"Сезьы кыд"

Со янгышаны уг быгаты. Аслаз малпамезъя, со котьку, котькыӵе ужын шонер сюрес, ӟеч амал шедьтыны быгатэ. Солэн быдэстымтэ ужез ик ӧвӧл. Со оске Инмарлы. Мукетъёс азьын сям-йылолъёсты утьыны тыршемзэ но адӟытыны выре.

Нош палэнысен учконо ке?..

Со – кышкыт маке, кудӥз ас сярысьтыз гинэ малпа. Ортчись-мынӥсьёсты синйылтытэк, урод кылъёсын пайдаяське: «кырсь» кылъёс огез бӧрсьы огез, сезьы кыд выллем «пазьгисько». Нош кӧня ке дыр азьвыл, со Инмарлы оскемзэ возьматэ вал. Солы номыр кадь ӧвӧл, лэся. Солэн аслаз законэз: черкын (церковь) - куриськоно, нош улонын – жугиськоно.

Со туж яратэ ушъямез. Солэн нимыз калыке вӧлмемын мед луоз, гадяз медальёс мед чилялозы, шыкысаз – тросгес Данъян грамотаос но тау карон гожтэтъёс. Зэмос данлэн кызьы вуэмез сярысь со уг малпаськы. Туннэ со огез доры тыро «пуйыен» вуоз, ӵуказе матысь эшсэ «пожвуаны» но уз кышка. Солэн малпамезъя, дан – со, шуом, сверхестественной маке.

Коньдонэз со туж яратэ. Уй-нунал ваньбур люкан сярысь малпаське.

Солэн улон дунлыкъёсыз, лул-пушез сярысь вераны туж шуг. Котырысьтыз адямиос солэсь вылтуссэ гинэ тодо, пуш дуннезэ со нокинлы уг возьматы. Мукет кылын вераса, вылаз – ыж ку, пушказ – кион. Адямилы ӟечлык лэсьтон сярысь со ноку уг малпаськы. Дугдытэк, йыгмыт вамышъёсын аслыз гинэ быръем сюрестӥз азьланьтэ улонзэ. Ас азяз пуктэм куронъёссэ быдэстон вылысь, со танк выллем мынэ. Со нокинэ уг жаля, жалямъяське гинэ. Со ассэ гинэ яратэ.

Малпасько, уйёсы со шыпытак гинэ Инмарлы вазиське-йыбырттэ, дыр. Уго со сьӧлыко. Со ӟеч тодэ: жагез пӧзись ву ярдуре одно ик куштэ. Пеймытын гинэ солэн бам кузяз синвуосыз васько. Солэсь бӧрдэмзэ нокинлы адӟыны-кылыны уг яра.

…Малы меда адямилэн тусбуезъя солэсь пуш дуннезэ шараяны уг луы? Малы меда котырысь адямиослы, матысьёслы, яратоно муртъёслы шуныт, небыт кылъёс, ӟеч ужъёс лэсьтон мылкыдын гинэ ум улӥське?

Миляуша

НИГАМАТУЛЛИНА.