Кызьы тодоно кивалтӥсьлэсь мылкыдзэ?

Гудырикошкон толэзе нылызлэн вуоно нылпи садэныз кивалтӥсьлэн ӧсаз йыгаськиз. «Пыре, ӧс пась», - висъетысь нылкышнолэн чурыт куараез кылӥськиз. Олеся ӧсэз дӥсьтытэк гинэ усьтӥз. Та вакытэ со ассэ бадӟым янгыш лэсьтэм нылпиен кожаз. Кивалтӥсь нылкышноез йырысеныз пыдозяз учкиз но, синъёссэ тетрадьёс шоры лэзьыса юаз: «Мар юанэн вуиды?» Олеся солы ваньзэ пыр-поч валэктӥз. Но малы ке кивалтӥсь солэн юанэзлы валэктон утчаны ӧз малпа. Зэмзэ вераса, со кемалась дась ни вылэм, лэся. «Ваньды татчы вуиськоды. Мукет нылпи сад ӧвӧл шат тӥледлы? Нош милямез пыдэстэм ӧвӧл», - вазиз солэн пумитаз кивалтӥсь. Егит анай йырзэ ошыса, нылпи садысь кошкиз. Та вакытэ со ассэ буйгатыны тыршиз. Нылыз, пе, чылкыт, чебер нылпи садэ ветлэ, соин ӟеч адямиос ужало. Малы бен сое мукетыныз воштыны дыртод? Но озьы ке но сюлэмзэ одӥг малпан позыртӥз: кызьы туала кивалтӥсьёс ужкагазъёссэс учкытэк но калыклы валэктон сётыны быгато? Соослэн йыразы компьютер ватэмын ни оло? Фамилиосты, лыдпусъёсты йырын возён капчи уж ӧвӧл угось.

Кык толэзь ортчыса, Олесялы веразы: нылыз, пе, нылпи садэ ветлӥсьёс пӧлы пыртэмын. Нош малы кивалтӥсь соку пӧяськиз? Валантэм. Олеся выльысь нылпи садэ вуылоно кариськиз. Азьвыл сямен ик ӧсэ йыгаськиз… Табере со аслаз пельёсызлы ӧз оскы: висъетысь небыт куара чузъяськиз. Кивалтӥсь воштӥськем, дыр, малпаз Олеся. Но кабинетын сое азьвыл пумиськылэм нылкышноез ик пумитаз. Со Олесяез пуксьыны куриз. Тетрадьысь, пе, учко кыӵе группае шедемзэ.

- Нош малы азьвылгес ӧд вуылэ? – юаз со анайлэсь.

Олеся кивалтӥсьлы гудырикошкон толэзе пумиськылэмзы сярысь вераз. «Мынам мылкыды луымтэ, дыр, со нуналэ. Асьтэос адӟиськоды ук, кӧня нылпиосын ужаськомы», - вазиз кивалтӥсь солэн пумитаз.

Олеся мар шуыны ик паймиз. Нош кызьы тодоно, ку кивалтӥсьлэн анай-атаен вераськыны мылкыдыз вань? Нылпиос гинэ солэн мылкыдыз луымтэ нуналэ дораз кожыны медаз шедьтэ. Яке соос ваньмызлы дышемын ни? Сое нылпи садлэн борддоръёсыз гинэ тодо, лэся. Нош анай-атай дышемын ни кивалтӥсьёслэн соос шоры таӵе синмын учкемзылы. Соосты угось тросаз уж интыосын та выллем пумитало. Соин ваньзэ чидалозы но вормозы. Пиналъёсты гинэ жаляно: нылпи садэ ке но ӟеч сяммы сьӧры уродэз сюрес медаз шедьты.

Ольга НИГАМАТУЛЛИНА.