Из сюлэмо анайёс

Ольга Гильмурановалэсь «Ошмес» газетэ потэм «Нылпи йыртэмасен уг вордӥськы» материалзэ лыдӟыса, малпаськонэ уси. Зэмзэ но, улонэз яратӥсь но валась анай аслэсьтыз нунызэ нырысьсэ кияз кутыкуз ик шораз мусояса учкоз. Но вань сыӵе анайёс но, кудъёсыз пиналзэс уг утялто, нунызэс контейнере кушто яке эмъюртэ кельто.

Оштолэзе телевизор пыр Россия каналын «Ташлама эни» передача возьматӥзы. Пичи нуны шумпотыса лыктӥз, луоз, та югыт дуннее. Нош маин меда со янгыш? Пичи пинал анаез борды ӝиптӥськыса но уг вуы, сое кулэтэм каро. Сыӵе луэ меда анай, кышномурт?

Вормон праздниклы сӥзьыса но сюлэмез позыртӥсь передачаос луизы. Одӥгаз возьматӥзы, кызьы нылпиосты улэп кельтӥллям. Туннэ со пиналъёс асьсэос песянай но песятай ни. Передачаын соос тодэ ваёнъёсынызы люкиськизы. Одӥгезлэн верамез котькинлэн сюлмаз мур пыӵаз, вунонтэм кылиз, луоз. Одӥг городэз (нимзэ кылытэк кыли) мозмытэмзы бере, бомбоубежищее нырысь ик командир пырем. Соку син азяз усем гольык кышномурт. «Быстрее одевайтесь, сейчас зайдут солдаты!» - кеськем солы пиосмурт. Нош собере валатскем, нылкышно аслаз дэременыз соку гинэ вордскем нунызэ шобыртэм шуыса. Солдатъёс пырыса, пиналэз биньыны асьсэлэсь портянказэс сёто, нош нылкышно аслэсьтыз дэремзэ дӥся.

Малы та кык учыръёсты гожтэмме валады ни, дыр. Секыт жугиськон аръёсы но анай пиналэз сярысь сюлмаське. Нош туннэ нуналэ, юнгес малпаськид ке, нылпидэ будэтыны пӧртэм луонлыкъёс кылдытэмын. Кыӵе сюлмын, мар малпаса меда анайёс нылпиоссэс кушто? Кызьы уйёссэс изьыны быгато на меда соос?

Ураметӥ ортчись пиналъёс шоры кыӵе шумпотыса учконо. Кыӵе визьмоесь, мусоесь адӟисько соос ураметӥ велосипедэн ортчыкузы. Нылпиос асьмелэсь улонмес азинто. Соин ик соосты пыд йылазы йыг-йыг султытоно, улон шоры валаса учкыны но сое яратыны дышетоно.

Мария

Александрова.

Янаул ёросысь Шудек гурт.