Ау, ӟеч...лык...

Арлыдоос та юанлы ӟечлык, зэмлык шуыса вераны тыршозы. Нош егитъёс кема малпаськыса уз улэ, одно ик коньдонэз вылӥе пуктозы. Озьы ке но сюлэмлэн ялан ӟечлыклы оскемез потэ. Ӟечлык понна дурбасьтӥсьёс но быремын ӧвӧл на, дыр. Синъёсыным пӧртэм интернет эскеронъёсты учкисько. Тани ук ӟечлык сярысь тросэз верало, улонысь пӧртэм учыръёсын но тодмато.

…Ӵукна ужысь бертӥсько. Подъездэ пырыку бадӟымесь букваосын гожтыса лякем тетрадь бам син шоры йӧтӥз. Матэгес лыктыса лыдӟисько: «Туннэ 9 час 20 минутын подъездын 120 манет коньдон ыштэмын вал. Коньдонэз шедьтӥды ке, 76-тӥ квартираын улӥсь Антонина Петровналы пыртэ. Пенсионер 6640 манет пенсия басьтыса улэ». Коньдон пуйыысьтым 120 манет коньдонме кутыса 76-тӥ квартира доры вамыштӥсько. Ӧс бордысь кнопкае зӥбисько, ӧсэз песянай усьтэ. Коньдонэным киосме азьлань мычыса вераны дыртӥсько:

- Тани коньдонды, мон шедьтӥ.

Нош песянай синкылиен тырмем синъёсын шорам учкыса вера:

- Ой, пие, коньдонме шедьтӥсь дасэтӥез адями луиськод ни тон.

Песянай дорысь кошкыку, подъездмы тыр кеськем потӥз:

- Адямиос, мон яратӥсько тӥледыз!

…Бадӟым городысь одӥгаз урамын синмыз адӟисьтэм песятай кураськыса пуке. Нош мискиньлы коньдон сётӥсь ик ӧвӧл. Вӧзтӥз ортчись егит ныллы песятай жаль потӥз. Нылаш со доры дугдӥз но коньдон тырон коробкаез борды таӵе гожтэм кылъёсты лякыса кельтӥз: «Туннэ шулдыр нунал, шунды яркыт пиштэ. Нош мон шундыез но, та нуналэз но адӟыны уг быгатӥськы».

Ӝытазе нылаш нош ик песятай вӧзтӥ ортчоно луиз. Песятай юаз солэсь:

- Нылы, мар тон карид, малы тон бӧрсьы адямиос коньдонзэс жалятэк сётъяны кутскизы? Пумитаз нылаш шуиз:

- Мон кӧня ке кылъёс гинэ гожтӥ.

…Шуак куазь зорыны кутскиз. Уж дурысь эшъёсы машина котырам кин ке но ветлэ шуыса веразы. Мон бызьыса ураме потӥ. Урамын нокин ӧй вал, куазь зор пушказ медаз пыры шуыса, машинаелэсь укнооссэ кин ке ворсаса кельтэм.

…Институтысь дышетскыса бертыку, асфальт вылын пукись песятай син шоры йӧтӥз. Планшет вылын ожын басьтэм орденъёсыз но медальёсыз. Вӧзаз лыктӥ, ветеранлэсь вузаны дасям орденъёссэ кияз сётыса верай:

- Ме, песятай, дандэ эн вуза, ортчем ож сюрестэ нокыӵе коньдонэн но уд вошты, медальёстэ дунтэм дунын басьтӥсьёс возьдаськонэз ноку уз валалэ.

Песятайлы быдэс толэзь ужам коньдонме ке но сётыса кельтӥ, сюлэмам капчи но каньыл луиз. Нош песятай орденъёссэ кутыса сюлэм бордаз љиптӥз:

- Тау тыныд, нылы, – кылӥ азьлань вамыштонъям.

Улонын та выллем учыръёсын трос пол пумиськоно луиське. Котькуд адями ӟечлыкез пунэмтэк лэсьтыны быгатэ, нош лэсьтэм ӟечлык, ас дорад ӟечлыкен ик берытске, шуо. Та учыръёс сярысь лыдӟыса, сюлэмам оскон кылдӥз: њечлык вань, ӟечлыкез лэсьтоно, ӟечлыкез синйылтыны кулэ, соин мукетъёсын но люкиськыны быгатоно.

Ирина ХУЗИАХМЕТОВА.