-15 °С
Яркыт
Антитеррор
Вань иворъёс
Общество
13 Июля 2018, 13:15

Арлыдоос пиналмо

Инвожо толэзе таӵе суред син азям йӧтӥз: кык этажъем юртлэн тубатъёсыз кузя 40 ареслэсь бадӟымгес нылкышно вамыштэ. Шӧдӥське, солэн котькуд вамышез секытэн сётӥське. Нылкышнолэн 30 арессэ тырмемез бере ик пыдъёсыз, пе, висьыны кутскиллям. Со шоры учкыса, шӧдтэк шорысь йырам малпан чилектӥз: «Сӥзьыл нылкышноосты тямыс ареслы «пиналмытӥзы» ке, уж дуразы соос кызьы вамыштозы меда?» 14-тӥ инвожое Россиысь Правительстволэн Тӧроез со сярысь вераз вал угось. Туала вакытэ тросэз, пе, пенсие потэмзы бере но ужысьтызы кошкыны уг дырто. Кивалтэтлэн малпамезъя, калык табере кема улэ, шаерамы пенси басьтӥсьёслэн лыдзы йылэ…

Куд-ог нылкышноослэн но пиосмуртъёслэн пенсие потэмзы бере но ужаны быгатэмзылы шумпотоно, дыр. Озьы ке но соосты ваньзэс одӥг мерттэтэн уд мерта. Аръёс ӵоже гуртын скал кыскем, пудо вордэм адямиослэн пенсие потэмзы бере уж дуразы вамыштэмзы потоз на меда? Соосты ӝӧк сьӧрын пукем адямиосын уд ӵошаты ук. Скал кыскисьлэн киосыз но соослэсь ог дасо аръёслы вазьгес сюрмо, дыр. Зэм, ӝӧк сьӧрын пукисьёс пӧлын но пӧртэмез вань. Соослэн ваньзылэн малпанзы, быгатонлыксы туала улон сьӧры уиськыны быгатэ на меда? Визьмо компьютеръёс но адямиез быдэсак воштыны уз быгатэ ук.
Кивалтэт оскытэ: воштӥськонъёс бере секыт (кышкыт) производствоын тыршисьёслэн льготазы утиськоз. Соос пенсие вазьгес потозы. Нош асьмелэн фермаосамы пудо вордозы, бусыосамы ю-нянь будэтозы 63 аресозь нылкышноос но 65 аресозь пиосмуртъёс. Соослэн ужзы секыт производствое пыртэмын ӧвӧл. Но… таӵе закон кутэмын ӧвӧл на. Соин, гажано песяйёс но песятайёс, арлыддэс вунэтыса, калыкмы понна тырше. Нош сӥзьыл тододы: тӥ егитомемын яке мӧйымемын.
Олеся САДЫКОВА.
Читайте нас в