Гуртын сюрес луоз-а?

Котькинэ сюлмаськытӥсь ужпум

Пасяськем питранъёс, паньгам дискъёс, пилиськем бамперъёс – машинаен ветлӥсьёслы тодмо суредъёс. Тупатымтэ сюресъёсын сэрен авариослэн лыдзы но арысь аре йылэ. Огез эмъюртэ шеде, кыкетӥез сӧсыръёслэн креслоязы интыяське, куинетӥез пыраклы улонысь кошке…

Сюресъёс луымтэен гурт калык кӧня курадӟе? Кылсярысь, Татышлы ёросысь Вылысь Балтач гурт. Сӥзьылэн-тулысэн, яке гужем кисьтыса зориз ке, вылысь балтачъёс ульчаосазы машинаен пыраны уг ни быгато. Нош улонын кыӵе гинэ дыр уг луы. Висьыны ке усид? Тылпу ке ӝутскиз? Гуртын улӥсьёс собраниосын но ульчаосысь сюресъёсты тупатон сярысь кылпум ӝутылӥллям ни. Кема ӧвӧл Улысь Балтач гурт поселенилэн администрациезлэн кичӧлтэмезъя, ульчаостӥ грейдер ортчем. Ву бызьыны канаваос табере Вылысь Балтачын вань ини.

- Нырысетӥ вамыш лэсьтэмын. Но канава тупатыса гинэ югдур уз воштӥськы. Зориз ке, сьӧд сюй вылтӥ машинаен ортчод шат? Ульчаосы одно ик гравий киськано. Сюрестэк улыны уг луы, сое огъя кужымен ке но тупатоно. Гуртоос пӧлын «мон пыдын ветлӥсько» шуисьёс но луозы, дыр. Но вунэтоно ӧвӧл одӥгзэ – пыдын ветлӥсьёс доры но машинаен нылпиоссы берто, матысьёссы куное вуыло, – ӝожтӥськыса вера Вылысь Балтачын улӥсь, 20 арлэсь ятыр тракторен ужам ужысь ветеран Володя Давлетшин.

Вылысь Балтач ураметӥ ортчыку сюрес вылэ гравий пазясь воргоронэз синйылтӥм. Пенсиысь дышетӥсь Салим Миниахметов карьерысь гравий ваем.

- Азьло вакытын сямен туала улонын валэн ветлӥсь ӧвӧл ни. Зорыса улыку бадӟым техникаен пыро но, сюрес зӥбиське, быре. Сюрестэк кытчы мынод? Ас кужымен но ужано луиськом ини. Тани ачим тырыса гравий ваи. Погрузчик луысал ке, туж умой луысал но. Сюрес сярысь кылпум собраниосын но ӝутӥськом. Та юан котькинэ сюлмаськытэ, - шуэ Салим Фазлиахметович.

Вылысь Балтачлэсь урамъёссэ тупатон малпанэн ик улэ Григорий Исламов но.

- Азьлогес бускельёсын ӵош кариськыса урамез кӧня ке тупатэммы вал. Гравий тырмыт нуллыны ӧм быгатэ. Туннэ нуналэ нош ик сюрес луымтэен курадӟиськом ни. Калыклэсь ӧжыт коньдон люкаса ке но тупатоно вал ульчаосты, - вера со.

Вераны кулэ, гуртысь сюресъёслэн уродлыксы пумысен Вылысь Балтачын улӥсьёс гинэ уг ӝожтӥсько. Пырыны луонтэм ульчаос - трос гуртъёсын улӥсьёсты висьытӥсь юан. Кунмы но со сярысь малпаськытэк уг улы. Та югдурысь потон амалъёс утчан сярысь сюлмаськыса, пӧртэм проектъёс, программаос кылдытон бордын тырше.

Киосты ал выламы

тырыса ум пуке

Улонэз ӟечомытон понна, киосты ал вылэ тырыса пуконо ӧвӧл, мар ке но лэсьтоно. Та принципъя республикаын кӧня ке социальной проектъёс ужало. Соос пӧлысь одӥгез – котыр улосэз тупатонлы сӥзем «Программа поддержки местных инициатив» проект. Отчы котькуд гурт поселение пыриськыны быгатэ.

Та выллем проектъёс дуннеысь 80 странаосын ужало, Россиын - 2007-тӥ арысен. Та проект ужамен, шаерамы трос ӟеч ужъёс быдэстэмын: Ставрополь шаерын, Тверь но Киров улосвылъёсын культурая юртъёсты тупатӥллям, Хабаровск шаерын но Киров улосвылын спорт объектъёс ӝутӥллям, нылпиослы шудон площадкаос тупатӥллям но мукет. Башкортостанын та проект улонэ пыӵаз 2014-тӥ арын, Зауральеысен. Проектлэн туала этапез республикаын 28-тӥ оштолэзьысен ужаны кутскиз. Та проектъя ужась группаен кивалтэ Башкортостанысь Правительстволэн премьер-министрез Рустэм Марданов.

