-8 °С
Лымы
Антитеррор
Вань иворъёс
Общество
21 Июне 2018, 13:56

«Гурт калыклэн ваньмыз аслаз...»

Митрей агайлэн быдэс улонэз Уйпалан ортчиз. Со бадӟым городын, мувӧй поттӥсьёс дорын ужаз. Пенсие потэмез бере солэн сюлэмыз вормонтэм кужымен гуртэ кыскиз. Песяез отын улэм солэн. Озьы ке но Митрей агай отчы ноку вуылымтэ.

Песяезлэн гуртаз улон юрт ласянь шугъяськонъёс кылдэмен, со городэ интыяськем. Но аръёс ортчыса но солэн пуромем мылкыдыз ӧз буйгатскы, гуртэ куриськиз. «Отын аслам музъеме луысал, бакча сиён будэтысал. Собере пудо вордыны но кутскысал. Сӥль-йӧл, картофка ӝӧк вылам дун тырытэк вуысал. Гурт калыклэн ваньмыз аслаз угось», - малпаськиз воргорон.
Тулыс, картофка мерттон вакытэ, городзы вӧзысь гуртэ кошкиз. Татысь пересь песянай нылъёсыз доры городэ улыны выжем, нош юртсэ вузаны малпам. Митрей агай солэсь корказэ басьтӥз. Собере бакчаяз картофка мерттӥз, кубиста ӵужкушман сярысь но ӧз вунэты. Соосты утьыны куддыр кузпалыз но вуылӥз. Берло Митрей агай гуртэ улыны выжыса скал басьтыны малпаз. Кузпалзэ но кӧяны-вӧяны кыл шедьтӥз. Озьы соос гужем быдэсак гуртэ выжизы. Басьтоно скалзылы турын дасян борды кутскизы. Соос быдэс нунал возь вылын турнаськизы. «Кыӵе умой гуртын улонэз, - ушъяськылӥз Митрей агай, - татын шоканы ик капчи». Нош кыкетӥ нуналаз со валесысьтыз мырдэм-мырдэм султӥз на. Суй-пыдъёссэ керттылӥллям кожалод. Кусоен возь вылэ потыны ӟигарыз ӧз тырмы ни. Коньдон кутыса бускелез доры вамыштӥз. Мыным, пе, кык трактор турын кулэ луоз. Дораз вуыса пиосмурт малпаськонэ усиз. Шонерзэ вераса, тол куазен сиёно картофкаезлэсь, сӥлезлэсь-йӧлэзлэсь дунзэ лыдъяны кутскиз. Та вакытэ солэн городын улонэз тодаз лыктӥз. Отын сиён ӝӧк вылэ шапык кужымдэ поттытэк но вуэ. Нош татын со вӧзы тӥни кӧня коньдон кисьтоно на.
Городысь вуэм воргорон гуртын ӝыны арлэсь кема ӧз ӝега. Скалэзлы кузё шедемез но возьманы ӧз чида ни. Сое, бакчазэ сямен ик, бускельысьтыз губыртӥськем песянайлы кузьмаз. Тулыс со бакчаяз трос картофка мерттӥз, скалэзлэсь ческыт йӧл кыскиз. Песянай тодмоосыз сьӧры бускелезлы но трос салам ыстылӥз.
Ольга НИГАМАТУЛЛИНА.
Читайте нас в