Вань иворъёс
Общество
18 Июля 2018, 16:47

Шумпотонэн мед пиштоз нылпиослэн синъёссы

Нырысетӥ гудырикошконэ «Усточикар» лагерь ӧсъёссэ усьтоз

Башкортостанысь удмуртъёслэн национально-культурной, историяя но культурая центръёссы туэ но «Усточикар» лагерез радъяло. Бадӟым ужез вормыны соослы коньдон ласянь юрттозы Башкортостанысь Егитъёслэн политиказыя кун комитет но Калыкъёслэн эшъяськон юртсы. Со сяна, анай-атай нылпиез понна 2500 манет коньдон тыроз.

Лагерьлэн ужпумъёсыз: удмуртъёслэн культурно-этнической узырлыкъёсынызы тодматон; нылпиослэсь быгатонлыкъёссэс шараян но волятон; ужез но вордскем шаердэ гажаны дышетон; ог-огдэ валан, гажан мылкыд пыӵатон но мукет.

Лагере лыктыны быгато 6-10-тӥ классъёсын дышетскись, удмурт кылэз тодӥсь пиналъёс. Соослэн сьӧразы таӵе документъёссы луыны кулэ: вордӥськемзы сярысь свидетельствозы яке паспортсылэн (пропискаен) копиез, ИНН, пенсионной страховой свидетельство, дерматологлэн но педиатрлэн йылпумъянъёсынызы ф.079-У медицинской справка, СЭС анализъёслэн результатъёссы, инфекционной висисьёсын кусып возьымтэзы сярысь справка (ф. №291), нылпилэн страховкаез, «Ошмес» газетлы 2018-тӥ арысь кыкетӥ паларлы гожтӥськемзы сярысь квитанция но удмурт дӥськут.

Пиналъёсты лагерь таӵе адресъя вите: Башкортостан, Татышлы ёрос, Вязовка гурт, Комаров нимо ужан но шутэтскон нылпи лагерь. «Усточикар» 10 нунал ужалоз.

Творческой лагерьлэн программаез: анай кыллы но культуралы дышетон, творческой мастерскойёсын ужан, спортивно-оздоровительной но культурно-массовой ужрадъёс радъян.

Нуналлэн радлыкез:

9.30-13.00 творческой мастерскойёсын ужан;

14.00-16.00 – спортивно-массовой ужрадъёс;

17.00-19.00 – ӝыт ортчись ужрадэ дасяськон;

19.30-21.00 конкурсъёс, викторинаос, КВН но мукет ужрадъёс;

21.00-22.30 – дискотека.

Творческой мастерскойёс: «Кызьпу туй», «Дӥськут дизайн», «Эстрада», «Фольклор», «Театр», «Журналистика».

«Дӥськут дизайн» направление вуисьёслы сьӧразы кутоно: басма кесэгъёс, вуриськон сӥньысъёс, вень, качы, тесьмаос но мукет чеберъян арбериос (чильтэр, лентаос), бирдыос. Бадӟым нылъёслы: кык метр однотонной, чуро яке клеткаен басма (дэремлы), 20-50 см однотонной яке сяськаё басма (оборкалы), вить бирды. Пичи нылъёслы: мунёлы мында басма (дэремлы но оборкалы), мунё.

Нылъёс одно ик вашкала дэремъёссэс мед ваёзы - соосъя вурозы дэрем. Чеберъяськонъёссэс (чыртывесь, сакал, пельугыос), ялыкъёссэс, тупась туфлизэс яке ботинказэс вунэтоно ӧвӧл.

Журналистика направление фотоаппаратэн вуоно. Пиналъёслы сьӧразы басьтоно гожъямъёссэс. Нош видеомонтаж лэсьтыны быгатӥсьёслы асьсэлэн ноутбукенызы лыктыса умой луоз.

Кылдэм юанъёсын БР-ысь удмуртъёслэн историяя но культурая центразы (34778) 3-21-91 номеро телефонъя вазиськоно, e-mail: udmikz@bk.ru яке БР-ысь удмуртъёслэн НКЦ-енызы кивалтӥсьлы С. Г. Гарифуллинлы. Тел.: 8-937-155-43-44, 8-927-323-14-03.