-16 °С
Лымы
Антитеррор
Вань иворъёс
Общество
6 Июля 2018, 16:55

Яратонлэн нуналаз нылзы вордӥськиз

Тросэз понна семья – со номырин воштыны луонтэм узырлык. Та кылэз котькин ас сяменыз ке но вала, кин ке понна семья – со матысьёсыз, мукетыз понна – со яратоно адямиез, куинетӥез понна – со бадӟым юрт, трос нылпиос, семья – со шуд. Озьы ик малпало Татышлы ёросысь Калмияр гуртын улӥсь егит кузпалъёс Светлана но Денис Мардамшинъёс. Улысь Балтач гуртысь нылашлэн но Калмиярысь пияшлэн улон сюрессы 2007-тӥ арын герӟаськем.

- Ми 2006-тӥ арын Выль Татышлы сабантуйын тодматским, - вера Светлана. – Но Денисэз соку нырысьсэ ӧй адӟы, сое мон азьвылгес ик тодӥсько вал. Школаын дышетскыку кырӟанъя ёрос конкурсъёсы, ӝӧквыл теннисъя ёрос ӵошатсконъёсы ветлылӥ. Денис но со ужрадъёсы пыриське вал.
Кузпалъёс дас арлэсь ятыр ни улон сюрес кузя артэ вамышъяло. Трос-а со, ӧжыт-а? Огласянь учконо ке, дас ар туж бадӟым лыдпус ӧвӧл кадь. Нош быдэстэм ужъёсты, вормонъёсты, пыр потэм шуг-секытъёсты лыдъяно ке, дас ар – со кузь сюрес. Мардамшинъёс – кык полэс анай-атай. Кузпалъёслэн яратон емышъёссы - Виктория но Инесса нылъёссы - будо. Бадӟымез нылзы Виктория ӵапак Яратонлэн нуналаз, 8-тӥ пӧсьтолэзе, вордӥськем. Макем бадӟым кузьым анай-атай понна!
Школазэ йылпумъяса, Денис Кушнаренкоысь гурт хозяйствоя техникумын агрономлы дышетскем. Стажировказэ со Германиын ортчем. Али егит ӧнерчи ёросысь одӥгаз азветлӥсь хозяйствоын, «Агро-Танып» СПК-ын, ужа. Ужзэ со тодыса, ӟеч быдэсъя. Тани кык ар ӵоже ни таныпъёс растениеводство ӧрын ёросын нырысетӥ интыын мыно. 2015-тӥ арын Денис БР-лэн Данъян грамотаезлы кузё луиз, гурт продукци поттонын вылӥ лыдпусъёс возьматэмез понна. Нош Светлана – крезьгуръя дышетӥсь, Выль Татышлы школаын ужа. Со Бирскысь социально-педагогической академиын тодон-валан басьтэм. Пичиысен кырӟаны яратэмез, жингрес куараез солы аслыз ӧнер бырйыны но юрттӥллям.
Крезьгуръя урокъёс нуон сяна, Светлана Борисовна нылпиослы нимысьтыз кружокъёс но радъя. Азьлогес эктонъя кружокен кивалтӥз. 2012-тӥ арын, кылсярысь, солэн пиналъёсыз «Звонкий каблучок» республика конкурсэ пыриськизы, Уфаын соос усто быгатонлыкъёссэс возьматыса, финалистъёс луизы. Солэн ужез Башкортостанысь Дышетонъя министерстволэн данъян грамотаеныз пусъемын.
- Кылем арын «Карамельки» вокал ансамбль кылдытӥ. Нырысетӥ вормонмы но вань ини: «Весенняя капель» ёрос конкурсын асьмелэн возрастной группаямы нырысетӥ интылы кузё луим, - вера дышетӥсь.
Мардамшинъёс – крезьгуро семья шуи ке но, янгыш уз луы. Денис но кырӟаны яратэ, Викторияен Инесса но анай-атайзылэсь бере уг кылё. Ёросын радъяськись «Гарейка крезьгуръёс», «Жингыртэ удмурт кырӟан», «Ари дурысь уӵы» конкурсъёсы соос котьку пырисько, вормисьёс пӧлын луо. Спорт ӵошатсконъёсты но соос уг кельто: теннисэн шудонъёсы ӵем пырисько. Пудо, чипы-курег вордыны но Мардамшинъёс дыр шедьто, сад-бакча но утялто.
Котькуд адями улон сюрессэ ачиз шедьтэ но радъя. Мардамшинъёс город улонэз бырйиллямтэ, гуртын улыны мылкыд кариллям. Секыт ужъёслэсь кышкатэк соос йыгмыт азьлань вамышто, улонлэсь котькуд шулдыр но дуно минутъёссэ семьязылэн «зарни шыкысаз» люкаса.
Миляуша БУЛАТОВА.
Татышлы ёрос.