-15 °С
Яркыт
Антитеррор
Вань иворъёс
Общество
16 августэ 2018, 18:27

Азьвыл дышетӥсьёс уг луо

Каймашабашысь дано дышетӥсь Г. З. Мардамшин 80 арес тырмонзэ пусйиз

Туэ 24-тӥ куартолэзе Каймашабаш школае вуылыны кылдӥз. Соку отысь укмысэтӥ классэз йылпумъясьёс понна берпуметӥ гырлы жингыртӥз. Школаысь устооссэ пиналъёсты келяны трос калык люкаськемын вал. Соос пӧлын ик луиз пичигес мугоро арлыдо пиосмурт. Шораз учкыса валай – со пенсиысь дышетӥсь. Берло тодӥ: азям Каймашабаш школалэн азьвыл директорез Гафурян Зарипович Мардамшин вылэм. Кема ӧвӧл со чебер юбилейзэ пусйиз – дышетӥсьлы  80 арес  тырмиз.
Гафурян Зариповичез ӟечкыланы дышетэм нылпиосыз, эшъёсыз, гуртоосыз люкаськизы. Солы шуныт кылъёссэс вераны дыртӥзы ёросысь школаослэн директоръёссы, БР-ысь удмуртъёслэн национально-культурной центренызы кивалтӥсьлэн воштӥсез Ю. С. Саитов, Иткиней гурт поселенилэн администрациеныз кивалтӥсь Р. Р. Шакуров, Нефтекамск педколледжысь дышетӥсь Т. Р. Глимзянова.  
Гафурян Зариповичез Янаул ёросысь пичи удмурт гурт – Норкан – будэтӥз. Татын ик со нырысетӥ тодон-валан басьтӥз, нош собере Выль Киргаысь сизьым аръем школаез йылпумъяз. Та вакытэ гуртысь пиналлэн улонэз мукетъёслэсь номырин ӧз висъяськы кадь. Быдӟым Атыкай ож вакытэ но со бӧрысь аръёсы вордскем котькуд нылпи сямен со ужлэсь дунзэ валаса будӥз. Нош сизьыметӥ классэ йылпумъямез бере, азяз бадӟым ужпум пуктӥз: дышетӥсьлы дышетсконо. Со вакытэ кужмо дышетӥсьёсты Краснокама педучилище дася вал. Ӝоген Гафурян Зариповичлы  но солэн борддоръёсыз сьӧрын дышетскыны кылдӥз. Отын ортчем аръёсыз, эшъёсыз сярысь со туннэ шумпотыса вера. Али гинэ вал кадь солэн студент аръёсыз. Педучилищеез йылпумъямез бере, со ачиз ни олокӧня дышетскисьёслы вуонозэс бырйыны юрттӥз. Гафурян Зарипович угось улонэзлэсь 43 арзэ калыкез дышетонлы сӥзиз. Нош ваньмыз кутскиз Четырман школа бордысен.
1955-тӥ арын егит дышетӥсез отчы ужаны келязы. Ӵапак соку ик нырысетӥ классэ вамыштӥз Юрис Саитович Саитов но. Зэм, Гафурян Зариповичлы отын кема ужаны кылдымтэ, егит дышетӥсез уж сюресэз Андреевкаысь начальной школае вуттӥз. Берло Барабановка школаын историяя но физкультурая урокъёсты но нуиз. Нош 1964-тӥ арын сое Каймашабаш школае директоре юнматӥзы. Но Гафурян Зариповичлы одӥг интыын кема ужаны кылдымтэ. Шаплы дышетӥсез ӝоген Янаулысь РОНО-е ужаны басьтӥзы. Озьы ке но, аръёс ортчыса, дышетӥсьлы берен татысь школалэн борддоръёсыз сьӧрын ужано луиз на. Зэм, отчы берытскытозь, солы дуннеез котыръяно на вылэм. 1970-1990-тӥ аръёсы Гафурян Зарипович семьяеныз Узбекистанысь Маргилан городын улӥз. Шумпотоно, отын но сюлмо дышетӥсьлэсь тыршемзэ шӧдытэк ӧз улэ. Со сярысь верало пӧртэм вормонъёсыз – Гафурян Мардамшин Узбекистанысь Ферганской улосвыллэн Данъян грамотаосыныз пусъемын, усто лекторлэсь, военруклэсь туспуктэмзэ Данъян пул вылэ ошылӥзы. Гафурян Зарипович – УзССР-ысь калыкез дышетонысь отличник.
Каймашабаш школае со кыкетӥзэ 1990-тӥ аръёсы вуиз. Та вакытэ ик со пельпумъёсаз секыт ныпъет  ӝутӥз – выль школа ӝутон борды кутскизы. 1993-тӥ арын шуркынмон толэзе кык этажъем кирпич юрт дышетскисьёсты пумитаз. Со дырысен 25 ар ортчемын ни. Озьы ке но школалэн борддоръёсаз Гафурян Зариповичлэн сюлмысь ужамез, гуртысь пиналъёсты визьноданы тыршемез шӧдӥсько на. Та борддоръёс сьӧрысь аръёс ӵоже трос дышетӥсьёс, эмчиос, трактористъёс, сварщикъёс, мувӧй пӧттӥсьёс но мукетъёс паськыт улон сюресэ вамыштӥзы. Гафурян Зариповичлэн но Рашида Касфатовналэн Вячеслав пизы но мувӧй поттӥсьлэсь ужзэ быръем, нош Валерийзы ИжГТУ-эз йылпумъяса Ижысь автозаводын тырше, отделэн кивалтэ, Альбертсы электриклы дышетскем. Арлыдо кузпалъёслэн куинь кенъёссы – куинез но, анайзы но атайзы выллем, дышетӥсьёс.
Гафурян Зарипович верам кылъёссэ котьку уж вылын быдэстэ. Таӵе куронъёс ик пуктэ вал со дышетӥсьёс азе но. «Со котьку дышетӥсь гажамон адями луыны кулэ шуыса вералляз. Азьланяз, пе, возьыт медаз луы», - тодазы ваё Каймашабашысь дышетӥсьёс. Нош шонерзэ верано ке, соослэн малпамзыя, гажано дышетӥсьсы школа улонэн ӧз но люкиськылы на кадь, солэн мылкыдыз котьку дышетэм пиналъёсыныз, дышетон юртэн герӟаськемын.  
Ольга НИГАМАТУЛЛИНА.
Янаул ёрос.
Читайте нас в