Калыклы юрттыны быгатонзэ 17 аресаз шӧдэм

Гуртысь школаез быдтыса, Замира Чайковский городысь медицинской колледже дышетскыны мынэм. Сое йылпумъяса ужаны интыяське но тодон-валанзэ узырмытон сярысь сюлмаське на. Озьы Замира медакадемиын ВСО менеджер факультетын дышетске.

Замира Вотинцева гуртысьтызы Олег нимо пиен семья кылдытэ.

- Кузпалы пӧртэм пудоосыз вордыны но пӧйшуръёсыз утьыны яратэ, усто пӧйшурась но со, - вера Замира.

Кузпалъёс городысь вордскем гуртазы улыны выжизы.

- Ми куинь ар ни гуртын улӥськом. Вордскем шаер бордаз кыске.

Кузпалъёс улон сюрестӥ кызь ар ӵоже ни ӵошен вамышто. Соос кык нылпи будэтӥзы: пи но ныл. Нылпиоссы кыкназы но вылӥ тодон-валанэн.

Замира массажист, парапсихолог но менеджер гинэ ӧвӧл, со мукет быгатонэныз но висъяське – адямилэсь вуонозэ вераны быгатэ. Замира сыӵе быгатонэз вань шуса тодэм 17 аресаз.

- Мар ке но шӧдӥсько ни вал. Нош собере ваньзэ адӟыны кутски. 25 аресысен адямиослы юрттон борды басьтӥськи. Та нуналэ но мон котькуд адямилы юрттыны дась, трос адямиос мон пыр пото. Котькудӥныз аспӧртэмлыко ужасько, - вера со.

Тунась доры пӧртэм мугъёсын лыкто. Тросэз вуо тазалыксы, азьпал сюрессы, семьязы, яратонзы, нылпиоссы, ужзы сярысь юалляськыны.

- Тӥ семья кусыпъёсты тупатон бордын ужаськоды а? – юасько солэсь

-Ужасько, тросэз асьсэлэсь янгышсэс кӧня ке дыр отрчыса гинэ валало. Вань сыӵе учыръёс но: нырысь яратонэнызы люкисько но собере валало, со мынам яратоно адями вылэм шуыса. Тросэзлэн пиналъёслэн куспазы анай-атайзы пыро, озьыен, асьсэ нылпизэс шудтэм кельто.

Замира апай доры юрттэт курыса шаермылэн пӧртэм сэрегъёсысьтыз адямиос вуыло. Кунгож сьӧрысь лыктӥсьёс но, пе, вань. Нош ассэ Ямалэ, Ханты-Мансийске, Москвае, Екатеринбурге, Уфае, Удмуртие ӧтьылӥллям ни.

«Адямилы улон одӥг пол гинэ сётӥське. Сое вожмаськытэк, ог-огеныд тупаса ортчытыны тыршоно. Вунэтоно ӧвӧл, адямилы пумит лэсьтэм урод уж куке но ас дорад берыктӥськоз шуыса», - малпанъёсынызы люкиське со.

Замира апайлэн тунсыкъяськонъёсыз сярысь но юаськытэк ӧй чида. «Туж яратӥсько сяськаосты будэтыны, соос бордын ужаны, - вера со. – Но, жаляса верано, куазь кезьыт луэмен, туэ соос чебер ӧз ӝужалэ. Семьяме пӧртэм ческыт сиёнъёсын кунояны яратӥсько на».

Виктория КИРЬЯНОВА.