«Мыным «Ошмес» но «1000 советов» гожты»

Арнялы быдэ удмуртъёс сярысь выль иворъёсын вуись газетэз со чидатэк вите. «Ошмес» вуэмлы быдэ таяз номерын кинъёсты поттӥлям меда шуыса тунсыкъяськисько, пе. «Гурт калык сярысь гожтэмъёсты лыдӟыны яратӥсько», - вера газетмылэн эшез.

Дамира апайлэн аслаз но уж сюресэз гурт удысэн герӟаськемын вал угось. Со фермаын кунян утиз. «Газетэз огмы бере огмы учкиськом, - вераськонамы итӥське Кызыл-Яр фермаын операторын тыршись кузпалыз Владислав агай. – Нылпиослэсь гожъямъёссэс лыдӟыны яратӥсько, тунсыко потэ».

«Ошмесэз» сяна, Садриханов кузпалъёс «1000 советов» журналэз но ярато. «Газет-журналъёслы гожтӥськон вакытэ Дамира апай котьку мыным «Ошмес» но «1000 советов» гожты шуэ», - вера Кызыл-Яр почта ёзэтэн кивалтӥсь Лидия Мукаева.

Марина НИКОЛАЕВА.