Пипу тӧлтэк но шильыртэ

Иворез воштыса веран

Студент аръёсам психология урокын дышетӥсь таӵе эскерон ортчытӥз: висъетэ дышетӥсь но студент кылизы, мукетъёсты со ӧс сьӧрын витьыны куриз. Аудиторие кылем студентлы дышетӥсь выль ивор вера. Коридорысь кыкетӥ студентэз ӧтё но, нырысетӥ студент солы выль иворез вера, кыкетӥез – куинетӥезлы, куинетӥез – ньылетӥезлы… Озьы выль ивор студентъёс пӧлы вӧлме. Но берпуметӥ пырись доры вуытозяз, ивор чылкак воштӥське, дышетӥсьлэн нырысетӥ студентлы верамезлы уг ни тупа. Малы? Кызьы пусъе дышетӥсь, нырысь, пересказ лэсьтыку, асьмеос кылъёсты пуштроссыя ог-огзылы матын луись кылъёсын (синонимъёсын) вошъяськом. Кыкетӥез, мадись иворлэн сыӵе люкетэзлы саклык висъя, кудӥз солы тужгес кельше. Куинетӥез, адямилэн сознаниезлэсь но со уте: ивор вадьсы аслэсьтыз малпанзэ одно ик «ляке».

Иворез юри воштыса веран

Кыл нуллон пумысен вераськон кема кыстӥськиз, пуштросо пӧрмиз. Психологиен дышетӥсь иворез юри воштыса веран сярысь но трос пайдаё информация сётӥз. Кылсярысь, тынад матысь эшед Оксана, шуом, тамак кыске. Тон сое валаськод, уд пыкылӥськы. Со тынад матысь эшед угось. «Оксана огдыре секыт югдуре шедиз: организацизы пытсаськемен, со коньдоно ужзэ ыштӥз. Нырысь мар карыны ик паймемын вал. Соку ик со тамакен герӟаськиз. Ярам хоть ӟенелик борды ӧз кырмиськы», - эшед сярысь уродзэ медаз малпалэ шуыса вераны тыршиськод. Нош Регина сярысь ке верано? Тон соин школаысен ик уд «тэриськы». Со сярысь шуиськод: «Со кемалась ини кыске. Нуны витьыкуз но мон сое тамакен адӟылӥ. Мар анай со? Нуныезлы ческыт кампет басьтон интыяз вуз карон юртэ тамаклы пыра…» Огъя вераса, адями тыныд кельше ке, тон со сярысь уродзэ уд вера. Нош уг ке кельшы – супыльтоно, йырысеныз пыдозяз «сьӧд» вуэн пылатоно.

Мукетъёс выллем ик

малпано

Дышетӥсьмы одӥг эксперимент сярысь вераз на. Нылпи садысь пичильтыкъёсты вить кузяен карыса группаослы люкылӥллям. Вить пиналъёс пӧлысь ньылезлы юанлы кыӵе валэктон сётыны азьпаласен ик вераллям. Витетӥез гинэ ачиз валэктон сётыны кулэ вылэм. Нылпиос вӧзы визьнодась вуэ но, горд тусъем кагаз возьматыса, кыӵе тус та шуыса юа. Нырысетӥез шуэ «вож», кыкетӥез но - «вож», куинетӥез но - «вож», ньылетӥез но - «вож». Витетӥез пинал тодэ кагаз горд тусъем шуыса, озьы ке но «вож» шуэ, эшъёсыз озьы шуизы угось. Вань нылпиос пӧлысь туж ӧжыт процентэз гинэ кагаз «горд» тусо шуыса веразы.

Кызьы пусйиз дышетӥсь, та выллем ик эскеронъёс бадӟымъёс пӧлын но ортчытэмын. Соос но нылпиослэсь трослы уг висъясько.

Миляуша Нигаматуллина.

P.S. Писпу тӧлтэк уг выреты ке но шуо, пипу тӧлтэм дыръя но шильыртэ шуэмзэс вунэтоно ӧвӧл.