Вань иворъёс
Общество
21 Июне 2018, 14:06

"Нылпиос понна улӥськомы"

Нефтекамск городын улӥсь удмуртъёсын пумиськыкум, котьку паймисько: макем тупаса, ӵошен кариськыса соос уло. Ужрадъёссэс но соос ӵошен дасяло. Огкылын вераса, ужаны но, шулдыръяськыны но быгато.

Уж сюресмы Нефтекамскысь одӥгез азинлыко семья - Рина но Менсалих Абдулхаковъёс доры - вуттӥз. Корка тыр ческыт зын вӧлмемын: Рина апай табань пыже.
- Куноосты табанен кунояно, - пальпотыса вера кухняяз бергась кышномурт.
Рина апай вордскемын но будэмын Янаул ёросысь Конигово гуртын. Тямыс классэз йылпумъяса, со Пермь шаерысь Чернушкае дышетскыны мынэм, штукатурлы тодон-валан басьтэм. Кӧня ке отын улэмез но ужамез бере, анаез секыт висьыны кутскем. Нылаш вордскем гуртаз берытскем, ыж фермаын ужам.
- Нош кызьы тӥ Нефтекамске вуиды? – юасько Рина апайлэсь.
- Апае доры куное лыктӥ. Отысен Менсалихен тодматски. Одӥг ӝыт куспын ог-огмылы синмаським но семья кылдытыны малпамы. Со дырысен ми ӵошен: 44 ар ог-огмылы тыбыр пыкет но, кенешчи но, юрттӥсь но луиськом, - вера кышномурт.
Менсалих агайлэн вордскем гуртэз - Янаул ёросысь Вот. Ошъя. Школазэ йылпумъямез бере, егит пияш сварщиклы дышетскыны мылкыд карем. Аслыз удыс со тодыса быръем, шуыны луоз. Усто ӧнерчилэсь ужзэ котькытын вылӥ дунъяло вылэм. Озьы со пӧртэм интыосы командировкаосы ветлыса ужам. Семьяеныз Семипалатинскын но, Алма-Атаын но улӥллям, Киргизие но вуылӥллям. Ужзэ валаса, ӟеч быдэсъясь Менсалих агай бадӟымесь гидроэлектростанциос ӝутон ужъёсы котькудаз пыриськем. Солэн усто ужась луэмез сярысь верало шыкысаз люкаськем уно грамотаосыз но тау каронъёсыз.
- Киргизиысь Токтогульской, Таш-Кумырской, Казахстанысь Шульбинской ГЭС-ъёс ӝутонын мон луи. Нижнекамской ГЭС ӝутонэ но пыриськи, - вера Менсалих агай.
- Менсалих усто сварщик луэмен, ми дуннеез адӟим. Куке мон Семипалатинске вуысал шат? – ватса Рина апай.
Кузпалъёс Нефтекамске улыны выжиллям 1983-тӥ арын. Рина апай автозаводэ ужаны интыяськем, кема аръёс ӵоже отын уборщица луыса ужам.
Али дыре Абдулхаков кузпалъёс пенсиын. Но соос ужлы паймыса уг пуко, тулысысен сӥзьылозь дырзэс сад-бакчаязы ортчыто. Мар гинэ соос отын уг будэто! Кыӵе отын шулдыр! Убоосысь янгыш гинэ но одӥг жаг турынэз но уд шедьты. Ваньзэ кылын вераса но гожтыса гинэ уд возьматы, соослэсь сад-бакчазэс синмын адӟыны кулэ.
Тодмооссы, бускельёссы Менсалих агаез ушъяса кыкетӥ Мичурин нимало. Со ӟеч, пе, тодэ бакча ужъёслэсь радлыксэс. Улмопуосты прививать карон амалъёсын но кемалась тунсыкъяське ни: солэн садаз будӥсь улмопу кык-куинь сорт улмо сётэ, пе.
Рина апай киужъёсын вырыны яратэ: пӧзьыос, ныросъёс, сяськаос керттэ. Солэн киужъёсыныз городысь музейын радъяськись «Радуга талантов» адӟытонын тодматскыны луэ. Со сяна, кырӟаны яратӥсь кышномурт городысь «Выжы-кум» удмурт фольклор ансамбле пыриське.
Ческыт табанен чай юытозямы, Рина апай быдэс улонзэ мадиз, лэся. Секыт висьыны усемез сярысь но вераз. Солы кышкыт диагноз пуктӥллям.
- Куать ар виси, собере операция лэсьтӥзы. Инмарлы тау, бурмытски. Кызь куинь ар талэсь азьло вал со, - тодаз вае Рина апай.
Туннэ нуналэ кузпалъёс – шудо анай-атай, соослэн кык внуксы но внучказы будо. Песяй-песятайзы доры соос ӵем вуыло.
- Нылпиос понна улӥськом. Соос ик улонэз шулдырто, - шуэ Рина апай.
Миляуша БУЛАТОВА.
Нефтекамск город.