"Ошмес" газет мӧзмыку но юрттэ

Нагима апайлэн вордӥськем шаерез - Балтач ёросысь Асавка гурт. Вуоно кузпалыныз со Нефтекамске агаез доры куное лыктыса тодматскем. Кайрановъёслэн семьязы 1973-тӥ арын кылдэмын.

Александр Ибраевич Татышлы ёросысь Улысь Балтач гуртын вордӥськыса будэм. «Тямыс классэз йылпумъяса, кык ар бускель Бигиней гуртысь школаын дышетски. Школаез йылпумъям бере, Нефтекамскысь 47-тӥ номеро технической училищее дышетскыны пырыны малпай. Документъёсме конвертэ поныса, почта пыр ыстӥ. Тӥни озьы мон Нефтекамске вуи, татчы ик выжы лэзи. Пенсие потэм бере Кутлинкае инты басьтыса, корка ӝутӥм», - пальпотыса вера А. И. Кайранов. Александр Ибраевич мувӧй поттонъя операторлы дышетскем. Кияз диплом басьтэм дырысеныз, 1967-тӥ арысен, со быръем удысаз тыршем. «Уж сюресме «Южарланысен» кутски. Нырысь качалкаосты эскерисьлэсь ужзэ ӵектӥзы. Одӥг ар ужай но, армие басьтӥзы. Куать толэзь Владивостокын луи, собере Чукоткае лэзизы, радиотелефонист вал. Арми бере, 1971-тӥ арысен, бурильщикын ужай. Та ӧнерлы Ишимбайын тодон-валан басьтӥ. Пенсие потытозям та ужме ик быдэсъяй», - шуэ арлыдо пиосмурт.

Бурильщиклэн ужез капчи ӧвӧл. Озьы ке но А. Кайранов ужзэ котьку ӟеч, интыяз вуттыса быдэсъям. 2009-тӥ арын сое Россия Федерациысь Энергетикая министерстволэн Данъян грамотаеныз данъяллям.

Нагима Рахимьяновналэсь ужзэ «ческыт уж» шуысал мон. Со кема аръёс ӵоже хлебокомбинатын ужам. «Ужан аръёсы нянь, булочкаос пыжыса ортчизы», - шуэ со. Али но Нагима апай огдышем ужзэ уг вунэты, нылпиоссэ, матысьёссэ со котьку ческытэсь пӧръёсыныз куноя.

Кузпалъёс та дыре пенсиын ке но ини, ужам аръёссэс соос чик уг вунэто, утэм вормонъёссы сярысь шумпотыса тодазы ваё, малпанъёсынызы егит дыразы берытско.

Миляуша БУЛАТОВА.

Краснокама ёрос.