Санкт-Петербургын Гербер ортчиз

Гербере Башкортостанысь удмурт калык фольклор ансамбльёс но вуылӥзы: Бурай ёросысь Алтауысь «Инвожо», Татышлы ёросысь Вязовкаысь «Уӵы ныл» но Кызыл-Ярысь «Марӟан», Янаул ёросысь Вуж Варашысь «Югдон». Празднике вуылэмзы сярысь «Инвожо» ансамблен кивалтӥсь Ирина Шарафутдинова вера:

- Кылем арын Москвае Гербере ветлӥмы вал. Туэ Санкт-Петербурге вуылыны шуд усиз. Бадӟым тау Ижевскысь камсьӧр удмуртъёслэн огазеяськонэнызы кивалтӥсьлы Флюра Чибышевалы. Со трос кужымзэ понӥз, ми, Башкортостанысь удмурт ансамбльёс, та ужрадэ мед пыриськомы шуыса. Милемын ӵош Ижевскысь «Ӟаныкай» фольклор коллектив но Гербере ветлӥз. Удмурт празднике лыктэмъёс башкир музъемын улӥсь удмуртъёслэсь кырӟанъёссэс, эктонъёссэс тунсыкъяськыса кылзӥзы-учкизы. Коллективъёсты тау карон гожтэтъёсын пусйизы. Туж шулдыр ветлӥм, одӥг семья кадь. Шаермылэсь уйпал столицазэ адӟим, городлэн тужгес тодмо интыосаз но вуылӥм. Та ужрадэ вуылэммы малпанъёсамы котьку улоз.

Герберын пӧртэм тематической площадкаос ужазы. Пӧраськон-пыжиськон площадкаын удмурт калык пӧръёсын тодматӥзы, отын куноосты табанен, перепечен пумитазы. Мылкыд карисьёс вӧсяськем ӝук пӧзьтонэ пыриськыны, вӧсям ӝукез веръяны быгатӥзы. Крезьгур площадкаын фольклор коллективъёслэн кырӟан-эктонъёссы чузъяськизы. Праздникын ярмарка но ужаз. Удмурт Республикаысь но Ленинград улосвылысь киужъёсъя юртъёсысь кибашлыос декоративно-прикладной творчествоя ужъёссэс возьматӥзы.

Миляуша НИГАМАТУЛЛИНА.