"Эшъёс луоме, ог-огмес гажаса уломе"

Тулыс бусы ужъёслы йылпумъян лэсьтон ужрадэ Удмуртилэн ёросъёсысьтыз, бускель регионъёсысь но Санкт-Петербургысь куноос вуизы. Башкортостанлэн делегациез но Герберын шулдыръяськиз. Азьпалтыса верасько, Татышлы ёросысь Калмияр гуртысь «Инвожо» удмурт фольклор ансамбль (кивалтӥсез И. Шайсламова) Герберысь тау карон гожтэтэн бертӥз. Таӵе ик вормонэн вуиз Пермь шаерысь Бадӟым Гондырысь «Тюрагай» удмурт калык коллектив но (кивалтӥсез Ф. Гарифуллина).

Гырон быдтонлы, гурт удысын ужасьёсты данъянлы сӥзем праздник туж шулдыр пӧрмиз. Та нуналэ бусы ужъёссэс ӝог но ӟеч быдэстэм хозяйствоосты пусйизы, усто тракторист-машинистъёсты данъязы. Нянь будэтӥсьёсты данъяса но ӟечкыласа вераськизы УР-ысь Правительстволэн тӧроез Ярослав Семёнов, УР-ысь Кун Кенешлэн тӧроез Алексей Прасолов, «Удмурт Кенеш» ассоциацилэн тӧроез Татьяна Ишматова но мукетъёс. «Ӟечбуресь гажано эшъёс, ужась,тыршись, быгатӥсь, йӧно, чебер удмурт калык. Мон вань сюлмысьтым ӟечкыласько ваньдэс та сӥё-дано нуналэн, куке асьмеос ужъёсты быдэстыса, ог-огенымы пумиськыса, быгатӥськом шулдыръяськыны, ог-огмылы яратон кылъёсмес вераны. Туннэ нош ик Удмурт Элькун котыраз люказ вань удмуртъёсты, кудъёсыз уло палэнын но. Туннэ ува музъеме пиналъёс но, егитъёс но люкаськемын. Соос адӟо, макем шулдыр ортче та праздник. Мон тау кылъёсме верасько со адямиослы, кин Герберез «улӟытӥз». Соос туннэ ми пӧлын – Альберт Алексеевич Разинлы, Валентин Кузьмич Тубыловлы. Бадӟым тау, эшъёс, мылкыд каремдылы, удмурт дӥсьёсын лыктэмдылы. Мед чузъяськозы асьме музъем вылын удмурт сямъёс. Эшъёс луоме, ог-огмес гажаса уломе. Праздникен тӥледыз!» - Гербере лыктэмъёслы вазиськыса шуиз Татьяна Витальевна.

Вашкала ӵыжы-выжыосмы Гербер дыръя вӧсясько вылэм. Та йылол туннэ нуналэ но ышымтэ: котькуд делегация празднике пичи мешокен кенер вайыса лыктэм. Соосты одӥг бадӟым пуртые тырыса, ӝук пӧзьтӥзы, вӧсясьёс шудо, тыро-буро улон курыса, Инмарлы вазиськизы. Куриськем ӝукез котькин веръяны быгатӥз. Пусъёно, Герберын ӝук пӧзьтыны огъя 200 килограммлэсь ятыр кенер кулэ луэм. Удмуртилэн Тӧроезлэн но правительстволэн пресс-службазы ивортэмъя, туэ удмурт калык празднике дас сюрслэсь трос адями пыриськем.

Празднике лыктэмъёс Ува ёросысь удмуртъёслэн Воршудъёсынызы – Тукля, Жикья, Чунча, Пельга, Можга, Зумья, Вамья – но тодматскыны быгатӥзы. Ужрадлэн торжественной люкетаз Герберлэн вуоно арын кытын ортчемез но тодмо луиз: Ува ёрос администрациен кивалтӥсь Владимир Головин Игра ёросэн кивалтӥсьлы Александр Чирковлы праздниклэсь киысь кие выжись символзэ – Кылдысинлэсь статуэтказэ – сётӥз.

Та нуналэ куноос понна пӧртэм площадкаос ужазы. «Усточикарын» декоративно-прикладной искусствоя усточиос асьсэлэн ужъёссыя презентациос возьматӥзы. «Эктон лудын» котькуд мылкыд карись адями удмурт но финн-угор калык эктонъёсты дышетыны быгатӥз. «Жингрес возьвылэ» концерт учкыны мылкыд карисьёс люкаськизы. Сцена вылын кырӟазы но эктӥзы удмурт творческой коллективъёс. Нылпиос понна «Шудон азбар» ужаз. «Батыр шудонъёс» площадкаын пиосмуртъёслы нюръяськонъёс радъяськизы. Арлы быдэ Герберын муниципал огазеяськонъёсын кивалтӥсьёслы ӵошатсконъёс радъясько. Кылем арын соос герыен гыронын кужымзэс эскеризы вал, нош туэ соослэсь веник керттыны быгатэмзэс дунъязы.

Ужрадэ лыктэм делегациосты Удмуртиысь пӧртэм предприятиос, организациос куноязы. Башкортостанысь делегация тау кылъёссэ вера «Павловское» муниципал огазеяськонлы (кивалтӥсез Т. Н. Ермакова) но «Авангард» СПК-лы ( кивалтӥсез Ф. М. Халитов) шуныт пумитамзылы, задор мылкыд кузьмамзылы.

Азьло вапумъёсын ӵошатоно ке, туннэ Гербер, удмуртъёсты сяна, мукет калыкъёсты но пумита. Вуюись тусо калык дӥськутъёсын пишто соос луд вылын, кытын дугдытэк чузъясько кырӟанъёс, крезьгуръёс улсын быдэстӥсько эктонъёс. Гербере вуылэм мурт та нуналэз котьку тодаз возёз.

Миляуша БУЛАТОВА.

Удмурт Элькун.