Кызьы со проект ужа? Гуртын улӥсьёс ик асьсэлэсь тужгес сюлмаськытӥсь ужпумъёссэс бырйыса, сое палэнтонэ бадӟым люкет пыртыны быгато. Проектэ пыриськем Зилаир ёрос администрациен кивалтӥсьлэн воштӥсез Светлана Парфёнова вера:

- Проектлэн быдэсмонэзлы калык нырысь ӧз оскы кадь. Трос юалляськизы, кылсярысь, выжтэм коньдон палэнэ уз кошкы-а шуыса. Проект пумысен трос валэктон ужъёс нуимы. Собраниос ортчытъямы. Берло калык огкылэ вуиз – проектэ пыриськоно. Инициативной группа бырйимы. Со группа ик коньдонэн герӟаськем ужпумъёсты ас вылаз басьтэ: калыклэсь коньдон люка, спонсоръёс утча но ужлэсь радъяськемзэ эскере. 2014-тӥ арын 13 сётэм завкаос пӧлысь 11-ез вормисе потэм. Соос пӧлысь витез сюресъёсты тупатонэн герӟаськемын вылэм. Нимаса верано ке, Бердяш гурт поселениын школае вуытозь асфальт вӧлдӥзы. Озьы ик нылпи но спорт площадкаосты выльдӥзы, тракторъёс басьтӥзы, ву гумыосты воштӥзы. Татын калык куара сётэ, кыӵе ужез нырысь быдэстоно.

Учалы ёросын та проектъя гуртысь урамъёсты тупатӥллям. «Программа поддержки местных инициатив» проектлэн кураторез луэ Всемирный банк.

Туэ проект кызьы

ужалоз?

- Та программа улсын 2016-тӥ арын Башкортостанын 300 проектъёс быдэстӥськыны кулэ. Конкурс «Конкурсный отбор проектов развития общественной инфраструктуры, основанных на местных инициативах» нимаське, - вера БР-ысь финансъёсъя министрлэн воштӥсез Наталья Калугина. – Проектлы республика бюджетысь 300 миллион коньдон выжтӥськоз – котькуд заявкалы 1 миллион манет тыр.

Проектэ котькуд мылкыд карись адями пыриськыны быгатэ. Со понна, нырысь ик, собраниосы лыктоно. Соос 30-тӥ куартолэзьысен 30-тӥ инвожоозь радъяськозы. Собраниын инициативной группа бырйиське. 10-тӥ пӧсьтолэзёзь муниципалитетъёс конкурсэ пыриськон сярысь заявка сётыны кулэ. Гудырикошкон толэзе заявкаосъя конкурсной отбор ортчоз. Калык макем азинлыко та уж борды басьтӥське, солэсь уте конкурсын вормон. Конкурсын вормон утэм бере гинэ калыклэсь но спонсоръёслэсь коньдон люканы кутско. Со понна нимысьтыз счёт усьто. Собраниын лэсьтэм сметая коньдон тырмыт люкамзы бере, республика бюджетысь коньдон висъяське. Куарусён толэзе ужез быдэстон понна подрядчикъёсты быръё. Куарусёнысен толсурозь проект быдэстӥське.

БР-лэн Тӧроез Рустэм Хамитов та проект пумысен вера:

- «Программа поддержки местных инициатив» проект азинлыко ужа. Адямиос валазы, асьсэлэн инициативаоссы луэмен, соос уж быдэстон сяна, кивалтэт азе куронъёс но пуктыны луэ шуыса. Кытын ке но сюресъёс выльдӥськизы, мукет интыын шай котырысь кенеръёсты выльдӥзы, ошмесэз тупатӥзы. Огкылын вераса, та проект возьматэ, калыкез уж борды кыскыса, солэсь малпанъёссэ лыдэ басьтыса, ӟеч ужъёс пӧрмытыны луэ. Та ужез одно ик азьланьтоно.

Йылпумъян интые

Тупатэм сюресъёс, гравиен шобыртэм ульчаос, нылпиослы шудыны лэсьтэм площадкаос, выльдэм ву гумыос – ваньмыз гуртлэсь ӟечлыксэ, калыклэсь отын каньыл улэмзэ возьматэ. Ӵошен кариськыса, проектэ азинлыко пыриськыса, Вылысь Балтачысь урамъёсты но тупатыны луоно.

Миляуша БУЛАТОВА.