо сяськаослэсь керттэт яке тугоко пӧрмытоно вал. «Таӵе сяська керттэтме мон анаелы сётысал», - чебересь сяськаосызлы шунытсэ кузьмаса кадь вераз Валерия Камалтдинова. Нош Есения яратоно дышетӥсезлы керттэт дасян сярысь сюлмаськиз. Ӝоген нырысетӥ куарусён вуоз ни угось. Милана но Валерия яркытэсь сяськаослэсь чебересь тугокоос пӧрмытӥзы.
Шудон лэсьтон,
тукмач вандон
Нылпиос азьвыл анай-атайёссылы трос юрттӥськизы ке но, эшъёсынызы но шудыны вутскылӥзы. Соос мунёен, шудон коркаен, тракторен шудылӥзы. Пиос троссэ шудонъёссэс асьсэ киосынызы лэсьтылӥзы. Куддыр гинэ соослы атайзы юрттӥськылӥз. Зэм, туала пиналъёс пулэсь тракторъёсын, оло, шудыса но будэмын ӧвӧл, дыр. Но конкурсын соослэсь пуэн ужаны быгатонлыксэс эскеризы. «Нош табере учкомы пиосмылэсь шудон лэсьтыны быгатэмзэс», – вераз ужрадэз нуись Радис Гайниятов. Пиослы брусокъёс, бычкы, кортӵог сётӥзы. Шӧдӥське, Русланэн Кирилл пичи дыръязы самолётэн тросгес шудӥллям, нош Родион – тракторен. Соослэн ужъёссы магазинын выллем чебересь пӧрмизы.
Пиос ужъёссэс йылпумъям бере, ужрадэз нуись Лилиана Нуриахметова сцена вылэ нылъёсты ӧтиз. Сьӧразы соослы ужаны тӥрлыкъёс – пул, кызбугор, куарнянь – поттӥзы. Нылъёслэсь куарнянь погыльтыса, тукмач вандыны быгатэмзэс учкыны малпаллям. Азьпалтыса верало, жюри соослэсь ӝоглыксэс ӧз эскеры, быдэстэм ужзылэсь ӟечлыксэс дунъяз. Татын тужгес усто луиз Валерия Камалтдинова. Солэн шорем тукмачез синмаськымон чебер пӧрмиз. Таяз конкурсын Руслан но нылъёслэн шаплы тыршемзылы вожмаськиз, лэся. Со, ӝӧк сьӧры султыса, сюлмысь погыльтӥськыны, тукмач вандыны кутскиз.
Нылъёслэсь усто пӧраськыны быгатэмзэс мукетыз конкурс но юнматӥз. Табере соослы доразы пыжыса ваем пӧрзэс утёно вал. Нылъёс пӧлысь тросэз ческытэсь, шунды выллем яркытэсь перепечъёс пыжиллям. Нош Валерия Губаева удалтыса пыжем табанен паймытӥз, Ника – шаньгиен. Есения дрожжиен ыльняньлэсь улмо нянь пыжем. Отчы ӧжытак корица но ватсам. Нылъёслэн пӧръёссы кылдэ ньылымон ческытэсь пӧрмиллям.
Доре уж
Ужрадэз дасясьёс егитъёслы доразы но уж сётыны вунэтӥллямтэ. Соослы учкисьёс азьын котыр ласянь быгатонлыкъёссэс, пе, возьматоно луоз. Конкурсэ пыриськисьёс тросэз кырӟан но эктон дасяллям. Нош Милана но Руслан эшъёсынызы ӵош быдэс оркестр кылдытӥллям – огзы тупен шудӥзы, мукетъёссы – пластик бутылкалэсь лэсьтэм крезьгуро инструментэн, арганэн но кастрюлен. Нош Руслан крезьгуро инструментэн шудонэн гинэ ӧз буйгатскы, фокус возьматыны но тыршиз. Та нуналэ нылъёслэн но пиослэн эктэмзы но кырӟамзы улсын пыдъёс асьсэос эктыны куриськизы кадь.
Ыжгон черсон но пу вандон
Конкурсэ пыриськись нылъёслэн песяйёссы, анайёссы котькудзы сямен черсо, керттӥсько, дыр. Нош нылъёссэс дышетӥллям меда таӵе ужъёслы? Соослы черсыны сцена вылэ ыжгонэн кубо поттӥзы. Шӧдӥське, нылъёс пӧлысь куд-огез черсэз киязы нырысьсэ кутӥллям. Соин ик, лэся, шортэз но отчы туж секытэн биниське. Озьы ке но нылъёс уг буйгатско, ужзэс быдэстон бордын сюлмысь тыршо. Одӥгаз черсэ гинэ ыжгон шорт чебер но векчи биниськиз. Солэсь зэмзэ ик шуныт нырос пӧрмысал.
Черсон конкурс йылпумъяськыса ик ӧз вуы, сценаез мукетызлы дасяны кутскизы. Ужрадэз дасясьёс со пумысен веразы: «Азьло электропилаос но бензопилаос вылӥллямтэ. Соку котькин ки бычкыен пу дасям. Асьмеос быгатысалмы меда соин коркамес шунтыны?» Конкурсын бычкы вжик! вжик! вазиз ке но, пу нокызьы ӧз вандӥськы. Егитъёс туала ужтӥрлыкъёслы дышемын ни, лэся. Есенияен Ника гинэ ужзэс пумозяз вуттыны быгатӥзы.
* * *
Ӵошатскон йылпумъяськиз. Вязовкаысь «кизилиос» учкисьёслы кӧня ке шулдыр гуръёссэс кузьмамзы бере, дыр вуиз вормисьёсын тодматскыны. Со понна кыл сётӥськиз Д. М. Биктимировлы но историяя но культурая центрысь методистлы К. В. Милиятовалы. Туэ «Быдэ вуон» конкурсын тужгес удалтӥз Валерия Камалтдиновалы но Руслан Камалитдиновлы. Конкурсэ пыриськисьёс Данъян грамотаосын но синпель кузьымъёсын пусъемын. Ксения Викторовна ужрадлэсь анай кылмес, сям-йылолъёсмес утёнын бадӟым инты басьтэмзэ пусйиз, сое ортчытӥсьёслы тау карон кылъёссэ вераз.
Ольга НИГАМАТУЛЛИНА.
Читайте нас в