Ужез – арлыдоос сярысь сюлмаськон

Россилэн Президентэзлэн 2000-тӥ арын 27-тӥ коньывуонэ кутэм Указэзъя, 8-тӥ инвожое Россиын Социальной ужасьлэн нуналэз пусйиське. Малы 8-тӥ инвожо? Малы ке шуоно та нуналэ 1701-тӥ арын Пётр I висисьёслы, мӧйыослы юрттон сярысь Указ кылдытэм. Со указъя, утисьёссы, улон интызы луымтэослэн юртазы дас висись адями пӧлын одӥгез таза луыны кулэ вылэм, мукетъёслы юрттэт возьматон понна. Пётр I указэз кун системаын социальной юрттэт возьматонъя ӧр кылдытонлэн инъетэз но луэм. 1946-тӥ арын шаерамы Социальной юрттэт возьматонъя министерство кылдэмын.

Улонын пӧртэм воштӥськонъёс ке но луо, арлыдоослы, сӧсыръёслы, шуге-леке шедемъёслы юрттэт возьматон туннэ нуналозь но возиськемын. Социальной ужасьёс котькуд городын, котькуд гуртын вань.

Татышлы ёросысь Ивановка гуртын улӥсь Фидалия Гильфанова 20 ар социальной ужасьын тырше ни. Со 15 арлыдоослы юрттэт возьматон сярысь сюлмаське.

- Азьло куать яке сизьым пересьёсты утялтӥсько вал. Тужгес арлыдоезлы песянайлы, кудзэ мон али утялтӥсько, 92 арес. Со кожаз улыны уг ни быгаты. Солэн нылыз вӧзаз, городысь бертӥз. Озьы ке но мон соос доры мынытэк уг улӥськы.

- Нош кыӵе ужъёсты быдэсъяно луиськоды, Фидалия Гафуровна?

- Песянайёс мар косо, сое ик быдэстӥсько. Ву, пу пыртасько, толалтэ гурзэс эстыса корказэс но шунтоно. Мынам утялтоно арлыдоослэн огзылэн но юртазы газ пырымтэ. Корка-корказьёссэс, дӥськутъёссэс но миськылӥсько, - вера Ф. Гильфанова.

Арлэн котькыӵе дырыз мед луоз, ӵукна султыса Фидалия апай юртъер котырысьтыз ужъёссэ ӝог гинэ быдэстэ но, утялтоно песянайёсыз доры дыртэ. Арлыдоос сое котьку возьмало. Ужзы ке но ӧвӧл, витё, пе. Соослы вераськыны адями кулэ, сюлмаськонъёссэс но, шумпотонзэс но Фидалия апайлы верало. Зӥбыт сямо кышномурт котьку ваньзылы дырзэ висъяны тырше, шуныт кылзэ но со уз жаля. Мар ке луиз ке, нырысь ик со юрттэт возьматоз.

Миляуша НИГАМАТУЛЛИНА.

Татышлы ёрос.

Читайте нас в

Учредитель: Агентство по печати и средствам массовой информации Республики Башкортостан

Регистрационный номер: Свидетельство ПИ № ТУ02-01536 от 6 июня 2016г. Главный редактор: Нигаматуллина Оля Борисовна

Газета "Ошмес" - общественно-политическая, социальная, культурно-просветительская газета удмуртов Республики Башкортостан.

Телефон

Телефон+7 (34778) 2-11-89, 2-18-71

Электронная почта

[email protected]

Адрес

452830, Республика Башкортостан, Татышлинский район, с. Верхние Татышлы, ул. Ленина, д. 91