Кужмо семья секытъёсты ворме

Уфаын анай-атайёслэн кыкетӥез республика форумзы ортчиз. Отчы Башкортостан Республикалэн Тӧроез Рустэм Хамитов но пыриськиз.

Форум республикалэн Тӧроезлэн кичӧлтэмезъя ортчиз. Со Семьялэн нуналэзлы сӥзем арняез йылпумъяз.

- Нырысетӥ форум бере нылпиослэсь тазалыксэс утён, соосты тазалыко улонэн эшъяськытон ласянь бадӟым ужъёс лэсьтэмын, - вера Рустэм Хамитов. – Семья кусыпъёсты юнматон азьланяз но валтӥсь ужпуммы мед луоз.

Республикалэн Тӧроезлэн верамезъя, семьяосын герӟаськем ужпумъёсты быдэстыку, Россилэн Президентэзлэн куартолэзе кутэм указъёсыз вылэ пыкъяськоно. Соос семьяослы, анайёслы юрттыны чакламын.

Башкортостанын Владимир Путинлэн Федерал Собранилы Вазиськонысьтыз люкетъёссэ быдэстон ласянь бадӟым ужъёс нуисько ни. Озьы туннэ нуналэ семьяослы нимысьтыз ипотека сётӥське, пиналъёсты нылпи садъёсы интыянэн шугъяськонъёс быдтэмын, нылпиослэсь тазалыксэс ӟечгес эскеро. Республикаын та выллем ужъёсты быдэстон понна Семья политикая кивалтэт кылдытэмын.

- Со ваньмыз калыкмы кунмылэсь семьяос, нылпиос сярысь сюлмаськемзэ мед шӧдоз шуыса лэсьтӥське, - вера Рустэм Хамитов. – Шаерамы, республикаямы шудо семьяос тросгес луизы ке, вордскем дормы кужмогес адӟиськоз. Азямы кылдэм шуг-секытъёсты асьмеос нылпиосмес но семьяосмес яратонэн вормыны быгатомы.

Дасяз Ольга

НИГАМАТУЛЛИНА.